1, 2. Eaa te uianga ka anoanoia koe kia ui kia koe uaorai, e no teaa teia i puapinga ai?

NA ROTO i taau apii Pipiria, kua kite koe e e maata te aronga tei karanga e te akamori ra ratou i te Atua, inara te apii ra e te rave ra i te au mea Tana i kopae. (2 Korinetia 6:17) No reira Aia i akaue mai ei ia tatou kia akaatea mai mei roto ia “Babulonia Maata,” te akamorianga pikikaa. (Apokalupo 18:2, 4) Eaa ra taau ka rave? E tikaanga to tatou pouroa kia iki, e ui kia koe uaorai, ‘Ka inangaro ainei au te akamori i te Atua na te mataara tana i inangaro, me i taku i matau?’

² Me kua akaatea mai koe e kua akaruke i te akonoanga pikikaa, e mea meitaki tera. Inara i roto i toou ngakau penei te vai rai tetai au mea e te au peu a te akonoanga pikikaa e reka ra koe. Ka akara ana tatou i etai o taua au mea ra, kia kite tatou e eaa i puapinga ai kia aru i to Iehova aerenga manako.

3. (a) No teaa ka ngatā ai i tetai aronga kia takore i te itoro i roto i ta ratou akamorianga? (e) Eaa to te Pipiria manako no runga i te akamori i te itoro?

³ I taangaanga ana tetai aronga i te au mea mei te tiki ei itoro me kore, maani ratou i tetai ngai i roto to ratou are ei akamori i te Atua. Me ko koe tetai e pera ra, penei ka manako koe e e tarevake kia kore e taangaanga i te itoro me akamori i te Atua. Inara te apii maira a Iehova ia tatou akapeea me akamori Iaia. Akakite  taka mai te Pipiria e kare a Iehova e inangaro kia akamori tatou i te itoro.​—E tatau ia Exodo 20:4, 5; Salamo 115:4-8; Isaia 42:8; 1 Ioane 5:21.

4. (a) Eaa te tumu kare tatou e akamareka i to tatou ui tupuna? (e) Eaa te tumu i akakite ei a Iehova ki tona iti tangata auraka e tuatua ki tei mate?

⁴ Pou te taime e te maroiroi o te tangata i te akamareka i to ratou ui tupuna i mate. Ka akamanea ratou i te menema o to ratou tupuna i te manako anga e ka mareka mai ratou. Penei ka akamori tetai pae i to ratou ui tupuna. Inara kua apii tatou e kare e rauka i tei mate kia tauturu e kia takino ia tatou. Kare ratou e ora ra i tetai ngai. E mea kino te tuatua kia ratou no te mea na te au temoni te karere e manakoia ra e na tei mate. No reira a Iehova i akaue ei to Iseraela auraka e tuatua ki tei mate, auraka e piri ki te au peu purepure.​—Deuteronomi 18:10-12; akara i te Au Manako Poto 26 e te 31.

5. Eaa te ka tauturu ia koe kia akamutu i te akamori i te itoro ei Atua, e kia akamutu i te akamareka i toou ui tupuna i mate?

⁵ Eaa te ka tauturu ia koe kia akamutu i te akamori i te tiki ei itoro e i toou ui tupuna i mate? Kia tatau koe i te Pipiria, kimi marie eaa to Iehova manako i teia peu. E mea “viivii” tikai teia kiaia. (Deuteronomi 27:15) Pure i te au rā kia rauka ia koe te aru i to Iehova aerenga manako e kia akamori iaia na te mataara tana i inangaro. (Isaia 55:9) Ka oronga mai Aia i te maroiroi kia rauka ia koe te takore i tetai ua atu apinga i roto i toou oraanga te ka ō mai te akamorianga pikikaa.

6. Eaa te tumu i ikiia ai te rā 25 o Titema ei akamaaraanga i te rā anauanga o Iesu?

⁶ E Keritimiti tetai orote matauia i teia ao. Manako  te manganui, e akamaaraanga teia i te rā anau o Iesu. Inara e pirianga to te Keritimiti ki te akamorianga pikikaa. Akakite tetai puka, i te rā 25 o Titema e akamaara ana to Roma i te anauanga o te rā. Inangaro te au orometua i te aronga kare e irinaki i te Atua, kia aru ia ratou. Akariro ratou i te rā 25 o Titema ei rā anau no Iesu noatu kare aia i anauia i tera rā. (Luka 2:8-12) Kare ta Iesu au pipi i akamaara ana i te Keritimiti. Akakite tetai puka, e 200 mataiti i muri ake i to Iesu anauanga, “kare rai e tangata i kite i te rā tikai i anau ei a Iesu, e iti ua tei inangaro kia kite.” (Sacred Origins of Profound Things) Akamata te akamaaraanga o te Keritimiti mei te 300 mataiti i muri ake i to Iesu tuatau i te enua nei.

