PENE 37

Ka Papetito Ainei Au?

E akairo i te au tuatua i raro e tika me kore e tarevake:

Ka umuumuia kia papetito te au Kerititiano.

□ Tika

□ Tarevake

Te akakoroanga maata o te papetito, ei paruru ia koe kia kore e ō atu ki roto i te ara.

□ Tika

□ Tarevake

Na te papetito e akaora ia koe.

□ Tika

□ Tarevake

Me kare koe e papetitoia, kare aau apainga i mua i te Atua no taau e rave ra.

□ Tika

□ Tarevake

Me papetitoia toou au oa, tera te aiteanga kua papa koe no te papetito.

□ Tika

□ Tarevake

ME AKONO koe i to te Atua au turanga, me akatupu i te pirianga oa ki te Atua e me pukapuka ki tetai ke no runga i toou akarongo, e mea tau i reira te akamanako ra koe i te papetito. Inara akapeea koe e kite ei me kua papa koe no te papetito? Ei pau i teia uianga, ka uriuri tatou i te au tuatua tika me kore tarevake i runga ake.

● Ka umuumuia kia papetito te au Kerititiano.

Tika. Akaue a Iesu kia papetitoia tana au pipi. (Mataio 28:19, 20) Te tika, kua papetito katoaia a Iesu. Ei aru iaia, ka anoanoia koe kia papu meitaki i taau ikianga e kia inangaro tikai kia papetito.

● Te akakoroanga maata o te papetito, ei paruru ia koe kia kore e ō atu ki roto i te ara.

Tarevake. Na te papetito e akakite ki te katoatoa i toou akatapuanga kia Iehova. Kare toou akatapuanga i te koreromotu noa ua nei tei arai ia koe kia kore e rave i te au angaanga muna taau ka inangaro i te rave. Mari ra, ka akatapu koe i toou oraanga kia Iehova no te mea ka inangaro koe i te akono i tona au turanga.

● Na te papetito e akaora ia koe.

Tika. Karanga te Pipiria e takainga puapinga te papetito e ora ai tatou. (1 Petero 3:​21) Inara kare te papetito e riro ei akapapuanga e ka akaoraia koe. Ka tau kia papetito koe, kare no toou inangaro kia akaoraia mai, mari ra no toou aroa ia Iehova e toou inangaro i te tavini iaia ma toou ngakau katoa e tuatau ua atu.​—Mareko 12:29, 30.

● Me kare koe e papetitoia, kare aau apainga i mua i te Atua no taau e rave ra.

Tarevake. Akakite a Iakobo 4:​17: “E teianei ko te tangata i kite i te rave i te mea meitaki, e kare i rave, kua riro ïa ei ara nana”​—me papetitoia tetai tangata e me kare. No reira me kite koe i te mea meitaki e kua papa koe no te akamanako meitaki i toou oraanga, penei ko teia te taime no te uriuri manako ki toou nga metua me kore tetai Kerititiano tukatau. Me akapera koe, ka apii koe eaa taau ka rave kia papetitoia.

● Me papetitoia toou au oa, tera te aiteanga kua papa koe no te papetito.

Tarevake. Te ikianga kia papetitoia, ka anoanoia kia rave i te reira ma te ngakau puareinga ua. (Salamo 110:3) Ka tau koe kia papetito me mārama pu tikai koe eaa te umuumuia ra kia riro mai ei Kite no Iehova, e kua papa meitaki koe no te akono i teia apainga.​—Koheleta 5:4, 5.

Ka Taui te Papetitoanga i Toou Oraanga

E takainga puapinga tikai te papetito i roto i te oraanga te ka taki atu ki te au akameitakianga e manganui. I taua taime rai, e apainga puapinga tikai te reira​—kia akatupu i taau uaorai akatapuanga kia Iehova.

Kua papa ainei koe i te akatapu i toou oraanga kia Iehova? Me koia, e tumu meitaki toou kia mataora. Ka tapapa atu koe i te akameitakianga maata roa atu​—koia oki kia tavini ia Iehova ma te ngakau katoa e te akono i te tu oraanga tei akaari e kua akatapuia koe kiaia.​—Mataio 22:36, 37.

IRAVA PUAPINGA

“Kia tuku atu kotou i to kotou au kopapa ei atinga ora, e te tapu, e tau oki i te Atua, ko te akamori e tau ïa ia kotou.”​—Roma 12:1.

TAUTURU

E uriuri ki toou nga metua e te kimi i tetai taeake i roto i te putuputuanga te ka tauturu ia koe kia tere ki mua i te pae vaerua.​—Angaanga 16:​1-3.

KUA KITE AINEI KOE . . . ?

Ko te papetito tetai tuanga puapinga o “te akairo” kia rauka ia koe te ora.​—Ezekiela 9:​4-6.

RAVE I TEIA!

Kia papetitoia au, ka tauta au kia mārama i teia au apiianga Pipiria: ․․․․․

Teia taku ka inangaro i te ui atu ki toku nga metua no runga i teia tumu manako koia oki ․․․․․

EAA TOOU MANAKO?

