Ka tamanako ua tatou e tei roto tatou i te oire ko Ieriko. Tei roto teia oire i te enua Kanaana. Kare te tangata i reira e irinaki ana ia Iehova. E noo ana tetai vaine ko Rahaba tona ingoa i konei.

Te meangiti ua ra a Rahaba, kua akarongo aia e kua akaatea a Mose i te Tai Muramura, e kua arataki aia i te tamariki Iseraela mei te enua Aiphiti. Akarongo katoa aia e kua tauturu a Iehova ia ratou kia re i ta ratou au tamaki ki to ratou au enemi. Teianei akarongo aia e, kua patia te tamariki Iseraela i to ratou puakapa ki vao ake i te oire ko Ieriko!

Tetai aiai, kua aere e rua nga tangata Iseraela ki Ieriko i te tutaka. Aere atu raua ki ko i te are o Rahaba. Pati mai a Rahaba ia raua kia tomo ki roto e kia noo i reira. Taua po ra, kua akakiteia ki te ariki o Ieriko e e nga tangata tutaka tetai i roto i te oire, e tei ko raua i te kainga o Rahaba. I reira kua tono te ariki i tetai tangata kia opu ia raua. Kua uuna a Rahaba i taua nga tangata ra ki runga roa ake i tona are. Kua akakite aia ki te au tangata o te ariki e: ‘Ae, kua aere mai ana taua nga tangata, e kua akaruke takere oki raua i te oire. Me aere kotou i teianei, ka rokoia atu raua e kotou!’ Kua kite koe e no teaa a Rahaba i paruru ei i te nga tangata tutaka?— No te mea kua irinaki tikai aia ia Iehova. Kua kite oki aia e ka oronga a Iehova i te enua Kanaana no te tamariki Iseraela.

I mua ake ka akaruke ei raua i te are o Rahaba, kua taputou raua e ka ora aia e tona ngutuare tangata me takoreia a Ieriko. Kua kite koe e eaa ta raua i akakite kia rave aia?— Karanga raua e: ‘E tapeka koe i teia taura muramura na roto i toou maramarama. Me akapera koe, ka ora pouroa te tangata e noo ra i roto i toou are.’ Kua rave a Rahaba mei ta tera nga tangata tikai i akakite kiaia. Kua kite koe e eaa tei tupu mai?—

Tetai au ra i muri mai, kua takapini muteki ua mai te tamariki Iseraela i te oire. E ono ra, kua takapini ratou i te oire e tai ua taime i te ra. Inara i te itu o te ra, kua takapini ratou i te oire e itu taime. E oti kua maeva maata ratou. I reira kua maani a Iehova i te patu o te oire kia pururu mai ki raro. Inara kua vai rai te are e tautau maira te taura muramura na roto i te maramarama, kare i topa ki raro! Te kite ra koe i te reira i roto i te tutu?—  Kua akaoraia mai a Rahaba pera katoa tona ngutuare tangata!

Eaa te apiianga taau ka mou mai mei ia Rahaba?— Kua irinaki tikai a Rahaba ia Iehova no te au angaanga umere tana i kite no runga iaia. E maata katoa rai taau au apinga umere ka kite no runga ia Iehova. Te irinaki ra ainei koe iaia mei ia Rahaba rai?— Kua kite matou e te irinaki ra koe!