7. Eaa te tumu kare te au Kerititiano mou e akamaara i te Keritimiti?

⁷ E maata tei kite e na te akonoanga pikikaa teia au peu Keritimiti mei te tamataora e te oronga apinga aroa. I Peritane e tetai au ngai i Marike, kua araiia ana te akamaaraanga i te Keritimiti no te mea e peu akonoanga pikikaa. E akautungaia ana te tangata no te reira. Muri mai, akamata akaouia te peu Keritimiti. Eaa te tumu kare te au Kerititiano mou e akamaara i te Keritimiti? No te mea kua inangaro ratou i te akamareka i te Atua i te au mea ravarai.

8, 9. Eaa te tumu te au Kerititiano o mua ana i kore ei e akamaara i te au rā anauanga?

⁸ Tetai mea matauia e te tangata i te akamaara, ko to ratou rā anauanga. Ka akamaara ainei te au Kerititiano i te rā anauanga? Ko te rā anauanga ua rai i taikuia i roto i te Pipiria, no te aronga kare e akamori ana ia Iehova. (Genese 40:20; Mareko 6:21) E akamaaraia ana  te rā anauanga ei akangateitei i te au atua pikikaa. No reira te au Kerititiano o mua ana i “irinaki ei e, e peu akonoanga pikikaa te reira.”​—The World Book Encyclopedia.

⁹ Irinaki to Roma e to Ereni i mua ana e ko te au tangata ka anauia, e vaerua tetai i reira ei paruru iaia no tona oraanga katoa. “E pirianga to taua vaerua ra ki te atua nona te rā anauanga i anauia mai ei tera tangata,” i akakite ei te puka The Lore of Birthdays.

10. Eaa te tumu kare te au Kerititiano o teia tuatau e akamaara i te au rā anauanga?

¹⁰ Toou manako e te mareka maira a Iehova i te au akamaaraanga e ō maira te akonoanga pikikaa? (Isaia 65:11, 12) Kare. Ko te tumu tera kare tatou e akamaara i te au rā anauanga e te au orote e ō maira te akonoanga pikikaa.

11. Eaa tetai aronga e akamaara ai i te au orote? Eaa ra te mea puapinga roa atu kia koe?

¹¹ Kua kite tetai aronga e e peu akonoanga pikikaa te Keritimiti e tetai au orote, inara te akamaara nei rai ratou i te reira. E taime tau teia i na ratou ei i te akapou ki te ngutuare tangata. Mei tera ainei toou manako? Kare e tarevake i te akapou i tetai taime ki toou ngutuare tangata. Na Iehova i akatumu i te ngutuare tangata, inangaro aia kia mataora to tatou pirianga kia ratou. (Ephesia 3:14, 15) E puapinga atu ra kia akamou i tetai pirianga meitaki kia Iehova, i to te akamaara i te au orote a te akonoanga pikikaa ei akamareka i te ngutuare tangata. Akakite a Paulo: “Kia kitea ia kotou te mea mareka na te Atu.”​—Ephesia 5:10.

12. Eaa te mea e kore ei a Iehova e āriki i tetai orote?

 ¹² Manako tetai aronga e kare e kino ana e i akamataia mai te orote kiea, e tuke ra to Iehova manako. Kare aia e āriki i te au orote a te akonoanga pikikaa, te au orote akaepaepa i te tangata e te au apinga akaepaepa enua mei te reva e te vai atura. Ei akaraanga, e maata te au atua itoro e akamaara ana to Aiphiti. Te ora mai anga mei Aiphiti, rave to Iseraela i tetai akamaaraanga no te akamorianga pikikaa ta ratou i kapiki e ko te “rā oroa apopo no Iehova.” Kua akautungaia ratou e Iehova. (Exodo 32:2-10) Mei ta Isaia i akakite, “auraka [tatou] e arapaki ua atu i tetai mea viivii.”​—E tatau ia Isaia 52:11.

13. Eaa te au uianga taau ka ui me akamutu koe i te akamaara i te au rā orote?

¹³ Me akamutu koe i te akamaara i te au orote, ka inangaro koe kia kite e ka akapeea koe. Akaraanga: Me ui mai toku au oa angaanga e, no teaa au kare e akamaara i te Keritimiti? Ka akapeea ra au me oronga mai te tangata i tetai apinga aroa Keritimiti? Me inangaro toku tokorua kia piri au ki te akamaaraanga i tetai rā orote? Me tauturu i taku tamariki kia kore e taitaia no te mea kare ratou e akamaara i te orote e to ratou rā anau?

