Te kite ra koe i te au tangata i roto i te tutu?— Ko Mataio, Mareko, Luka, Ioane, Petero, Iakobo, Iuda, e Paulo. Kua noo ana teia au tangata pouroa i taua taime rai e Iesu, e kua tata ratou no runga ia Iesu. Ka apii taua no runga ia ratou ine.

E toru ia ratou, e au apotetoro tei tutu kapiti e Iesu. Kua kite koe e koai ma ratou?— Ko Mataio, Ioane, e Petero. Kua kite a Mataio raua ko Ioane ia Iesu. Kua tata a Mataio e tai puka, e kua tata katoa a Ioane e tai puka, no runga i te  oraanga o Iesu. Na te apotetoro na Ioane i tata i te puka o Apokalupo, e te au reta e toru tei kapikiia e ko Ioane Tai, Ioane Rua, e Ioane Toru. E rua nga reta i roto i te Pipiria, na te apotetoro ko Petero i tata. Kua kapikiia te reira e ko Petero Tai e Petero Rua. I roto i te rua o tana reta, kua tata a Petero no runga i te taime i tuatua mai ei a Iehova mei te rangi. Kua akakite aia no runga ia Iesu e: ‘Ko taku tamaiti akaperepere teia. Inangaro au iaia, e te mareka nei au iaia.’

Te au tangata ke mai i roto i te tutu, apii katoa mai ratou ia tatou no runga ia Iesu i roto i te au puka ta ratou i tata. Tetai ia ratou ko Mareko. Kare e kore e koia tetai i reira i te opuia anga a Iesu. Kua kite aia i te au mea pouroa tei tupu. Tetai katoa, ko Luka. E taote aia e kare e kore e kua riro mai aia ei Kerititiano i muri ake i te mate anga o Iesu.

E rua nga tangata tata Pipiria ke mai taau e kite ra i roto i te tutu, e nga teina raua no Iesu. Kua kite koe i to raua ingoa?— Ko Iakobo e Iuda. I te akamataanga, kare raua e irinaki ana i roto ia Iesu. Kua manako raua e kua auouoia aia. Inara i muri mai, kua irinaki raua i roto ia Iesu e kua riro mai ei nga Kerititiano.

Te tangata tata Pipiria openga e kite ra koe i roto i te tutu, ko Paulo. I mua ake ka riro ei aia ei Kerititiano, ko Saula tona ingoa. E riri ana aia i te au Kerititiano, e e kino tikai aia kia ratou. Kua kite koe e na teaa i inangaro ei a Paulo kia riro mai ei Kerititiano?— Tetai ra, te aere ra a Paulo na runga i te mataara, kua poitirere aia i te akarongo anga i tetai tangata e tuatua maira kiaia mei runga i te rangi. Ko Iesu taua tangata ra! Kua ui mai aia kia Paulo e: ‘Eaa koe i takinga kino ei i te aronga tei irinaki iaku?’ Muri ake i tera, kua taui te tu o Paulo e kua riro mai aia ei Kerititiano. E 14 puka o te Pipiria, na Paulo i tata mei te puka Roma ki te puka Ebera.

E tatau ana tatou i te Pipiria i te au ra ravarai, me kare ainei?— Na te tatau anga i te Pipiria, e maata ta tatou ka apii mai no runga ia Iesu. Ka inangaro rai koe kia apii maata atu no runga ia Iesu?—