1, 2. Eaa te au uianga e ui ua ana te tangata?

E MAATA te uianga a te tamariki e ui ana. Me akamārama atu koe i tetai mea, ka ui mai ratou e, ‘No teaa ra?’ Me pau atu koe ka ui mai rai ratou e, ‘No teaa ra?’

² Noatu e tamariki tatou e me kare, e uianga ta tatou pouroa. Penei ka ui tatou eaa te ka kai, te ka aao me kore te ka oko e penei no runga i tetai au mea puapinga o te oraanga e no te tuatau ki mua. Me kare tatou e kite i te pauanga, penei ka akamutu tatou i te kimi atu rai.

3. Eaa te tangata i manako ei e kare ratou e kite i te pauanga ki ta ratou uianga?

³ E pauanga ainei ta te Pipiria no ta tatou au uianga? Manako tetai aronga e ae, karanga ratou e e ngatā kia mārama i te Pipiria. Penei manako ratou e ko te au puapii ua e te au orometua tei kite i te pauanga. Akamā tetai papaki i te akakite e kare ratou i kite i te pauanga. Eaa ra toou manako?

4, 5. Eaa tetai au uianga puapinga e ui ana koe? No teaa koe ka kimi ei te pauanga?

⁴ Penei ka inangaro koe i te pauanga no te au uianga mei teia: Eaa te akakoroanga o te oraanga? Eaa te ka tupu kiaku me mate au? Mei teaa ra to te Atua tu? Akakite a Iesu: ‘E pati, e orongaia mai ta kotou; e kimi, e kitea ïa ia kotou; e topāpā, e kiritiia mai te pa  ia kotou.’ (Mataio 7:7) Eiaa e akaoti, kia kite roa koe i te pauanga ka rauka i te irinaki.

⁵ Ae, me “kimi pu tikai” koe, ka kitea te pauanga i roto i te Pipiria. (Maseli 2:1-5) Kare e ngatā kia mārama i te pauanga. Taau ka kite, ka akatupu i te mataora i teianei, e te manakonakoanga a te tuatau ki mua. Ka tuatua ana tatou no runga i tetai uianga e ekoko ana te tangata.

6. Eaa te manganui i manako ei e kare te Atua e manako mai ana i to ratou turanga taitaia?

⁶ Manako te manganui e kare te Atua e manako mai ana ia tatou. Naringa te manako maira aia ka tuke te tu o te oraanga. Te tupu nei te tamaki, te makitakita e te taitaia i teia ao. Te maki, te mamae ngakau e te mate. ‘Me te manako maira te Atua ia tatou, kore aia e takore i teia au mea e tupu nei?’

7. (a) Peea te au arataki akonoanga i te akavare anga i te tangata e e kino te Atua? (e) Eaa tatou i papu ei e kare na te Atua e akatupu ana i te au mea kino?

⁷ E akavare ana te au arataki akonoanga i te tangata kia irinaki e e kino te Atua. Me tupu tetai mea kino, karanga ratou e ko te anoano tera o te Atua e ko tana tera i inangaro kia tupu. Te akaapa ra ratou i te Atua. Te apii maira te Pipiria e kare rava te Atua e vavare i te kino. Akakite a Iakobo 1:13 e: “Eiaa rava e tangata pikikaaia e karanga e, Kua pikikaaia au e te Atua: kare rava te Atua e vavare i te kino, kare rava oki aia e pikikaa i te tangata.” Te aiteanga, noatu kare te Atua i takore i te au mea kino kia kore e tupu, kare  ra nana e akatupu ana i te reira. Kare aia e timata ia tatou ki te au mea kino.​—E tatau ia Iobu 34:10-12.

8, 9. No teaa ra kare ei e tau kia akaapa i te Atua no to tatou au manamanata? Oronga mai tetai akaraanga.

⁸ Tetai akaraanga. Akamanako ana i tetai mapu tane e noo ra i te kainga e tona nga metua. E tamaiti inangaroia e tona papa, tei apii iaia kia rave i te au ikianga tau. Akarongo kore aia i tona papa e kua akaatea mei te kainga. Rave aia i te kino e kua ō ki roto i te manamanata. Ka akaapa ainei koe i te papa no tei kore i tāpu mai i tana tamaiti? Kare! (Luka 15:11-13) Mei tera rai te Atua, kare aia e tāpu ana i te tangata me iki ratou kia akarongo kore iaia i te rave i te kino. Me tupu tetai mea kino, e akamaara e kare na te Atua i akatupu. Kare e tau kia akaapa i te Atua.

⁹ E tumu tau tetai i kore ei te Atua i takore i te au mea kino. Roto i te Pene 11, ka kite koe i ta te Pipiria e akakite ra no teia. E aroa maata to te Atua ia tatou, kare nana i akatupu i to tatou manamanata. Koia anake ua rai te ka rauka i te takore i te reira.​—Isaia 33:2.