14, 15. Eaa taau ka rave me karanga mai tetai tangata e meri Keritimiti, e me oake mai i tetai apinga aroa?

¹⁴ E mea puapinga kia akamanako meitaki eaa taau ka tuatua e taau ka rave me tupu teia. Ei akaraanga, me karanga mai te tangata e meri Keritimiti, eiaa e kopae ia ratou. E karanga ua ra e “meitaki maata.” Me ka inangaro  ratou kia kite e no teaa ra, i reira koe ka akamārama atu ei i te tumu kare koe akamaara ana i te rā orote. Inara, kia maru, kia tau ma te tu akangateitei. Te karanga ra te Pipiria: “Ei tuatua aroa ua anake ta kotou, kia rapakauia i te tai, i te kite anga i te mea tika kia tuatua atu ki te tangata katoa ra.” (Kolosa 4:6) Penei e akamārama e e mataora ana koe i te akapou i tetai taime ki etai ke e te oronga apinga aroa, eiaa ra me te ō maira teia au tu orote.

¹⁵ Ka akapeea koe me oake mai te tangata i tetai apinga aroa naau? Kare a te Pipiria ture no te reira. Te akakite maira ra e, kia vai mā ua to tatou akava ngakau. (1 Timoteo 1:18, 19) Penei kare te tangata nana te apinga aroa i kite e kare koe akamaara ana i te rā orote. Penei ka karanga mai e, “Kua kite au e kare koe akamaara ana i te rā orote, ka inangaro rai au te oake atu i teia naau.” Tei ia koe me ka āriki e me kare. Noatu eaa taau ka iki, e akapapu e kia vai mā ua toou akava ngakau. Kare tatou e inangaro kia rave i tetai mea te ka takino i to tatou pirianga kia Iehova.

16. Ka akapeea koe me inangaro toou ngutuare tangata i te akamaara i tetai rā orote?

¹⁶ Ka akapeea koe me inangaro toou ngutuare tangata i te akamaara i tetai rā orote? Eiaa e taumāro atu. E tikaanga to ratou kia iki i ta ratou ka inangaro. Kia marū, akangateitei i to ratou anoano, mei ia koe e inangaro ra kia pera mai ratou ia koe. (E tatau ia Mataio 7:12.) Me inangaro ratou kia akapou koe tetai taime kia ratou i te tuatau orote, ka akapeea koe? Mua ake ka iki ei taau ka rave, pure kia tauturu mai a Iehova ia  koe. Akamanako marie e oti kimikimi no runga i te reira. Ka inangaro koe kia akamareka ua rai ia Iehova.

17. Eaa taau ka rave kia kore taau tamariki e manako e te akangereia ra ratou me akamaara tetai aronga i te au rā orote?

¹⁷ Eaa taau ka rave no taau tamariki me kite ratou i tetai aronga e akamaara ra i te au rā orote? Mei tera taime ki tera taime, rave i tetai angaanga mataora, akapapa i tetai apinga aroa na ratou. Te apinga aroa akaperepere roa atu, ko toou taime e toou aroa.

18. Eaa te tumu ka aere ei tatou ki te au uipaanga Kerititiano?

¹⁸ Ei akamareka ia Iehova, e akaruke tatou i te akonoanga pikikaa e tana au peu e te au rā orote. Kia rave tamou i te akamorianga mou. Akapeea? Tetai mataara, kia tae ua rai ki te uipaanga Kerititiano. (E tatau ia Ebera 10:24, 25.) E tuanga puapinga te uipaanga no te akamorianga mou. (Salamo 22:22; 122:1) I ko i te uipaanga, ka rauka i te akamaroiroi i tetai e tetai.​—Roma 1:12.

19. Eaa te tumu i puapinga ai kia akakite i te tuatua mou o te Pipiria ki etai ke?

¹⁹ Tetai tuanga no te akamorianga mou, kia tuatua ki etai ke no runga i te Pipiria. E manganui te taitaia ra no te au mea kino e tupu nei i teia ao. Penei kua kite koe i tetai aronga mei tera rai. Akakite kia ratou i toou manakonakoanga no te tuatau ki mua. Ia koe e aere ra ki te au uipaanga e te akakite i te tuatua mou o te Pipiria ki etai ke, kare koe inangaro kia piri akaou ki te akonoanga pikikaa e tana au peu. E mea papu e ka mataora koe, e ka akameitaki mai a Iehova i taau ikianga kia akamori iaia na te mataara tika.​—Malaki 3:10.