Ka apii taua no runga i tetai tamaiti mapu tei tauturu i tona papa angai, te tungane o tona mama. Tona papa angai, ko te apotetoro ko Paulo. Kare tatou i kite e koai te ingoa o tera tamaiti. Inara kua rave aia i tetai mea ma te mataku kore. Ka inangaro koe i te akarongo e eaa tana i rave?—

Tei roto a Paulo i te are auri i Ierusalema. Kua opuia aia no te mea te tutu aere ra aia no runga ia Iesu. Kua riri tetai au tangata kino ia Paulo. No reira kua maani ratou i tetai parani kino. Kua tuatua ratou e: ‘Ka pati tatou ki te rangatira maata kia apai tona vaeau ia Paulo ki te akavaanga. Ka aere tatou ka pipini i te pae mataara e me aere mai a Paulo na reira, ka ta tatou iaia!’

Kua rongo te tamaiti angai a Paulo no runga i teia parani. Eaa ra tana ka rave? Kua aere aia ki ko i te are auri i te akakite i taua parani kia Paulo. Tera taime rai, akakite a Paulo kiaia kia aere aia e akakite i taua parani kino ra ki te rangatira maata. Toou manako e e mama ainei no tera tamaiti kia tuatua atu ki te rangatira maata?— Kare, no te mea e tangata taoonga teitei te rangatira. Inara e tamaiti mataku kore aia, e kua aere aia i te tuatua ki te rangatira.

Kite meitaki ua te rangatira e eaa tana ka rave. Kua tuku aia mei te 500 vaeau kia paruru ia Paulo! Kua akakite aia kia ratou kia apai ia Paulo ki Kaisarea i tera po rai. Kua ora a Paulo?— Ae, kare i rauka i taua aronga kino ra i te ta iaia! Kare i puapingaia ta ratou parani kino.

Eaa taau ka mou mai mei teia tua?— Ka rauka katoa ia koe te tu mataku kore mei te tamaiti angai rai a Paulo. Kia mataku kore rai tatou me tuatua ki te tangata no runga ia Iehova. E tu mataku kore ainei toou i te tuatua ua rai no runga ia Iehova?— I na me akapera koe, ka rauka ia koe i te akaora i te oraanga o tetai tangata.