10. Eaa i papu ei ia tatou e ka takore te Atua i te au kino pouroa ta te tangata i akatupu?

¹⁰ E Atua tapu a Iehova. (Isaia 6:3) Te au mea ravarai tana e rave ana e mea viivii kore, mā e te meitaki. Ka rauka ia tatou te irinaki Iaia. Kare te tangata i aite kiaia, e tarevake ana ratou. Noatu me e tutara tuatua tika tetai, kare ona mana kia takore i te au kino ravarai ta te aronga kino i akatupu. Ka rauka ra i te Atua, e ka takore aia i te au tu kino pouroa e tuatau ua atu.​—E tatau ia Salamo 37:9-11.

11. Eaa ra to te Atua manako me taitaia koe?

¹¹ Eaa to te Atua manako i te au mea e tupu nei i teia ao e i roto i toou oraanga? Apii te Pipiria e e mea ‘inangaro na Iehova te tuatua-tau,’ koia oki te tu tika. (Salamo 37:28) Inangaro aia kia kite tatou eaa te mea tika, eaa te mea tarevake. Mareka kore aia me taitaia tatou. Karanga te Pipiria e “ongoongo rava akera tona ngakau” no te mea kua kī roa te enua i te kino i mua ana. (Genese 6:5, 6) Kare te Atua i taui. (Malaki 3:6) Akakite te Pipiria e te manako maira Aia ia koe.​—E tatau ia 1 Petero 5:7.

12, 13. (a) Eaa tatou i aroa ai e i manako ei i etai ke, eaa ra to tatou manako no runga i te turanga taitaia i teia ao? (e) Eaa i papu ei ia tatou e ka takore te Atua i te au turanga taitaia e te tau kore?

¹² Karanga katoa te Pipiria e i anga te Atua ia tatou i tona uaorai tu. (Genese 1:26) Kua aite to tatou au tu mei tona. Me te kinokino ra koe i te kite i te aronga meitaki ua e taitaia ra, papu e e maata atu to te Atua mamae ngakau i teia tu! Akapeea tatou i kite ei?

¹³ Apii mai te Pipiria ia tatou e “ko te Atua oki te aroa.” (1 Ioane 4:8) Te au mea ravarai Tana i rave, rave aia no tona aroa. Aroa tatou no to te Atua aroa. Akamanako ana: Me e mana toou, ka takore ainei koe i te au turanga taitaia e te tau kore i teia ao? Ae ka takore koe no toou inangaro i te tangata. Akapeea te Atua? E mana tona e ka takore aia i te au turanga taitaia e te tau kore, no tona aroa ia tatou. Papu e ka tupu Tana au taputou i taikuia i te akamataanga o teia puka! E rauka ai te irinaki i te reira, ka  anoanoia kia maata atu taau ka kite no runga i te Atua.

14. Koai to te Atua ingoa, peea tatou i kite ei e ka inangaroia kia kapiki tatou i tona ingoa?

¹⁴ Me inangaro koe kia riro ei oa no tetai tangata, eaa taau mea mua ka akakite kiaia? Toou ingoa. E ingoa ainei to te Atua? Karanga tetai au akonoanga e ko te Atua, ko te Atu. E taoonga ua tera mei te “ariki” e te “peretiteni.” Akakite mai te Atua e ko Iehova tona ingoa. Karanga te Salamo 83:18 e: “Kia kite ratou e, ko Iehova toou ingoa, e ko koe anake Tei Teitei i te enua katoa nei.” Tauatini ua atu taime i taiku ei te au tata Pipiria i te ingoa o te Atua. Inangaro a Iehova kia kite koe i tona ingoa e kia kapiki i te reira. Akakite mai aia i tona ingoa no tona inangaro kia riro koe ei oa nona.

15. Eaa te aiteanga o te ingoa, Iehova?

¹⁵ E aiteanga puapinga to te ingoa o te Atua ko Iehova. Ka rauka iaia te akatupu i tetai ua atu o tana taputou e tona akakoroanga.  Kare e rauka kia tāpu iaia. No Iehova anake ua teia ingoa. *

16, 17. Eaa te aiteanga o te (a) “mana katoatoa”? (e) “te Ariki au mutu kore”? (ng) “Tei Anga”?

¹⁶ Akakite te Salamo 83:18: “Ko koe anake Tei Teitei.” Karanga katoa a Apokalupo 15:3: “E angaanga maata e te taka ke taau, e te Atu ra, e te Atua mana  katoatoa; e aerenga tika e te tuatua-mou taau, e te Ariki o te aronga tapu.” Eaa te aiteanga o te “mana katoatoa”? Te aiteanga, no Iehova anake te mana ririnui roa atu i te ao katoa. Te taoonga “Ariki au mutu kore,” te aiteanga mei ito roa mai Aia. Akataka mai te Salamo 90:2 e, mei tupua roa mai Aia e tuatau ua atu. Kare ainei tera i te mea umere!

