1. Eaa to te Atua akakoroanga no te tangata?

E AKAKOROANGA manea tikai to te Atua no te tangata. Anga aia i te nga tangata mua ko Adamu e Eva kia noo i roto i tetai kainga manea. Tona akakoroanga, kia anau tamariki raua e kia akariro i te enua katoa ei parataito e kia akono i te manu.​—Genese 1:28; 2:8, 9, 15; akara i te Au Manako Poto 6.

2. (a) Eaa to tatou kite e ka rave rai te Atua i tana i akakoro? (e) Eaa te tu tangata ta te Atua ka inangaro kia noo i te enua nei, e eaa te roa?

² Toou manako e ka noo rai tatou i roto te parataito? Akakite mai a Iehova e: “Kua akakoro rai au, e naku ïa e rave.” (Isaia 46:9-11; 55:11) Ae ka rave rai Aia i tana i akakoro e kare e rauka kia tāpu iaia. Karanga a Iehova e e tumu tau tetai i anga ai aia i te enua. “Kare ra aia i anga ei mea puapinga kore ua.” (Isaia 45:18) Inangaro Aia i te tangata kia noo i te enua nei. Eaa te tu tangata ta Iehova i inangaro kia noo i te enua nei? Karanga te Pipiria: “Ka riro te enua no te aronga tuatua-tika, ka noo tamou rai ratou i reira.”​—Salamo 37:29; Apokalupo 21:3, 4.

3. I te mea te maki e te mate nei te tangata, eaa ra taau ka ui?

³ Teia tuatau te maki nei te tangata e te mate nei. Te tamaki ra e te tā ra i tetai e tetai. Kare ko teia ta Iehova i akakoro. Eaa teia i tupu ei, e eaa te tumu? Ko te Pipiria ua te ka rauka i te akamārama mai.

4, 5. (a) Koai tei tuatua kia Eva na roto i te ovi i te kainga i Edene? (e) Akapeea tetai tangata meitaki ua me riro ei keikeia?

⁴ Akakite te Pipiria e e enemi to te Atua, “tei karangaia i te diabolo ra, e ko Satani.” Tuatua a Satani kia Eva na roto i te ovi i te kainga i Edene, kia manakoia e ko te ovi te tuatua ra.​—Apokalupo 12:9; Genese 3:1; akara i te Au Manako Poto 7.

⁵ Na te Atua ainei i anga i te Tiaporo ia Satani? Kare! Tona akapapa anga i te enua no Adamu e Eva, te noo ra tetai angera i te rangi tei riro mai ei Tiaporo. (Iobu 38:4, 7) Akapeea ake? E akapeea ana tetai tangata meitaki ua me riro ei keikeia? Tona anau mai anga kare aia i te keikeia. Inara kua noinoi aia i tetai apinga kare nana. Kua akamanako ua rai aia i te reira, e tei tupu kua pakari roa atu tona inangaro. I te atianga tau, kua keia aia. Nana rai i akariro iaia ei keikeia.​—E tatau ia Iakobo 1:13-15; akara i te Au Manako Poto 8.

6. Akapeea tetai angera i te riro anga mai ei enemi no te Atua?

⁶ Teia tei tupu ki taua angera. Anga te Atua ia Adamu e Eva, akakite aia kia raua kia anau tamariki e kia “akaki i te enua.” (Genese 1:27, 28.) Penei kua manako taua angera e, ‘Ko au ua ake ta te tangata e akamori!’ Kare atu ona manako ke mari ra kia peke iaia i tei tau anake ua na Iehova koia oki, kia akamori te tangata iaia. No reira kua pikikaa aia ia Eva e kua akavare iaia. (E tatau ia Genese 3:1-5.) No tana i rave kua riro mai aia ko Satani te Tiaporo, ei enemi no Iehova.

7. (a) Eaa te tumu i mate ei a Adamu raua ko Eva? (e) Eaa te tumu i ruaine ei tatou e i mate ei?

 ⁷ Kua akarongo kore a Adamu e Eva i te Atua e kua kai iora i te ua rakau. (Genese 2:17; 3:6) Kua ara raua i mua ia Iehova. I te tuatau tei aereia kua mate raua mei ta Iehova i akakite. (Genese 3:17-19) Kua ara katoa ta raua tamariki e kua mate. (E tatau ia Roma 5:12.) Kia mārama tatou i te tumu i ara ai te tamariki a Adamu e Eva, akamanako ana i teia akaraanga. Tamanako ua e te tunu ra koe i te varaoa i roto i tetai pā kopa. Ka kopa rai te varaoa mei te pā. Te akarongo kore anga a Adamu ia Iehova, kua riro aia ei tangata ara. No te mea e tamariki tatou na Adamu, e aronga ara tatou pouroa e kua aite tatou mei taua pā kopa ra. E no te mea e aronga ara tatou, ka ruaine tatou e ka mate.​—Roma 3:23; akara i te Au Manako Poto 9.

