E tamaiti mapu ua a Timoteo. E mea mataora nana i te tauturu i te tangata. Maata tana au ngai e aere ana i te tauturu i te tangata. Oraanga umere tikai tona e tana angaanga e rave ra. Ka inangaro koe i te akarongo no runga i te reira?—

Maata mai a Timoteo i roto i tetai oire ko Lusetera te ingoa. Tona tamariki anga, kua akamata tona mama ruau a Loi e tona mama a Eunike, i te apii iaia no runga ia Iehova. Ia Timoteo e maata maira, inangaro aia i te tauturu i te tangata kia kite no runga ia Iehova.

Te mapu ra rai a Timoteo, kua pati a Paulo iaia kia aere raua kia tutu aere i tetai au ngai ke. Karanga atu a Timoteo e: ‘Ae!’ Kua papa ua aia i te aere i te tauturu i te tangata.

 Kua aru a Timoteo ia Paulo ki tetai oire i Makedonia tei karangaia e ko Tesalonia. E mamao te ara, e ka aere raua na raro ua e tae ei ki reira, e oti ka na runga raua i te pai. Te tae anga raua, e maata te tangata ta raua i tauturu kia kite no runga ia Iehova. Inara kua riri tetai au tangata ia raua. Inangaro ratou i te ta ia raua. No reira kua aere a Paulo raua ko Timoteo ki tetai au ngai ke mai i te tutu aere.

Tetai au marama i muri mai, kua pati a Paulo ia Timoteo kia oki ki Tesalonia, kia akara e te akapeea ra te au taeake i reira. Inangaroia te tu mataku kore kia oki akaou ki tera oire kino! Inara kua aere rai a Timoteo no te mea kua manamanata aia no runga i te au taeake i reira. Inara e nuti meitaki tana i akaoki mai kia Paulo. Te meitaki ua ra te au taeake i Tesalonia!

E maata te au mataiti te angaanga kapiti anga a Timoteo raua ko Paulo. I tata ana a Paulo e ko Timoteo te tangata meitaki rava atu tei tau kia tuku aia ei tauturu i te au putuputuanga. E maata to Timoteo inangaro ia Iehova e te tangata.

E inangaro ana rai koe i te tangata? Ka inangaro koe i te tauturu ia ratou kia kite no runga ia Iehova?— Me akapera koe, ka mataora koe e ka rekareka maata i toou oraanga mei ia Timoteo rai!