1. Eaa te pure rongonui ta tatou ka uriuri?

MIRIONI ua atu tei kite i te pure rongonui, Te Pure a te Atu. Rave a Iesu i teia pure ei apii i tana au pipi akapeea me pure. Pure aia no teaa? Eaa teia pure i puapinga ai no tatou i teia tuatau?

2. Eaa te au mea puapinga e toru ta Iesu i apii kia pure tatou?

² Karanga a Iesu: “Na ko kotou kia pure: E to matou Metua i te ao ra, Kia tapu [kia akatapuia] toou ingoa. Kia tae toou basileia. Kia akonoia toou anoano i te enua nei, mei tei te ao katoa na.” (E tatau ia Mataio 6:9-13.) No teaa a Iesu i apii ei kia pure tatou no teia au mea e toru?​—Akara i te Au Manako Poto 20.

3. Eaa te ka anoanoia kia kite tatou no runga i te Patireia o te Atua?

³ Kua apii tatou e ko Iehova to te Atua ingoa e kua uriuri ana e eaa to te Atua anoano no te tangata e te enua. Eaa ra te aiteanga i ta Iesu tuatua: “Kia tae toou basileia”? Ka apii tatou eaa te Patireia o te Atua, ta te reira ka rave, peea te reira me akatapu i to te Atua ingoa.

4. Eaa te Patireia o te Atua, e koai te Ariki o taua Patireia?

⁴ Kua akanoo a Iehova i tetai kavamani i te rangi e kua iki ia Iesu ei Ariki no te reira. Kapiki te Pipiria i teia kavamani, ko te Patireia o te Atua. Ko Iesu “te  Ariki o te au ariki, e te Atu o te au atu.” (1 Timoteo 6:15) Maata atu te meitaki ta Iesu ka rave i ta tetai ua atu tutara. Maata atu tona mana i to te au tutara tangata katoatoa.

5. Ka tutara te Patireia o te Atua mei ea mai? Ka tutara mai te reira ki rungao i teaa?

⁵ E 40 rā i muri ake i tona tuakaouanga, oki a Iesu ki te rangi. I muri mai kua akamana a Iehova iaia ei Ariki no te Patireia. (Angaanga 2:33) Ka tutara mai te kavamani o te Atua i te enua mei te rangi mai. (Apokalupo 11:15) No reira te Pipiria i kapiki ei te Patireia o te Atua e ko te “basileia i te ao.”​—2 Timoteo 4:18.

6, 7. Eaa i riro ei ko Iesu te ariki meitaki roa atu i tetai ua atu ariki tangata ua nei?

⁶ Karanga te Pipiria e ko Iesu tei maata roa atu i tetai ua atu ariki tangata ua nei, no te mea “Tei iaia anake ra te mate kore.” (1 Timoteo 6:16) Ka mate te au tutara ravarai, kare ra a Iesu e mate. Ta Iesu au mea meitaki ka rave no tatou, ka vai rai e tuatau ua atu.

⁷ Totou te Pipiria e e Ariki tuatua tika a Iesu e te aroa: ‘Ka noo ua mairai te vaerua o Iehova ki runga iaia, te vaerua o te pakari e no te karape; te vaerua o te ako e no te mana; te vaerua no te kite, e no te mataku ia Iehova. E maata oki tona kite i te mataku ia Iehova; kare aia e akava ua i ta ona mata i akara ra, kare katoa e akatika ua [me kore e ako] i ta ona taringa ua i akarongo ra. I te tuatua-tika ra ka akava mai ei aia i te aronga ao ra.’ (Isaia 11:2-4) Kare ainei koe inangaro i te ariki mei teia te tu?

8. Akapeea tatou i kite ei e kare ko Iesu anake ua te ka tutara?

 ⁸ Kua iki te Atua i tetai au tangata kia tutara kapiti e Iesu i roto i tona kavamani i te rangi. Akakite a Paulo kia Timoteo: “Kia akakoromaki katoa tatou i te kino ra, e basileia katoa to tatou ki ona ra.” (2 Timoteo 2:12) Tokoia ka tutara kapiti e Iesu i te rangi?

9. Tokoia ka tutara kapiti e Iesu? I naea te Atua i akamata ai te iki ia ratou?

⁹ Kua apii tatou i te Pene 7 e i roto i te orama a te apotetoro ko Ioane, e Ariki a Iesu e tei te rangi aia e te 144,000 ariki ke mai. Koai teia 144,000? Akakite a Ioane e tei runga ia ratou “tona [to Iesu] ingoa e te ingoa o tona Metua i te tata angaia ki rungao i to ratou rae.” E “ko te aronga teia i aru i te Punua-mamoe [Iesu] i tona au aerenga ravarai. I okoia ïa aronga no roto i te tangata nei.” (E tatau ia Apokalupo 14:1, 4.) E au Kerititiano tiratiratu te 144,000 ta Iehova i iki ei au ariki, kia tutara mai ratou e Iesu i te enua. Me mate ratou ka akatu akaouia ratou ki te rangi. (Apokalupo 5:10) Akamata a Iehova i te iki i teia au Kerititiano tiratiratu mei te 33 T.N. mai, ei tuanga no teia pupu 144,000.

