1-3. Eaa te au uianga ta te tangata e ui ana no runga i te mate, eaa te pauanga a tetai au akonoanga?

TAPUTOU mai te Pipiria e ka “kore rava te mate.” (Apokalupo 21:4) Roto i te Pene 5, kua apii tatou e ka rauka te ora mutu kore na roto i te oko. Inara te mate nei rai te tangata. (Koheleta 9:5) Tetai uianga puapinga e ui ana tatou, Teiea ra tei mate?

² E puapinga te pauanga ki tera uianga. Me mate tetai, e ui ana tatou e: ‘Eaa ra tei tupu kiaia? Te akara maira ainei aia ia tatou? Ka rauka ainei iaia te tauturu ia tatou? Ka kite akaou ainei tatou iaia?’

³ Tukeke te pauanga a te au akonoanga no teia au uianga. Apii tetai papaki e me e tangata meitaki koe ka aere koe ki te rangi, me e tangata kino koe ka uriia koe ki roto i te ai i ade. Karanga tetai aronga e ka riro koe ei vaerua e ka noo kapiti koe e toou kopu tangata i mate. Ta tetai pae, me akavaia koe i muri ake i toou matenga, ka anau akaouia mai koe, me kore ka ora akaou i roto i te kopapa ke ei tangata ke me kore ei manu.

4. Eaa te apiianga tumu ta te au akonoanga e apii ana no runga i te mate?

⁴ Tuketuke te apiianga a te au akonoanga. Te maataanga, aiteite ta ratou apiianga tumu, koia oki me mate tetai tangata ka ora ua atu rai tetai tuanga iaia. E tika ainei tera?

5, 6. Eaa te tupu ana kia tatou me mate?

⁵ Kua kite a Iehova eaa te ka tupu kia tatou me mate. Akakite mai aia, me mate tetai tangata kua ope rai tona oraanga. E tuke te mate mei te oraanga. Me mate tetai kare tona anoano e tona manakonakoanga e ora atu i tetai ngai. * Me mate tatou kare tatou e kite, kare e rongo, e kare e manako akaou.

⁶ Tata a Solomona e “kare ra a te aronga i mate ra e tuatua i kitea.” Kare tei mate e aroa, e makitakita e “kare oki e angaanga, kare e kimianga, kare oki e kite, kare oki e pakari, i roto i te vaarua.” (E tatau ia Koheleta 9:5, 6, 10.) Akakite te Salamo 146:4 e me mate tetai kua “kore rava atura tana i akakoro.”

7. Eaa ta Iesu i akakite no runga i te mate?

⁷ Te mate anga tona oa a Lazaro, akakite a Iesu ki tana au pipi: “Kua moe to tatou oa ko Lazaro.” Kare te aiteanga e te akangaroi ra a Lazaro. Akakite akaou aia e: “Kua mate takiri a Lazaro.” (Ioane 11:11-14) Kua akaaite a Iesu i te mate ki te moe. Kare aia i karanga ana e tei te rangi a Lazaro e tei ko i tona au tupuna i mate. E kare aia i karanga ana e te mamae ra a Lazaro i ade e kua anau akaouia mai aia ei tangata ke me kore ei manu. Mari ra te moe tinainai ra a Lazaro. Akaaite katoa tetai au irava ke i te mate ki te moe tinainai. Karanga te Pipiria e i te tamate angaia a Setephano kua “moe atura aia.” (Angaanga 7:60) Tata katoa a Paulo  e kua “moe atura” tetai au Kerititiano.​—1 Korinetia 15:6.

8. Akapeea tatou i kite ei e kare te Atua i anga mai i te tangata kia mate?

⁸ I anga ainei a Iehova ia Adamu e Eva kia mate? Kare! Anga aia ia raua kia ora e tuatau ua atu. Tuku a Iehova i te inangaro kia ora e tuatau ua atu ki roto i te ngakau o te tangata. (Koheleta 3:11) Kare te au metua e inangaro kia ruaine ta ratou tamariki e kia mate. Pera rai a Iehova. No teaa ra te tangata i mate ei i na i anga a Iehova ia tatou kia ora e mutu kore ua atu?

