1, 2. Toou manako eaa i riro ei te pure ei apinga akaperepere, e eaa i anoanoia ai kia kite tatou i te apiianga a te Pipiria no te pure?

ME AKAAITEIA ki teia ao katoa, e meangiti ua te enua. Kia Iehova, e topata ua te pa enua i roto i te pakete. (Salamo 115:15; Isaia 40:15) Noatu e meangiti ua tatou, akakite te Salamo 145:18, 19: “Te vaitata mairā Iehova i te aronga i kapiki atu iaia, i te aronga i kapiki atu iaia ma te pikikaa kore. E akatika aia i te anoano o te aronga i mataku iaia; ka akarongo mai aia i ta ratou kapiki, e ka akaora oki aia ia ratou.” E tikaanga ngateitei tikai tera no tatou! Inangaro te mana katoatoa a Iehova, Tei Anga ia tatou, kia akavaitata tatou kiaia e ka akarongo mai aia i ta tatou pure. E akameitakianga maata te pure e e apinga aroa na Iehova kia tatou.

² Ka akarongo mai a Iehova me pure tatou na te mataara tei tau iaia. Akapeea tatou me rave i te reira? Akara tatou i to te Pipiria manako.

3. No teaa koe ka pure ei kia Iehova?

³ Inangaro a Iehova ia koe kia pure e kia tuatua kiaia. Akapeea tatou i kite ei? E tatau ia Philipi 4:6, 7. Akamanako ana i tera patianga na Tei Anga i teia ao. Akaperepere maata Aia ia koe. Inangaro aia kia akakite koe i toou manako e toou manamanata Kiaia.

4. Akapeea te pure putuputu ua rai kia Iehova i te akamatutu anga i toou pirianga oa kiaia?

 ⁴ Ka tauturu te pure ia tatou kia riro ei oa piri tikai no Iehova. Me tuatua putuputu te au oa ki tetai e tetai i to ratou manako, manamanata, e to roto i to ratou ngakau, ka matutu roa atu to ratou pirianga oa. Mei tera rai me pure kia Iehova. Akakite mai aia na roto i te Pipiria i tona manako, tona anoano, e tana ka rave a te tuatau ki mua. Ka rauka katoa ia koe te akakite kiaia eaa tikai to roto i toou ngakau. Ia koe rave ra i teia, ka ketaketa roa atu toou pirianga oa kia Iehova.​—Iakobo 4:8.

5. Akapeea tatou i kite ei e kare a Iehova e akarongo mai i te au pure pouroa?

⁵ Ka akarongo mai ainei a Iehova i te au pure pouroa? Kare. Akakite a Iehova ki to Iseraela: “Kia akamaata kotou i te au pure, kare au e akarongo atu; kua ki oki to kotou rima i te toto.” (Isaia 1:15) Kia matakite  tatou eiaa e rave i te au mea ka akatakake ia tatou mei ia Iehova, no te mea kare aia e akarongo mai ta tatou pure.

6. Eaa te puapinga o te akarongo? Akapeea koe te akaari anga e e akarongo toou?

⁶ Me ka inangaro tatou kia ariu mai a Iehova ki ta tatou pure, e tuku i to tatou akarongo ki roto iaia. (Mareko 11:24) Akakite a Paulo: “Kare ra e akarongo ra kare rava aia e mareka: ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.” (Ebera 11:6) Kare e rava kia tuatua ua e e akarongo to tatou. Kia akaari tatou i te reira e kia akono i to Iehova anoano i te au rā ravarai.​—E tatau ia Iakobo 2:26.

7. (a) Eaa tatou ka akaari ei te tu akaaka e te akangateitei me pure kia Iehova? (e) Akapeea tatou te akaari anga e te tae ra to tatou ngakau me pure?

⁷ Akaari i te tu akangateitei e te akaaka me pure kia Iehova. No teaa ra? Me tuatua tatou ki tetai ariki me kore peretiteni, ka tuatua tatou na roto i te tu akangateitei. I na ko Iehova te Atua Mana Katoatoa, kare ainei i te mea tau kia maata atu to tatou akangateitei e te akaaka me tuatua kiaia? (Genese 17:1; Salamo 138:6) Kia pure katoa tatou kiaia ma te ngakau tae, eiaa e taokioki ua i taua tuatua rai.​—Mataio 6:7, 8.

8. Me pure tatou no tetai apinga, eaa atu tetai ka anoanoia kia rave tatou?

⁸ Me pure no tetai apinga, kia tau ta tatou ka rave ki ta tatou e pati ra. Ei akaraanga, me pure tatou kia oronga mai a Iehova i te au mea tei anoanoia no te oraanga, kare tatou e noo ua e tiaki kia oake mai Aia i teia au mea me ka rauka ua ia tatou i te angaanga. Ka  tauta tatou e ka āriki i te angaanga ua atu ka rauka. (Mataio 6:11; 2 Tesalonia 3:10) Me pure kia tauturu mai a Iehova ia tatou kia kore e rave i te kino, ka kopae tatou i tetai ua atu turanga ka riro ei timata ia tatou. (Kolosa 3:5) Ka akara ana tatou i tetai au uianga matauia no runga i te pure.