10. No teaa a Iehova i akamana ai ia Iesu e te 144,000 ei tutara no te tangata?

¹⁰ No to Iehova inangaro ia tatou, iki aia i tetai au tangata kia tutara e Iesu. E tutara meitaki a Iesu, kua mārama aia i to tatou tu. Kua kite aia mei teaa te tu kia riro ei tangata e kia takinokinoia. Tangi a Iesu ia tatou i na Paulo ei e kua “aroa mai ia tatou i to tatou au paruparu nei; i rokoia katoa oki aia i te au timataanga katoa, mei ia tatou katoa nei rai.” (Ebera 4:15; 5:8)  Kua kite katoa te 144,000 mei teaa te tu kia riro ei tangata, e mei teaa te ngatā o te tu apa ua e te maki. Papu roa e ka mārama a Iesu e te 144,000 i to tatou turanga e ta tatou e na roto nei.

11. Eaa te tumu i apii ei a Iesu i tana au pipi kia pure no to Iehova anoano i te rangi kia akatupuia?

¹¹ Apii a Iesu i tana au pipi kia pure no to Iehova anoano kia akatupuia i te rangi. Eaa te tumu? Roto i te Pene 3 kua patoi te Tiaporo a Satani ia Iehova. Kua akatika a Iehova iaia e tana au angera akarongo kore ko te au temoni, kia noo rai i te rangi no tetai tuatau poto. Kare te katoatoa i te rangi e rave ana i to Iehova anoano. Roto i te Pene 10, e maata ta tatou ka kite no runga ia Satani e te au temoni.

12. Eaa te nga mea puapinga e rua tei akatakaia mai i roto ia Apokalupo 12:10?

¹² Te akamārama maira te Pipiria e i muri ua ake i to Iesu akaterono angaia ei Ariki no te Patireia o te Atua, ka tamaki atu aia ia Satani. (E tatau ia Apokalupo 12:7-10.) E rua nga mea puapinga ta te irava 10 e akataka maira. Akamata te Patireia o te Atua i te tutara, e ko Iesu te Ariki. Uriia mai a Satani ki te enua nei. Ka kite tatou e kua tupu takere teia.

13. Eaa tei tupu i te rangi i te uriia mai anga a Satani kia vao?

¹³ Rekareka te au angera tiratiratu i te uriia mai anga a Satani e tana au temoni ki vao. Akakite te Pipiria: “Kia rekareka, e te au rangi e, e ko kotou katoa oki ko tei noo i reira.” (Apokalupo 12:12) Kua au ua to te rangi e te rotai no te mea te rave pouroa ra ratou i to te Atua anoano.

14. Eaa tei tupu i te enua nei no tei uriia mai a Satani ki vao?

 ¹⁴ Tuke roa te oraanga i te enua nei. Te tupu nei te kino ki te tangata no te mea “tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.” (Apokalupo 12:12) E riri tikai to Satani. Kua uriia mai aia ki vao mei runga i te rangi, e kua kite aia e kare e roa atu ka takoreia aia. Te akatupu nei aia i te manamanata e te taitaia i te enua nei e pini ua ake.

15. Eaa to te Atua anoano no te enua nei?

¹⁵ Inara kare i taui to te Atua anoano no te enua. Inangaro rai aia kia noo te aronga apa kore i te enua parataito e tuatau ua atu. (Salamo 37:29) Akapeea ra te Patireia o te Atua me akatupu i teia?

16, 17. Eaa ta Daniela 2:44 e akakite maira kia tatou no runga i te Patireia o te Atua?

¹⁶ Akakite te totou a Daniela 2:44: “E i te au rā o taua au ariki ra, e akatupu ei te Atua no te rangi i tetai basileia, te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.” Eaa ta teia e apii maira no runga i te Patireia o te Atua?

¹⁷ Mea mua, ka akamata te Patireia o te Atua i te tutara “i te au rā o taua au ariki ra.” Te aiteanga, te vai nei rai te au kavamani o te enua nei me akamata te Patireia i te tutara. Te rua, ka vai rai te Patireia o te Atua e tuatau ua atu e kare e kavamani ke e mono i te reira. Te toru, e tamakianga to rotopu i te Patireia o te Atua e te au kavamani o teianei ao. Ka upokotu te Patireia o te Atua e ko te reira anake ua te kavamani ka  tutara mai i te enua, e ko te kavamani meitaki rava atu teia no te tangata.

