1, 2. (a) Eaa te mea e riro ei tetai apinga aroa ei mea akaperepereia? (e) Eaa i riro ei e ko te oko ta te Atua apinga aroa puapinga rava atu?

EAA te apinga aroa puapinga rava atu tei orongaia mai ana naau? Me te mataora ra koe i te reira e me e mea puapinga tikai teia kia koe, ka mareka roa toou ngakau.

² Pouroa te apinga aroa ta te Atua i oronga mai, okotai rai mea anoano maataia. Ko ta te Atua apinga aroa puapinga rava atu no te tangata. Roto i teia pene ka kite tatou e kua tono mai a Iehova i tana Tamaiti ko Iesu Mesia, kia rauka ia tatou te ora mutukore. (E tatau ia Mataio 20:28.) Akapapu mai a Iehova i tona inangaro ia tatou i te tono mai anga ia Iesu ki te enua nei ei atinga oko.

3. Eaa te tumu i mate ei te tangata?

³ Ko te oko ta Iehova ravenga no te akaora i te tangata mei te ara e te mate. (Ephesia 1:7) Kia mārama i te tumu i anoanoia ai te oko, e mea puapinga kia kite tatou eaa tei tupu i te kainga i Edene. Kua ara to tatou nga metua mua ko Adamu e Eva. No ta raua ara, kua mate raua. Kua mate katoa tatou no te mea kua ïri mai  ta raua ara ki runga ia tatou.​—Akara i te Au Manako Poto 9.

4. Koai ra a Adamu, eaa ta Iehova i oronga nona?

⁴ Te anga mai anga a Iehova i te tangata mua ko Adamu, oronga Aia i tetai apinga akaperepere maataia nana. Ko te oraanga apa kore. Apa kore tona manako e tona kopapa. Kare rava aia e maki, e tangata metua, e kare rava e mate. No te mea na Iehova i anga ia Adamu, riro te Atua ei metua nona. (Luka 3:38) E tuatua putuputu ana a Iehova kia Adamu. Akataka meitaki Aia eaa tana e tapapa maira mei ia Adamu e kua oronga i tetai angaanga nana.​—Genese 1:28-30; 2:16, 17.

5. Eaa te aiteanga me tuatua te Pipiria e kua angaia a Adamu “i te tu o te Atua”?

⁵ Angaia a Adamu “i te tu o te Atua.” (Genese 1:27) Oronga te Atua i te au tu mei te aroa, te pakari, te tu tuatua tika, te maroiroi e te tikaanga no Adamu kia iki. Kare a Adamu i te matini. Anga a Iehova iaia kia rauka iaia te iki eaa te mea tika, eaa te mea tarevake. Naringa a Adamu i iki kia akarongo i te Atua, ka ora aia e tuatau ua atu i te Parataito.

6. Eaa te apinga tei ngere a Adamu i tona akarongo kore anga i te Atua? Eaa ta teia i akatupu kia tatou?

⁶ Tona akarongo kore anga ia Iehova e kua akautungaia kia mate, e ngere maata tikai tera nona. Ngere aia i tona pirianga oa kia Iehova, tona oraanga apa kore e tona kainga Parataito. (Genese 3:17-19) Iki a Adamu e Eva kia akarongo kore i te Atua, no reira kare o raua manakonakoanga. No ta Adamu i rave “i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te  mea kua ara katoatoa.” (Roma 5:12) Kua oko a Adamu iaia uaorai e ia tatou katoa, ki roto i te ara e te mate ei tuikaa. (Roma 7:14) E manakonakoanga ainei to tatou? Ae.

7, 8. Eaa ra te oko?

⁷ Eaa ra te oko? E rua ïa apinga e ō maira no te oko. Mea mua, ko te tutaki tei orongaia ei akaora mai i tetai tangata me kore ei tutaki no tetai apinga kia akaokiia mai. Te rua, ko te tutaki kia peke mai tetai apinga me kore tei aiteite tona puapinga ki te apinga ka okoia mai.

⁸ Kare e peke i tetai tangata kia tutaki i te oko no te ara a Adamu i ïri mai ei te mate ki runga ia tatou. Kua oronga mai ra a Iehova i te ravenga ei akaora ia tatou. Ka apii tatou eaa ta te oko ka rave e te puapinga ka rauka ia tatou.

