Toou manako e e ngata rai te rave i te mea tika?— Te maataanga i te tangata karanga ratou e ae. Akakite maira te Pipiria e e ngata tikai no tetai tamaiti ko Iosia tona ingoa i te rave i te mea tika. Inara e au oa meitaki tikai tona i te tauturu iaia. Ka apii taua kia maata atu ta taua ka kite no runga i te au oa o Iosia.

Ko Amona te papa o Iosia, e ariki aia no Iuda. E tangata kino a Amona, e akamori ana aia i te au atua itoro. Te mate anga te papa o Iosia, riro mai a Iosia ei ariki no Iuda. Inara e varu ua rai ona mataiti! Toou manako e e kino rai aia mei tona papa?— Kare, kare aia e kino ana!

Mei tona meangitianga, kua inangaro a Iosia i te akarongo kia Iehova. No reira kua iki aia kia akaoa atu ki te au tangata tei inangaro ia Iehova. E kua tauturu ratou ia Iosia kia rave i te mea tika. Koai ma ra tetai au oa o Iosia?

Tetai o tona au oa ko Zephania. E peroveta a Zephania. E kua akamatakite aia i te tangata o Iuda e, ka tupu te au mea kino kia ratou me akamori ratou i te au atua itoro.  Kua akarongo a Iosia kia Zephania e kua akamori aia ia Iehova, kare i akamori i te au atua itoro.

Tetai oa ke mai o Iosia ko Ieremia. Vaitata rai e aiteite ua to raua mataiti. Kare i mamao roa to raua ngai i noo ei mei tetai e tetai, i to raua tupu mai anga. E nga oa piri tikai raua. Te mate anga a Iosia, tata a Ieremia i tetai imene akaperepere no runga i tona mii maata ia Iosia. Akamaroiroi a Ieremia e Iosia ia raua uaorai kia rave i te mea tika e kia akarongo kia Iehova.

Eaa taau apiianga ka mou mai mei te akaraanga o Iosia?— Noatu e manga tamaiti ua a Iosia, kua inangaro rai aia i te rave i te mea tika. Kua kite aia e e mea tau kia akaoa atu aia ki te au tangata tei inangaro ia Iehova. No reira e akapapu meitaki e kia iki koe i te au oa tei inangaro ia Iehova, e te ka tauturu ia koe kia rave i te mea tika!