18. Eaa te ingoa o te tamaki openga i rotopu i te Patireia o te Atua e te au kavamani o teia ao?

¹⁸ Eaa te ka tupu i mua ua ake i te tamaki i rotopu i te au kavamani o teia ao e te Patireia o te Atua? I mua ake i te tamaki openga tei kapikiia e ko Aramagido, ka aere te au temoni ka pikikaa i te “ui ariki o te ao katoa nei e akaputuputu ia ratou i te tamaki i taua rā maata o te Atua mana katoatoa.” Ka tamaki atu te au kavamani o te tangata i te Patireia o te Atua.​—Apokalupo 16:14, 16; akara i te Au Manako Poto 10.

19, 20. No teaa tatou ka anoano ei i te Patireia o te Atua kia tutara mai i te enua?

¹⁹ Eaa tatou ka anoano ei te Patireia o te Atua? E toru tumu. Tai, e aronga ara tatou, te maki e te mate nei tatou. Akakite te Pipiria e i raro i te Patireia o te Atua, ka ora tatou e tuatau ua atu. Karanga a Ioane 3:16: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”

²⁰ Te rua, te noo nei tatou i rotopu i te au tangata kino, pikipikikaa, te a’ru e te akono kore. Kare e rauka ia tatou te takore ia ratou, ka rauka ra i te Atua. Ko tei rave tamou i te kino, ka takoreia me tae mai te tamaki Aramagido. (E tatau ia Salamo 37:10.) Te toru, e tangi kore tikai e te kino te au kavamani o te tangata e kare o ratou mana. Kare ratou e inangaro i te tauturu i te tangata kia akarongo i te Atua. Karanga te  Pipiria e “te tutara ra tetai tangata ki rungao i tetai, ei mate nona uaorai.”​—Koheleta 8:9.

21. Akapeea te Patireia i te akapapu anga e kia akatupuia te anoano o te Atua i te enua nei?

²¹ Me oti te tamaki Aramagido, ka akapapu te Patireia e kia akatupuia to te Atua anoano i te enua nei. Ka takore te reira ia Satani e tana au temoni. (Apokalupo 20:1-3) Kare e tangata e maki e kare e mate. Na roto i te oko, ka ora pouroa te aronga tiratiratu i roto i te Parataito e tuatau ua atu. (Apokalupo 22:1-3) Na te Patireia e akatapu i te ingoa o te Atua. Eaa te aiteanga i teia? Ka akakakā te au tangata ravarai i te ingoa o te Atua me tutara Tona kavamani i te enua nei.​—Akara i te Manako Poto 21.

22. Akapeea tatou i kite ei e kare a Iesu i riro mai ei Ariki iaia i runga nei te enua e i muri tika ake i tona tuakaouanga?

²² Kua apii a Iesu i tana au pipi kia pure: “Kia tae toou basileia.” Taka meitaki e ka tae mai te kavamani o te Atua a te tuatau ki mua. Na mua a Iehova i te akanoo i tona kavamani e te akariro ia Iesu ei Ariki.  Kua akariroia ainei a Iesu ei Ariki i tona oki anga ki te rangi? Kare, kua tiaki aia. Akapapu mai a Petero e Paulo i teia i to raua taiku anga ia Salamo 110:1 no runga ia Iesu, i tetai taime i muri ake i tona tuakaouanga. Akakite a Iehova: “Ka noo koe ki taku rima katau nei, E kia akariro au i to au enemi ei pange vaevae noou.” (Angaanga 2:32-35; Ebera 10:12, 13) Eaa te roa ka tiaki a Iesu i mua ake ka akariro ei a Iehova iaia ei Ariki?

23. (a) I naea a Iesu i akamata ai te tutara ei Ariki no te kavamani o te Atua? (e) Eaa ta tatou ka kite i roto i te pene ka aru mai?

²³ Mua ake i te 1914, kua mārama ke ana tetai pupu Kerititiano e e mataiti puapinga tera i roto i te totou Pipiria. Akapapu mai te au mea tei tupu i teia ao mei te 1914 mai e e tika rai ta ratou. Akamata a Iesu i te tutara ei Ariki i taua mataiti ra. (Salamo 110:2) Muri ua mai kua uriia mai a Satani ki te enua nei, e “e manga tuatau poto ua tona e toe nei.” (Apokalupo 12:12) Te pene ka aru mai, maata ta tatou ka kite ei akapapu e tei roto tatou i taua tuatau ra. Ka kite katoa tatou e kare e roa atu ka akatupu te Patireia i to te Atua anoano i te enua nei.​—Akara i te Manako Poto 22.