ME TATAU koe te nutipepa, akara i te tivi, akarongo i te ratio, ka kite koe e ka akarongo i te au tua angaanga kino, tamaki e te takinokino. Penei kua rokoia ana koe e te maki me kore kua takake tetai tei akaperepereia e koe.

E ui kia koe uaorai e:

• Ko teia ainei ta te Atua i inangaro noku e toku ngutuare?

• Ka kimi au i te tauturu kiea ei rapakau i toku au manamanata?

• Ka rauka ainei te au tika tikai?

Te oronga maira te Pipiria i te pauanga papu no teia au uianga.

• Kare te tangata e kite akaou i te mamae, kare e ruaine e kare e mate.​—Apokalupo 21:4

• “Ei reira te pirikoki e rererere aere ei mei te aili.”​—Isaia 35:6

• “Ei reira e akapueraiaʼi te mata o te matapo.”​—Isaia 35:5

•  Ka akaora akaouia mai tei mate.​—Ioane 5:28, 29

• Kare e tangata e maki.​—Isaia 33:24

• E maata te kai na te katoatoa.​—Salamo 72:16

Mama ua kia manako e e moemoea ua te au mea i roto i te au kapi mua o teia puka. Taputou te Atua e ka akatupu aia i te reira. Akamārama mai te Pipiria e akapeea Aia me rave i teia.

Maata atu ta te Pipiria ka rave. Ka akakite mai te reira eaa te ka anoanoia e mataora ai e e meitaki ei te oraanga. Akamanako ana eaa taau e apiapi ana. Penei no te moni, te ngutuare tangata, te maki, e te mate o tei akaperepereia. Ka rauka i te Pipiria i te tauturu ia koe kia akakoromaki. Ka pumaana koe i te pauanga o te au uianga mei teia te tu:

• Eaa te tumu o te mamae ta tatou e kite nei?

• Akapeea tatou te akakoromaki anga i to tatou manamanata?

• Ka rauka ainei te mataora no to tatou ngutuare tangata?

• Eaa te ka tupu kia tatou me mate tatou?

• Ka kite akaou ainei tatou i to tatou au akaperepere i mate?

• Eaa tatou ka irinaki ei e ka akatupu te Atua i tana au mea i taputou?

 I te mea te tatau ra koe i teia puka, tera i reira te inangaro ra koe kia kite i ta te Pipiria e apii maira. Ka tauturu teia puka ia koe. Te uianga o te au parakarapa ka tauturu ia koe kia mārama i te Pipiria. E maata te reka ana i te uriuri i te Pipiria e te Au Kite o Iehova. Irinaki matou e mei tera katoa koe. Kia akameitaki mai te Atua ia koe kia kite i ta te Pipiria ka apii mai!