9. Ka pure tatou kiaai? Eaa ta Ioane 14:6 e apii maira ia tatou no runga i te pure?

⁹ Ka pure tatou kiaai? Apii a Iesu i tana au pipi kia pure “E to matou Metua i te ao ra, Kia tapu toou ingoa.” (Mataio 6:9) Akakite aia: “Ko au te mataara, e te tuatua-mou e te ora; kare ua e tangata e tae ki te Metua ra, mari ra ei iaku.” (Ioane 14:6) Ka pure tatou kia Iehova anake ua, na roto ia Iesu. Eaa te ō maira me pure na roto ia Iesu? Kia akangateitei tatou i te apainga ta Iehova i oronga na Iesu, e āriki mai ei aia i ta tatou pure. Aere mai a Iesu ei akaora ia tatou mei te ara e te mate. (Ioane 3:16; Roma 5:12) Akamana katoa a Iehova ia Iesu ei Taunga Maata e ei Akava.​—Ioane 5:22; Ebera 6:20.

10. Ka anoanoia ainei tatou kia tuturi, noo ki raro me kore kia tu ua me pure? Akamārama mai.

¹⁰ Ka anoanoia ainei tatou kia tuturi, noo ki raro e kia tu ua me pure? Kare. Kare a Iehova e pati maira kia akapera tatou me pure. Apii mai te Pipiria e ka tau kia pure tatou na roto i tetai ua atu tu akangateitei. (1 Paraleipomeno 17:16; Nehemia 8:6; Daniela 6:10; Mareko 11:25) Te mea puapinga roa atu kia Iehova ko te akakoroanga o to tatou ngakau. Ka tau kia akamaata tatou i te reo e kia pure ngakau ua i tetai ua atu taime, i  te po e te ao. Ka rauka ia tatou kia irinaki e ka akarongo mai a Iehova noatu me kare e tangata e akarongo mai.​—Nehemia 2:1-6.

11. Eaa tetai au apinga ka rauka ia tatou kia tuatua atu kia Iehova?

¹¹ Ka pure tatou no teaa? No tetai ua atu apinga tei tau kia Iehova. Karanga te Pipiria: “Kia pati ua atu tatou i te au mea ravarai i tau iaia ra, te akarongo maira aia ia tatou.” (1 Ioane 5:14) Ka tau ainei kia pure no tetai mea ko tatou ua tei kite? Ae. Aite rai mei te tuatua ki to tatou oa piri tikai. Ka akakite tatou eaa to roto i to tatou manako e te ngakau. (Salamo 62:8) Ka rauka ia tatou kia pati i tona vaerua tapu ei tauturu ia tatou te rave i te mea tika. (Luka 11:13) Kia pati i Tona pakari kia rave i te au ikianga tau e kia rauka te ngakau toa i te akakoromaki i te au tu ngatā. (Iakobo 1:5) Pati katoa tatou ia Iehova kia akakore mai i ta tatou ara. (Ephesia 1:3, 7) Kia pure tatou no etai ke, te ngutuare tangata, te au taeake e te au tuaine i roto i te putuputuanga.​—Angaanga 12:5; Kolosa 4:12.

12. Eaa te mea puapinga rava atu i roto i ta tatou pure?

¹² Eaa te mea puapinga roa atu i roto i ta tatou pure? Ko Iehova e tona anoano. E akameitaki tatou iaia ma te ngakau katoa no te au mea tana i rave no tatou. (1 Paraleipomeno 29:10-13) Kua kite tatou i teia no te mea ia Iesu i te enua nei, kua apii aia i tana au pipi akapeea me pure. (E tatau ia Mataio 6:9-13.) Apii aia kia pure na mua no te ingoa o te Atua kia akatapuia, kia akariroia ei mea tapu e te ngateitei. E oti kia pure no te Patireia o te Atua kia tae mai, e kia akatupuia to Iehova anoano i te enua nei. Me oti teia au mea puapinga, ka pure ei no to tatou uaorai anoano. Me tuku  tatou ia Iehova e tona anoano na mua, te akaari ra tatou eaa te mea puapinga rava atu kia tatou.

13. Eaa te roa me pure tatou?

¹³ Eaa te roa me pure tatou? Kare te Pipiria i akakite mai. Tei runga i to tatou turanga, me ka roa me ka poto. Penei ka poto ua me pure no te kai, e ka roa atu me te akameitaki ra tatou ia Iehova e me te akakite ra kiaia i to tatou au manamanata. (1 Samuela 1:12, 15)  Kare tatou e inangaro kia akaroa i te pure ei akareka ua i te tangata, mei ta tetai aronga rai i to Iesu tuatau. (Luka 20:46, 47) Kare a Iehova e mareka mai i tera tu pure. Te mea puapinga kia Iehova, kia pure tatou ma te ngakau tae.