8, 9. (a) Eaa ta Satani i inangaro ia Adamu raua ko Eva kia irinaki? (e) Eaa te tumu kare a Iehova i tamate i te aronga meameaau i reira rai?

⁸ Kua patoi a Satani ia Iehova i tona akavare anga ia Adamu e Eva kia akarongo kore. Inangaro aia kia irinaki raua e e pikikaa a Iehova, e tutara kino, kare e inangaro kia mataora raua. Karanga a Satani e kare o te Atua tika kia akakite ki te tangata eaa ta ratou ka rave, e tikaanga to Adamu e Eva kia iki eaa te mea tika e te mea tarevake. Eaa ra ta Iehova ka rave? Ka rauka ua iaia kia tamate ia ratou kia kore te meameaau. Inara ka akapapu mai ainei tera e e pikikaa a Satani? Kare.

⁹ No reira kare a Iehova i tamate ia ratou i reira rai. Tuku aia i tetai tuatau no te tangata kia tutara ia ratou rai. Na teia e akaari mai e ko Satani te pikikaa e ko  Iehova tei kite eaa tei meitaki roa atu no te tangata. E maata ta tatou ka kite i roto i te Pene 11. Eaa toou manako i te ikianga ta Adamu e Eva i rave? E tau ainei kia irinaki raua ia Satani e kia akarongo kore i te Atua? Oronga a Iehova i te au mea katoa na raua. Te oraanga ara kore, te kainga ruperupe e te angaanga kia mataora  raua. Kare roa a Satani mea i rave ana no raua. Naringa koe i reira eaa ra taau ka rave?

10. Eaa te ikianga puapinga ka anoanoia tatou ravarai kia rave?

¹⁰ E ikianga ta tatou e tei runga te meitaki o to tatou oraanga i ta tatou ka iki. Me ka iki tatou ia Iehova ei tutara i te akapapu e e pikikaa a Satani, e me ka iki tatou ia Satani. (Salamo 73:28; e tatau ia Maseli 27:11.) E iti ua te tangata i teia ao e akarongo ana ia Iehova. Kare ko Iehova te tutara o teia ao. Me kare Koia, koai i reira?

11, 12. (a) Eaa ta tatou i kite no runga i ta Satani i taputou kia Iesu? (e) Eaa te au irava e akakite maira e ko Satani te tutara o teia ao?

¹¹ Kua kite a Iesu e koai te tutara o teia ao. Tetai atianga “kua akakite maira [Satani] kiaia i te au basileia katoa o te ao nei e to ratou kakā.” Karanga aia kia Iesu: “E oronga atu au i teianei au mea katoa kia koe, kia akatopa mai koe ki raro e akamori mai iaku.” (Mataio 4:8, 9; Luka 4:5, 6) E ui kia koe rai, ‘Naringa kare no Satani teia au patireia, ka oronga ainei aia i te reira no Iesu? Kare. Pouroa teia au kavamani, no Satani.

¹² Penei ka manako koe e, ‘Akapeea ake a Satani i riro ei ei tutara no teia ao? Kare ainei ko Iehova te Mana Katoatoa tei anga i teia ao katoa?’ (Apokalupo 4:11) Ae, inara kua kapiki a Iesu ia Satani e ko “te ariki o teianei ao.” (Ioane 12:31; 14:30; 16:11) Kapiki a Paulo i te Tiaporo ia Satani e ko “te atua o teianei ao.” (2 Korinetia 4:3, 4) Tata a Ioane e “te vai ua nei rai to te ao ravarai i raro ake i taua vaerua kino ra.”​—1 Ioane 5:19.

13. No teaa i anoanoia ai tetai ao ou no tatou?

¹³ Te kino ua atura teia ao. Te kite nei tatou i te tamaki, te au peu kino, te pikikaa e te tā ua i te au ngai ravarai. Kare e rauka i te tangata te takore i teia au manamanata noatu eaa te tu. Kare e roa atu ka takore te Atua i teia ao kino me tae mai te tamaki o Aramagido, e ka mono mai e ao ou takiri.​—Apokalupo 16:14-16; akara i te Au Manako Poto 10.

14. Koai ta te Atua i iki ei Ariki no Tona Patireia? Eaa ta te Pipiria i totou mai no runga ia Iesu?

¹⁴ Kua iki a Iehova ia Iesu Mesia ei Ariki no Tona kavamani, te Patireia i te rangi. Te au tauatini mataiti i topa, kua totou te Pipiria e ka tutara a Iesu ei “Ariki no te au” e kare tona kavamani e ope. (Isaia 9:5, 6) Apii a Iesu i tana au pipi kia pure no teia kavamani: “Kia tae toou basileia. Kia akonoia toou anoano i te enua nei, mei tei te ao katoa na.” (Mataio 6:10) I te Pene 8, ka kite tatou e akapeea te Patireia o te Atua me mono i te au kavamani o teia ao. (E tatau ia Daniela 2:44.) I reira te Patireia e akariro ei i te enua ei parataito.​—Akara i te Au Manako Poto 11.