¹⁷ Ko Tei Anga i te au mea ravarai, ko Iehova anake ua. Akakite a Apokalupo 4:11 e: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.” Ae mei te au angera i te rangi ki te au etu, ki te au tumu rakau e te ika o te moana​—na Iehova anake i anga!

18. Eaa tetai aronga i manako ei e kare ratou e tau kia riro ei oa no Iehova? Eaa ta te Pipiria e akakite maira?

¹⁸ Mataku te tangata me tatau no runga i to Iehova au tu. ‘E Atua mana ririnui roa a Iehova e te ngateitei, tei te atea ke ua aia, eaa i reira aia ka maara mai ei iaku?’ Ko ta Iehova ainei teia i inangaro kia manako koe? Kare. Inangaro Aia i te akavaitata mai kia koe. Akakite te Pipiria e “kare ra aia i atea ke atu ia tatou.” (Angaanga 17:27) Inangaro a Iehova ia tatou kia akavaitata kiaia e te taputou maira aia e “nana e akavaitata mai kia kotou.”​—Iakobo 4:8.

19. (a) Akapeea koe e riro ei ei oa no te Atua? (e) Ko teea i to Iehova au tu taau mea reka roa atu?

¹⁹ Akapeea koe e riro ei ei oa no te Atua? Akakite a Iesu: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) E apii atu rai kia kite koe ia Iehova e Iesu. I reira e rauka ai ia koe te ora mutu kore. Kua apii tatou e “ko te Atua te aroa.” (1 Ioane 4:16) Inara e maata tona au tu meitaki. Akakite te Pipiria e e “Atua takinga-meitaki [Iehova], e te aroa ua, e te akakoromaki maata, e te meitaki maata, e te tuatua-mou.” (Exodo 34:6) ‘Kua tika ia Iehova kia akakore mai i te ara.’ (Salamo 86:5) E tu akakoromaki to te Atua e te tiratiratu. (2 Petero 3:9; Salamo 18:25) Maata atu taau ka kite no runga i tona au tu meitaki ia koe tatau ra i te Pipiria.

20-22. (a) Peea e rauka ai ia tatou kia akapiri atu kia Iehova? (e) Eaa taau ka rave me inangaro tetai aronga kia akamutu koe i te apii i te Pipiria?

²⁰ Peea e rauka ai kia akavaitata atu kia Iehova me  kare koe e kite ana iaia? (Ioane 1:18; 4:24; 1 Timoteo 1:17) Me tatau koe te Pipiria no runga ia Iehova, ka kite koe e e Atua tika tikai aia. (Salamo 27:4; Roma 1:20) Ka maata atu toou inangaro ia Iehova ia koe e apii ra no runga iaia, e ka piri vaitata roa atu koe kiaia.

²¹ Ka mārama koe e ko Iehova to tatou Metua. (Mataio 6:9) Nona to tatou ora, inangaro aia kia mataora to tatou oraanga. Ko tera ta te metua aroa ka inangaro no tana tamariki. (Salamo 36:9) Te apii maira te Pipiria e ka rauka ia koe kia riro ei oa no Iehova. (Iakobo 2:23) Ae, te inangaro maira a Iehova, ko Tei Anga i te ao katoa nei, kia riro koe ei oa nona!

²² Penei ka inangaro tetai aronga kia akamutu koe te apii i te Pipiria. Mataku ratou e ka taui koe i taau akonoanga. Eiaa e akatika i tetai ua atu kia arai ia koe kia kore e riro ei oa no Iehova. Koia te Oa meitaki rava atu noou.

23, 24. (a) Eaa i anoanoia ai kia ui ua rai koe i te uianga? (e) Eaa ta tatou ka uriuri i roto i te pene ka aru mai?

²³ Ia koe apii ra i te Pipiria, e au mea tetai kare koe e mārama. Eiaa e akamā i te ui e te pati tauturu. Akakite a Iesu, kia akaaka tatou mei te tamariki meariki te tu. (Mataio 18:2-4) E maata te uianga a te tamariki. Inangaro te Atua kia kimi koe i te pauanga. No reira e apii meitaki i te Pipiria kia papu ia koe e ko te tuatua mou taau e apii ra.​—E tatau ia Angaanga 17:11.

²⁴ Te mataara meitaki roa atu kia kite ia Iehova, e apii i te Pipiria. Te pene ka aru mai, ka kite tatou eaa te Pipiria i tuke ei mei tetai ua atu puka.