9. Akapeea e rauka ai te tutaki i te oko?

⁹ Kare okotai tangata e tau kia oko mai i te oraanga apa kore ta Adamu i kopae. Eaa te tumu? Kua ara tatou pouroa. (Salamo 49:7, 8) Ka anoanoia tetai oraanga tangata apa kore ei oko. Kua “oronga [Iesu Mesia] iaia uaorai ei oko i te tangata katoa.” (1 Timoteo 2:6) Te oraanga apa kore ta Iesu i akaatinga, aiteite ki ta Adamu i kopae.

10. Akapeea a Iehova i te oronga mai anga i te oko?

¹⁰ Akapeea a Iehova te oronga mai anga i te oko? Tono mai Aia i tana Tamaiti ki te enua nei. Ko Iesu Tana i anga mua. (1 Ioane 4:9, 10) Kua āriki a Iesu kia akaruke i tona Metua i te rangi. (Philipi 2:7) Rave mai  a Iehova i tona oraanga, kua tuku ki roto i te vairanga tamariki o Maria i te enua nei, e kua anauia mai a Iesu ei tangata apa kore, kare e ara.​—Luka 1:35.

11. Akapeea i rauka ai te tangata okotai kia oko i te tangata katoatoa?

¹¹ Kua ngere te tangata ravarai i te oraanga apa kore no tei akarongo kore a Adamu ia Iehova. Ka rauka ainei i tetai tangata ke kia takore i te mate no te uanga a Adamu? Ae. (E tatau ia Roma 5:19.) Kua oronga te tangata ara kore a Iesu i tona oraanga apa kore ei oko. (1 Korinetia 15:45) Na tona oraanga apa kore e takore i te mate no te uanga a Adamu.​—1 Korinetia 15:21, 22.

12. Eaa te tumu i na roto ei a Iesu i teia tu?

¹² Te akataka maira te Pipiria i te mamae maata ta Iesu i na roto i mua ake ka mate ei aia. Kua papaia aia, kua patitiia ki runga i te satauro e kua vaooia kia mate marie ua. (Ioane 19:1, 16-18, 30) No teaa a Iesu i na roto ei i teia tu? No te mea karanga a Satani e, kare e tangata e vai tiratiratu me pakari te timataanga. Noatu te pakari o tona mamae, kua vai tiratiratu rai a Iesu. Akamanako ana e mei teaa to Iehova rekareka ia Iesu!​—Maseli 27:11; akara i te Au Manako Poto 15.

13. Akapeea te tutaki anga i te oko?

¹³ Akapeea te tutaki anga i te oko? I te mataiti 33 Nisana 14, te karena Ngati Iuda, kua akatika a Iehova i to Iesu au enemi kia tamate iaia. (Ebera 10:10) E toru rā i muri mai, kua akaora mai a Iehova ia Iesu, kare ei tangata mari ra ei vaerua. Muri mai te oki anga a Iesu ki te rangi, kua oronga aia iaia uaorai kia Iehova ei oko. Koia oki kua oronga aia i tona tikaanga kia noo ei tangata apa kore i te enua nei, kia oronga a Iehova i taua tikaanga ra no te uanga a Adamu. (Ebera 9:24) Kua  āriki a Iehova i teia oko kia matara mai tatou mei te ara e te mate.​—E tatau ia Roma 3:23, 24.

14, 15. Eaa ta tatou ka rave kia akakoreia mai ta tatou ara?

¹⁴ Kua puapingaia tatou no teia apinga aroa na Iehova. Akara ra eaa te puapinga no tatou i teianei e te tuatau ki mua.

¹⁵ Kua akakoreia ta tatou ara. E ngatā i te rave i te mea tika i te au taime ravarai. E tarevake ana tatou, ta tatou ka tuatua e ta tatou ka rave. (Kolosa 1:13, 14) Akapeea e akakoreia ai ta tatou ara? Kia tataraara tikai tatou, pati akaaka kia akakore mai a Iehova i ta tatou ara. I reira ka rauka ia tatou kia irinaki e kua akakoreia mai ta tatou ara.​—1 Ioane 1:8, 9.

