Kua anau a Adamu e Eva i te tamariki, e kua maata te tangata i te enua nei. I muri mai, kua piri tetai au angera ki ta Satani meameaauanga.

Kua aere mai ratou ki te enua nei e kua taui ki te kopapa tangata kia akaipoipo i te au vaine. Kua anau te au vaine i te au tamariki tamaroa kino tikai e te ririnui.

Kua ki te ao i te au tangata e rave ra i te kino. Te karanga ra te Pipiria e: “E kino maata to te tangata i te enua nei, e kua kino anake te au manako katoa, e te akakoroanga katoa o to ratou ngakau i te au rā katoa ra.”

E tangata meitaki a Noa. Kua akakite a Iehova kia Noa e ka takore Aia i te au tangata kino i roto i te vaipuke maata.

Kua akakite te Atua kia Noa kia maani i tetai pai maatamaata, e araka, e kia apai i tona pamiri e te au manu tukeke ki roto.

Kua akamatakite a Noa i te au tangata no runga i te Vaipuke e aere maira, kare ra ratou i akarongo ana. Kua kata aviri tetai pae ia Noa; kua riri tetai pae iaia.

Otianga te araka, kua taki mai a Noa i te au manu ki roto.