14. Eaa te putuputu me pure tatou, e eaa ta teia e apii maira ia tatou no runga ia Iehova?

¹⁴ Eaa te putuputu me pure tatou? Pati mai a Iehova kia tuatua ua rai tatou kiaia. Akakite te Pipiria “e pure,” ua rai, kia “tamou marie tikai i te pure,” e “auraka e tukutuku i te pure.” (Mataio 26:41; Roma 12:12; 1 Tesalonia 5:17) Kua papa ua a Iehova i te akarongo mai. Akameitaki tatou Iaia i te au rā no tona aroa e te takinga meitaki. Pati i te kaveinga tau, te maroiroi, e te  akapumaana. Me te akaperepere ra tatou i teia tikaanga manea kia pure kia Iehova, ka tuatua ua rai tatou kiaia.

15. Eaa te tumu ka karanga ai tatou e “amene” me oti te pure?

¹⁵ Eaa te tumu ka karanga ai tatou e “amene” me oti te pure? Te kupu “amene,” tona aiteanga “koia mou tikai” me kore “koia ïa.” Roto i ta tatou pure te akaari ra tatou e kua tae tikai to tatou ngakau i te karanga e “koia ïa.” (Salamo 41:13) Apii mai te Pipiria e i te openga o te pure, e mea meitaki kia karanga e “amene,” ei akaari e te āriki ra koe i tei tuatuaia.​—1 Paraleipomeno 16:36; 1 Korinetia 14:16.

16. Ka pau mai ainei a Iehova i ta tatou pure? Akamārama mai.

¹⁶ Ka pau mai ainei a Iehova i ta tatou pure? Ae. Kapiki te Pipiria iaia e ko “Tei akarongo i te pure.” (Salamo 65:2) Ka akarongo mai a Iehova e ka pau mai i te pure a te mirioni ua atu, na roto i te au mataara tuke tuke.

17. E akapeea ana a Iehova me pau mai i ta tatou pure na roto i te au angera e tona au tavini i te enua nei?

¹⁷ Tetai taime ka pau mai a Iehova i ta tatou pure na roto i te au angera e tona au tavini i te enua nei. (Ebera 1:13, 14) Maata te aronga tei pure ana kia mārama i te Pipiria e i muri poto ua ake kua tae mai tetai Kite o Iehova i te atoro. Akaari mai te Pipiria e te ō maira te au angera i te akakite aere i te “evangelia” i te enua katoa. (E tatau ia Apokalupo 14:6.) Manganui tei pure ana kia Iehova no runga i tetai manamanata me kore i tetai turanga, e kua rauka te tauturu na roto i tetai taeake me kore i tetai tuaine Kerititiano.​—Maseli 12:25; Iakobo 2:16.

18. E akapeea ana a Iehova me pau mai i ta tatou pure na roto i te vaerua tapu e te Pipiria?

 ¹⁸ Pau mai a Iehova i ta tatou pure na roto i tona vaerua tapu, ei arataki e ei akamaroiroi ia tatou kia rauka te akakoromaki i te manamanata. (2 Korinetia 4:7) Taangaanga a Iehova i te Pipiria ei pau mai ta tatou pure e kia rauka ia tatou te rave i te au ikianga tau. Me tatau tatou i te Pipiria ka kite tatou i tetai au irava te ka tauturu ia tatou. Ka rauka ia Iehova te akakeu i tetai tangata i ko i te uipaanga kia tuatua mai i tetai mea ka anoanoia kia kite tatou, me kore i tetai tangata pakari o te putuputuanga, kia taiku mai i tetai mea i roto i te Pipiria kia tatou.​—Galatia 6:1.

19. No teaa tatou i tetai taime ka manako ei e kare a Iehova i pau mai ta tatou pure?

¹⁹ Penei ka manako tatou e, ‘Eaa ra a Iehova kare e pau mai taku pure?’ Kua kite aia e aea, e ka akapeea aia me pau mai. Kua kite katoa aia eaa te anoanoia ra kia rave tatou. Penei ka inangaroia tatou kia pure ua rai ei akaari e kua tae tikai to tatou ngakau, e e akarongo tikai to tatou i roto iaia. (Luka 11:5-10) Tetai taime e pau mai ana a Iehova na te mataara kare roa tatou i manako ana. Ei akaraanga, me te na roto ra tatou i tetai tu ngatā, penei kare aia e akaatea i tera turanga, ka oronga mai ra aia i te maroiroi kia rauka ia tatou te akakoromaki.​—E tatau ia Philipi 4:13.

20. Eaa te tumu ka pure putuputu ei tatou kia Iehova?

²⁰ E tikaanga ngateitei tikai to tatou kia pure kia Iehova! Kare e ekoko ka akarongo mai aia ia tatou. (Salamo 145:18) Te maata atu i ta tatou pure kia Iehova ma te ngakau tae, te matutu atu ïa to tatou pirianga oa kiaia.