E te Au Taeake e te Au Tuaine:

Ko te akaperepere i te Atua e te tangata ka akakeu ia tatou kia “aere . . . e akariro i to te pa enua katoa ei pipi; ka bapetizo atu ei ia ratou.” (Mata. 28:​19, 20; Mare. 12:​28-31) Me akaari tatou i teia aroa, ka akakeu te reira i te ngakau o te tangata tei “akonoia no te ora mutu kore.”—Anga. 13:48.

I mua ana, e tamou ngakau ana tatou i te au akatutuanga e te akaruke i tetai puka. Teianei, ka inangaro tatou kia akameitaki atu i to tatou tu karape no te pukapuka anga. Ka akaari tatou i te aroa ki tetai ke me pukapuka no runga i te au apinga e reka ana ratou. Tera te aiteanga, kia papa ua tatou i te akatano e te akamanako meitaki i te inangaro o te tangata. Akapeea teia poroutia me tauturu ia tatou kia rave i te reira?

E 12 au apii i roto i teia poroutia te akataka ra i te au tu te ka akakeu ia tatou kia akaperepere e te akariro i te tangata ei pipi. Kua akatumuia teia au apii ki runga i te tu i akaari ei a Iesu e te au Kerititiano o mua ana i roto i te angaanga orometua. Ko te akakoroanga, kare kia tamou ua i te au akatutuanga, mari ra kia akaari i to tatou inangaro no te tangata. E tika ka akaari tatou i teia au tu tataki tai, inara ka anoanoia tatou kia akamanako meitaki i tetai au tu no te akamata i te pukapuka anga, me atoro akaou me kore me rave i tetai apii Pipiria.

Ia koe e akara ra i te tu i roto i te au apii tataki tai, akamanako akapeea koe me akaari i teia tu me pukapuka ki te tangata i toou ngai. E aruaru i te akaketaketa i toou inangaro no Iehova e no te tangata. Na roto i teia, ka tauturu ia koe kia itae i taau akakoroanga kia akariro i te tangata ei pipi.

E tikaanga ngateitei i te angaanga kapiti kia koe ma te manako okotai. (Zepha. 3:9) Kia akameitaki ua rai a Iehova ia koe kia akaperepere i te tangata e te akariro ia ratou ei pipi!