● Eaa te papetito i riro ei ei takainga puapinga?

● Eaa te ka akakeu i tetai mapu kia papetito vave ua?

● Eaa te tumu ka tavarevare ei tetai mapu i te akatapu iaia uaorai e kia papetito?

[Tataanga]

“No te mea kua papetitoia au, kua tauturu te reira iaku kia rave i te au ikianga meitaki e kia kore e aru i te au aerenga tei taki atu ki te tumatetenga.’’​—Holly

[Pia/Tutu]

Au Uianga a te Tangata no te Papetito

Eaa ta te papetito e akatutu maira? Me tarukuia koe ki roto i te vai, te aiteanga kua mate koe me kore kua akaruke i toou tu oraanga noinoi i mua ana. Me kake mai koe mei roto i te vai, ka akamata koe i te oraanga ou i te rave i to Iehova anoano.

Eaa te aiteanga kia akatapu i toou oraanga kia Iehova? Tona aiteanga, kare noou uaorai toou oraanga mari ra, kua taputou koe i te tuku i to te Atua anoano ei mea puapinga roa atu i roto i toou oraanga. (Mataio 16:24) E mea tau kia akatapu i toou oraanga kia Iehova na roto i te pure i mua ake ka papetito ei koe.

Eaa taau ka rave i mua ake ka papetito ei koe? Ka tau koe kia akarotai i toou oraanga ki te Tuatua a te Atua e kia akakite i toou akarongo ki etai ke. Ka akatupu koe i te pirianga oa ki te Atua na roto i te pure e te apii anga i tana Tuatua. Ka tau koe kia tavini ia Iehova no te mea naau te reira ikianga​—kare e na etai ke i māro ia koe.

Eaa te mataiti ka tau tetai no te papetito? Kare ko te mataiti te mea puapinga. Noatu ra, ka tau koe kia mārama pu tikai i te aiteanga o te akatapuanga.

Akapeea me inangaro koe kia papetito inara karanga toou nga metua e tiaki marie? Penei ka inangaro raua ia koe kia tukatau mai i te oraanga Kerititiano. E akaperepere i ta raua ako, e e taangaanga i te reira tuatau no te akamatutu i toou pirianga oa kia Iehova.​—1 Samuela 2:26.

[Pia]

Pepa Apii

Te Manako ra Ainei Koe Kia Papetito?

Akamanako ana i teia au uianga e te au manako i raro mai. Tatau i te au irava i mua ake ka tata ei koe i taau pauanga.

Eaa te au mataara te akaari nei koe i toou irinaki ia Iehova?​—Salamo 71:5. ․․․․․

Akapeea koe i te akaari anga e kua tereniia toou ngakau kia kite i te meitaki e te kino?​—Ebera 5:​14. ․․․․․

Eaa te putuputu me pure koe? ․․․․․

Mei teaa te tu o taau pure, e eaa ta te reira e akaari maira no runga i toou inangaro ia Iehova?​—Salamo 17:6. ․․․․․

Tata i taau au akakoroanga ka inangaro koe i te itae no te pure. ․․․․․

Eaa te putuputu o taau uaorai apii Pipiria?​—Iosua 1:8. ․․․․․

Eaa taau e taangaanga ra no taau uaorai apii Pipiria? ․․․․․

Tata i taau au akakoroanga ka inangaro koe i te itae no taau uaorai apii Pipiria. ․․․․․

E tukatau ainei koe i te angaanga tutu aere? (Ei akaraanga: Ka rauka ainei ia koe i te akamārama i te au apiianga Pipiria ki tetai ke? Te oki ra koe i te atoro i te aronga tei inangaro i te akarongo? Te tauta ra ainei koe kia akamata i tetai apii Pipiria?)

□ Ae □ Kare

Ka tutu aere koe noatu kare toou nga metua e rave i te reira?​—Angaanga 5:​42.

□ Ae □ Kare

Tata i taau au akakoroanga ka inangaro koe i te itae no te tutu aere.​—2 Timoteo 2:​15. ․․․․․

E aere putuputu ana koe ki te au uipaanga Kerititiano, me kare?​—Ebera 10:25. ․․․․․

Eaa taau e rave ra kia puapingaia koe mei te au uipaanga? ․․․․․

Ka aere rai koe ki te uipaanga me kare toou nga metua e aere (me kua akatika raua ia koe)?

□ Ae □ Kare

Ka karanga ainei koe e e inangaro tikai toku kia rave i te anoano o te Atua?​—Salamo 40:8.

□ Ae □ Kare

Ka rauka ainei ia koe te akamaara i te au atianga i kopae ei koe i te māroanga a toou au oa?​—Roma 12:2. ․․․․․

Akapeea koe me tamou tikai i toou inangaro no Iehova?​—Iuda 20, 21. ․․․․․

Ka tavini ua rai koe ia Iehova me akamutu toou nga metua e te au oa i te tavini iaia?​—Mataio 10:36, 37.

□ Ae □ Kare

[Tutu]

Mei te akaipoipo rai, e ikianga puapinga tikai te papetito​—kare i te ikianga noa ua nei