9. Eaa i tau ei te akauenga ta Iehova i oronga kia Adamu e Eva?

⁹ I te kainga i Edene, akakite a Iehova kia Adamu: “E kai ua koe i to te au rakau katoa o te kainga nei: Kareka i to te rakau e kite ei i te meitaki e te kino, auraka koe e kai i to reira; i te rā e kai ei koe i to reira, ka mate ïa koe.” (Genese 2:9, 16, 17) Kare i te mea ngatā te akono i tera akauenga taka meitaki. E tikaanga to Iehova kia akakite kia Adamu e Eva eaa te mea meitaki e eaa te mea kino. Me akarongo raua, te akangateitei ra raua i tona tikaanga. Te akaari katoa ra raua i to raua rekareka no te au mea ravarai tana i rave no raua.

10, 11. (a) I akapeea a Satani i te akavare anga ia Adamu e Eva? (e) Eaa te tumu i kore ei e kotoeanga no ta Adamu e Eva i rave?

¹⁰ Kua iki raua kia akarongo kore ia Iehova. Ui a Satani kia Eva: “Koia ïa, kua tuatua mai te Atua e, Auraka korua e kai i to te au rakau katoa o te kainga nei?” Akakite a Eva: “E kai maua i to te au rakau o te kainga nei; Mari ra o to taua rakau i rotopu i te kainga nei, kua tuatua mai ïa te Atua e, Auraka korua e kai i to reira, auraka oki korua e arapaki atu, ka mate aea korua.”​—Genese 3:1-3.

¹¹ Karanga atura a Satani: “Kare rava korua e mate: Kua kite oki te Atua e, i te rā e kai ei korua i to reira, ka puera ïa to korua mata, e ka riro korua mei te Atua ra te tu, i te kite i te meitaki e te kino.” (Genese 3:4-6) Inangaro aia kia manako a Eva e tei iaia rai te tika kia iki eaa te mea meitaki e eaa te mea kino. Pikikaa atu aia e kare a Eva e mate. Kai iora a Eva i te ua rakau e kua oronga i tetai ki tana tane. Kua akakite a Iehova e auraka raua e kai i te ua rakau. Kua iki rai raua kia kai  e kia kore e akarongo i teia akauenga tau ua e te taka meitaki. Te akaari ra raua e kare raua e akangateitei ana i to raua Metua i te rangi. Kare roa e kotoeanga no ta raua i rave!

12. Eaa ra te tu akarongo kore o Adamu e Eva ia Iehova i riro ei, ei mea taitaia?

¹² E mea taitaia tikai e kare to tatou nga metua mua i akangateitei i Tei Anga ia raua! Eaa ra toou manako me tauta pakari koe i te utuutu i taau tamariki e oti patoitoi ratou ia koe e kua rave i taau tikai i akakite e auraka e rave? Kare ainei toou ngakau e mamae?

13. Eaa te aiteanga o ta Iehova i tuatua e “ka riro akaou rai koe ei one-pueu”?

¹³ Te akarongo kore anga a Adamu e Eva, ngere rai raua i te ora mutukore. Akakite a Iehova kia Adamu: “E one-pueu oki koe, e ka riro akaou rai koe ei one-pueu.” (E tatau ia Genese 3:19.) Te aiteanga ka oki aia ki te turanga i mua ake ka angaia ai aia, e one pueu. (Genese 2:7) Muri ake i tona ara anga kua mate aia, kare ona ora akaou.