16. Eaa ta tatou ka rave kia rauka te akava ngakau meitaki?

¹⁶ Ka rauka ia tatou te akava ngakau meitaki. Me rave tatou i te tarevake, ka akava ngakau tatou, kare e mataora e kare e kite ka akapeea. Eiaa e tuku i te au. Me pati akatenga tatou kia akakore mai a Iehova i to tatou apa, ka akarongo mai aia e ka akakore i ta tatou ara. (Ebera 9:13, 14) Inangaro a Iehova kia tuatua tatou kiaia i to tatou tu paruparu e te manamanata. (Ebera 4:14-16) Te ka tupu, ka rauka ia tatou te akava ngakau meitaki i mua ia Iehova.

17. Eaa te au akameitakianga ka rauka no tei mate a Iesu no tatou?

¹⁷ E manakonakoanga to tatou no te ora mutukore. “E utunga te mate no te ara; kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.” (Roma 6:23) No te mea i mate a Iesu no tatou, ka rauka te ora mutukore.  (Apokalupo 21:3, 4) Eaa ta tatou ka rave kia ora e tuatau ua atu?

18. Akapeea tatou i kite ei e e inangaro maata tikai to Iehova e to Iesu ia tatou?

¹⁸ Ka mareka toou ngakau me oronga mai tetai tangata i tetai apinga aroa manea naau. Ko te oko te apinga aroa akaperepere roaia atu, e kia akameitaki tatou ia Iehova ma te ngakau katoa. Akakite a Ioane 3:16 e “i aroa mai te Atua i to te ao nei, kua tae rava ki te oronga anga mai i tana Tamaiti anau tai.” No to Iehova aroa maata ia tatou, oronga mai aia i tana Tamaiti akaperepere ia Iesu. No to Iesu aroa ia tatou kua oronga ua aia i tona ora no tatou. (Ioane 15:13) Akapapu mai te apinga aroa o te oko e, e inangaro tikai to Iehova e to Iesu ia koe.​—Galatia 2:20.

19, 20. (a) Akapeea koe e riro ei ei oa no Iehova? (e) Akapeea koe te akaarianga e kua āriki koe i te atinga oko a Iesu?

¹⁹ I na kua kite koe i to te Atua aroa maata, akapeea ra koe e riro ei ei oa nona? Kare i te mea mama kia inangaro i tetai tangata kare koe i kite. Karanga a Ioane 17:3 e ka rauka ia tatou kia kite ia Iehova. Ka akaketaketa atu te reira i toou inangaro iaia e te akamareka iaia, e ka riro koe ei oa nona. E apii i te Pipiria kia maata atu toou kite no runga ia Iehova.​—1 Ioane 5:3.

²⁰ Āriki i te atinga oko a Iesu. Akakite te Pipiria e ‘ko te akarongo i te Tamaiti ra, e ora mutu kore tona.’ (Ioane 3:36) Eaa te aiteanga o te akarongo? Kia rave i ta Iesu i apii mai ia tatou. (Ioane 13:15) Kare e rava ua kia karanga e irinaki tatou ia Iesu. Me āriki i te oko, kia taangaanga tatou i to tatou akarongo. Karanga a  Iakobo 2:26 e: “Te akarongo kare e angaanga ra, e mea mate katoa ïa.”

21, 22. (a) Eaa te tumu ka aere ei tatou ki te Akamaaraanga i te mate o te Mesia? (e) Eaa te ka uriuriia i roto i te pene 6 e te 7?

²¹ Aere ki te Akamaaraanga i te mate o te Mesia. Te aiai i mua ake ka mate ei a Iesu, apii mai aia kia akamaara tatou i tona mate. E rave ana tatou i teia i te au mataiti ravarai, karangaia e ko te “kaingakai a te Atu.” (1 Korinetia 11:20; Mataio 26:26-28) Inangaro a Iesu ia tatou kia akamaara e i oronga aia i tona oraanga apa kore ei oko ia tatou. Akakite aia: “E akapera kotou ei manako anga iaku.” (E tatau ia Luka 22:19.) Me aere koe ki te Akamaaraanga, te akaari ra koe e te manako ra koe i te oko, pera to Iehova e to Iesu aroa maata no tatou.​—Akara i te Au Manako Poto 16.

²² Ko te oko te apinga aroa puapinga rava atu i rauka ia tatou. (2 Korinetia 9:14, 15) Ka puapingaia te mirioni ua atu tei mate, mei teia apinga aroa. Ka uriuri te pene 6 e te 7 ka akapeea e rauka ai te reira.