15. Eaa ra te “enua ou”?

¹⁵ Taputou te Pipiria e: “Te tatari nei ra tatou i te rangi ou e te enua ou,” e te “vai tika anga o te tuatua-tika ra.” (2 Petero 3:13; Isaia 65:17) Me tuatua te Pipiria no runga i “te enua,” te tuatua ra te reira i te tangata e noo nei i te enua. (Genese 11:1) Ko te “enua ou” e vai tika ra te tuatua tika, ko te au tangata pouroa tei akarongo ia Iehova e tei akameitakiia.

16. Eaa te apinga aroa ta Iehova ka oronga no te aronga ka noo i tona ao ou, akapeea e rauka ai ia tatou teia apinga aroa?

 ¹⁶ Taputou a Iesu e ka orongaia te “ora mutu kore” no te aronga ka noo i te enua. (Mareko 10:30) Akapeea e rauka ai ia tatou teia apinga aroa? E tatau ia Ioane 3:16 e te 17:3, kia kite i te pauanga. Ka akara tatou i ta te Pipiria i akakite no runga i te oraanga i te enua Parataito.

17, 18. Akapeea tatou i kite ei e ka au ua te enua e ka noo ponuiaau ua tatou?

¹⁷ Ka kore te kino, te tamaki, te takinga kino, e te tā ua. Kare e aronga kino i te enua nei. (Salamo 37:10, 11.) Ka “akakore [te Atua] i te tamaki e tae rava akenei te openga o te enua.” (Salamo 46:9; Isaia 2:4) Ka kī te enua i te aronga tei inangaro e tei akarongo ia Iehova. Mutukore te au.​—Salamo 72:7.

¹⁸ Ka noo ponuiaau ua to Iehova iti tangata. I mua ana me akarongo to Iseraela ia Iehova, meitaki ua ratou no te mea te paruru ra Aia ia ratou. (Levitiku 25:18, 19.) I te Parataito, kare a tatou apinga me kore tangata e mataku, e ka noo au ua tatou!​—E tatau ia Isaia 32:18; Mika 4:4.

19. Eaa te tumu ka papu ei ia tatou e ka maata te kai i roto i to te Atua ao ou?

¹⁹ E maata te kai. “E manga sitona okotai rima i ki i te enua nei, i runga i te take o te au maunga ra.” (Salamo 72:16) “E na te Atua [Iehova], e akameitaki mai ia tatou nei,” e “ei reira e ua maata mai ei te enua.”​—Salamo 67:6.

20. Akapeea tatou i kite ei e ka riro mai te enua ei parataito?

²⁰ Ka riro te enua katoa ei parataito. Manea te au are e te au kainga o te tangata. (E tatau ia Isaia 65: 21-24; Apokalupo 11:18.) Ka ruperupe te enua mei te kainga rai i Edene. Ka oronga ua mai a Iehova i te au mea ravarai tei anoanoia. Akakite te Pipiria e: “Te oora nei koe [Iehova] i to rima, e te akamerengo nei i te kaki o te au mea ora katoa nei.”​—Salamo 145:16.

21. Akapeea tatou i kite ei e ka noo au ua te tangata e te manu?

²¹ Ka noo au ua te tangata e te manu. Ka rarata ua te manu ki te tangata. Te au manu kino i mua ana, kare e aʼe akaou me kanga te tamariki kia ratou.​—E tatau ia Isaia 11:6-9; 65:25.

22. Eaa ta Iesu ka rave no te aronga tei maki?

²² Kare e tangata e maki. Maata ta Iesu i akaora i te enua nei. (Mataio 9:35; Mareko 1:40-42; Ioane 5:5-9) Ei Ariki no te Patireia, ka akaora aia i te tangata ravarai. Kare tetai e karanga e: “Kua maki au.”​—Isaia 33:24; 35:5, 6.

23. Eaa ta te Atua ka rave no te aronga tei mate?

²³ Ka ora akaou mai tei mate. Taputou a Iehova e ka akatu akaou mai aia i te mirioni ua atu tei mate. “E tuakaouanga to tei mate, te aronga tuatua-tika e te aronga tuatua-tika kore.”​—E tatau ia Ioane 5:28, 29; Angaanga 24:15.

24. Eaa toou manako no runga i te oraanga i roto i te Parataito?

²⁴ E ikianga ta tatou pouroa. Kia apii no runga ia Iehova e te tavini iaia, me kia rave i to tatou anoano. Me iki kia tavini ia Iehova ka mataora tatou a te tuatau ki mua. Pati tetai tangata kia maara mai a Iesu iaia me mate aia, taputou a Iesu kiaia i taua rā ra, e ka aravei raua i parataito. (Luka 23:43) Maata ta tatou ka kite no runga ia Iesu Mesia e tana ka rave ei akatupu i ta Iehova au totou.