14. Eaa te tumu e mate ei tatou?

¹⁴ Naringa raua i akarongo ia Iehova, te ora nei rai raua. Kua ara raua no te akarongo kore e i te openga kua mate. Mei te maki piri rai te ara tei ïri mai ki runga ia tatou mei to  tatou nga metua mua. Anau araia mai tatou, no reira tatou ka mate ei. (Roma 5:12) Kare ko tera to Iehova akakoroanga no te tangata. Kare roa aia i inangaro ana i te tangata kia mate. E “enemi” te mate i na te Pipiria ai.​—1 Korinetia 15:26.

15. Akapeea te tika no runga i te mate i te akamatara mai anga ia tatou?

¹⁵ Ka matara tatou mei te apiianga pikikaa me kite tatou i te tika no runga i te mate. Apii te Pipiria e kare tei mate e kite i te mamae e te taitaia. Kare e rauka kia tuatua ki tei mate e kia tauturu ia ratou e kare katoa ratou kia tatou. Kare e rauka ia ratou te takino ia tatou e kare tatou e mataku ia ratou. Apii te au akonoanga e te ora ra tei mate i tetai ngai, e ka rauka ia tatou te tauturu ia ratou me tutaki i te orometua me kore i tetai arataki akonoanga. Me kite ra tatou i te tika, kare tatou e vare i teia au pikikaa.

16. Eaa te pikikaa ta te manganui o te au akonoanga e apii nei no runga i tei mate?

¹⁶ Te akariro nei a Satani i te akonoanga pikikaa ei akavare ia tatou kia irinaki e te ora nei rai tei mate. Apii tetai papaki e me mate tatou ka ora atu rai tatou i tetai ngai. Ko tera ainei ta taau akonoanga e apii ra ia koe, me ko ta te Pipiria e apii ra no runga i tei mate? Te akariro nei a Satani i te pikikaa ei akauri ke i te tangata mei ia Iehova.

17. Eaa ra te apiianga no te taʼu i te tangata i roto i te ai i ade, i riro ei ei akakino ia Iehova?

¹⁷ Ta te au akonoanga e apii nei, e pikikaa. Apii ratou e ka taʼuia te tangata i roto i te ai i ade e tuatau  ua atu. E akakino tikai tera ia Iehova. Kare roa aia e akapera i te tangata! (E tatau ia 1 Ioane 4:8.) Eaa ra toou manako me tutungi tetai tangata i te rima o tana tamaiti ei akautunga iaia? Ka manako koe e e tangata kino tikai aia. Kare koe inangaro kia kite iaia. Ko tera tikai ta Satani i inangaro kia manako tatou no runga ia Iehova!

18. Eaa te tumu ka kore ei tatou e mataku i tei mate?

¹⁸ Apii tetai au akonoanga e me mate te tangata, ka riro ratou ei au vaerua. Kia akangateitei e kia mataku tatou ia ratou no te mea, penei ka riro mai ratou ei au oa no tatou me kore ei enemi. Manganui tei irinaki i taua pikikaa ra. Kua mataku ratou e kua morimori i tei mate, kare i akamori ia Iehova. E akamaara e kare tei mate e kite e kare e nakiro i tetai ua atu mea, no reira kare e tumu tau no tatou kia mataku. Na Iehova i anga ia tatou. Koia te Atua mou e koia ta tatou ka akamori.​—Apokalupo 4:11.

19. Peea te kite anga i te tika no runga i te mate i te tauturu anga ia tatou?

¹⁹ Me kite tatou i te tika no runga i te mate, ka matara mai tatou mei te apiianga pikikaa a te au akonoanga. Ka mārama tatou i ta Iehova au taputou no te oraanga e no te tuatau ki mua.

20. Eaa ta tatou ka kite i roto i te pene ka aru mai?

²⁰ Kua ui a Iobu e: “Kia mate te tangata nei, ka ora akaou ainei aia?” (Iobu 14:14) Ka rauka ainei i tetai tangata kua mate kia ora akaou mai? Te pauanga ta Iehova e akakite maira kia tatou i roto i te Pipiria, e mea umere tikai. Ka kite tatou eaa te tumu i roto i te pene ka aru mai.