1, 2. Ka aere tatou kiea akaruru ei i teia tuatau?

AKAMANAKO ana e tei vao koe e aere ra i tetai rā kinokino te reva. Te akapoiri maira te tumurangi e te raparapa ra te uira. Kare i roa ana, aruru mai te mangungu e oti akamata te ua. Oro koe te kimi ngai akaruruanga. Rekareka koe te kitea anga tetai ngai ruru e te marō!

² Mei tera rai to tatou turanga i teia tuatau. Te kino ua atura teia ao. Penei ka ui koe, ‘Ka aere ra au kiea akaruru ei?’ Akakite te Pipiria: “Te tuatua nei au kia Iehova, ko koe toku akapuanga, e toku pinanga; taku Atua, e taku i irinaki nei.” (Salamo 91:2) Ka oronga mai a Iehova i te tauturu no tatou i teianei, e te manakonakoanga no te tuatau ki mua.

3. Akapeea tatou te akariro anga ia Iehova ei akapuanga no tatou?

³ Akapeea a Iehova me paruru ia tatou? Ka tauturu aia ia tatou kia rave i te au ikianga tau no to tatou manamanata. Ririnui atu Aia i te aronga ka akakoro kino ia tatou. Me tupu tetai mea kino kia tatou, kia papu e ka takore aia i te reira a te tuatau ki mua. Akamaroiroi mai te Pipiria kia noo tamou tatou i roto i te aroa o te Atua. (Iuda 21) Ka anoanoia kia noo vaitata ua rai tatou kia Iehova kia rauka tana tauturu i te au tuatau ngatā. Akapeea tatou me rave i teia?

4, 5. Akapeea a Iehova te akaari mai anga i tona inangaro no tatou?

⁴ E rauka ai kia noo vaitata ua rai kia Iehova, ka anoanoia tatou kia kite e mei teaa tikai te maata o tona  inangaro ia tatou. Akamanako ana i ta Iehova i rave no tatou. Oronga mai aia i te enua manea, akaki ki te manu e te au tu rakau ruperupe. Oronga mai Aia i te au kai reka e te vai mā ei inu. Apii aia ia tatou i tona ingoa e tona au tu umere na roto i te Pipiria. Tei maata roa atu, kua tono mai aia i tana Tamaiti akaperepere ia Iesu ki te enua nei, kia oronga i tona ora no tatou. (Ioane 3:16) No taua atinga ra i rauka ai ia tatou te manakonakoanga mou no te tuatau ki mua.

⁵ Oronga mai a Iehova i te Patireia o te Mesia, Tona kavamani i te rangi kia takore pouroa i te kino. Ka akariro te Patireia i te enua ei parataito. Ka noo au ua te tangata ma te mataora e tuatau ua atu. (Salamo 37:29) Apii katoa mai a Iehova akapeea e rauka ai ia tatou te oraanga meitaki rava atu i teianei. Pati katoa mai aia kia pure tatou kiaia, e kua papa ua aia i te akarongo mai i ta tatou pure. Taka meitaki ua to Iehova inangaro no tatou ravarai.

6. Ka akapeea ra koe me ariu atu ki to Iehova aroa?

⁶ Akapeea koe me ariu atu ki to Iehova aroa? Akameitaki iaia ma te ngakau katoa no Tana au mea i rave noou. Te mea taitaia ra, kare te manganui e akameitaki ana iaia. Mei tera rai i to Iesu tuatau. Tetai atianga, kua akaora aia e tai ngauru aronga repera, inara okotai rai tei akameitaki iaia. (Luka 17:12-17) Kia aite tatou mei taua tangata ra e kia akameitaki ua rai ia Iehova.

7. Mei teaa ra te maata o to tatou inangaro ia Iehova?

⁷ Ka anoanoia tatou kia akaari i to tatou inangaro no Iehova. Akakite a Iesu ki tana au pipi kia inangaro ia Iehova ma to ratou ngakau, vaerua e te manako katoa. (E tatau ia Mataio 22:37.) Eaa ra te aiteanga o teia?

8, 9. Akapeea tatou me akaari kia Iehova e te inangaro ra tatou iaia?

 ⁸ Ka rava ua ainei kia karanga e te inangaro ra tatou ia Iehova? Kare. Me e inangaro to tatou ia Iehova ma te ngakau, vaerua e te manako katoa, ka akaari mai ta tatou angaanga i te reira. (Mataio 7:16-20) Taka ua te apii a te Pipiria e me e inangaro to tatou ia Iehova, ka akono tatou i tana akauenga. E ngatā ainei? Kare ta Iehova “akauenga i te mea teiaa.”​—E tatau ia 1 Ioane 5:3.

⁹ Me akarongo tatou ia Iehova, mataora te oraanga e te mareka ua. (Isaia 48:17, 18) Eaa ta tatou ka rave kia noo vaitata ua kia Iehova? Ka akara ana tatou.

10. Eaa te tumu ka anoanoia ai kia apii ua rai no runga ia Iehova?

¹⁰ Akapeea koe i riro ei ei oa no Iehova? Na roto i taau apii Pipiria i kite ei koe no runga ia Iehova e kua akatupu i tetai pirianga oa kiaia. Aite rai teia pirianga oa ki te aʼi, ka inangaroia kia kā ua kia kore e mate. Mei te aʼi rai ka inangaroia tetai vaie e kā ei, ka anoanoia koe kia apii ua atu rai no runga ia Iehova kia vai matutu ua toou pirianga oa kiaia.​—Maseli 2:1-5.

11. Eaa ta te apiianga a te Pipiria ka akatupu kia koe?

¹¹ Ia koe e apii ra i te Pipiria, ka akakeuia toou ngakau e te au mea taau e apii ra. Mei tera rai tetai nga pipi a Iesu iaia e akamārama ra i te au totou a te Pipiria. Karanga raua e: “Kare aina i maana rava to taua ngakau, ka tuatua mai ei aia kia taua i te arataa ra, ka akataka mai ei aia i te tuatua i tataia ra?”​—Luka 24:32.

12, 13. (a) Eaa te ka tupu ki to tatou inangaro no Iehova me kare tatou e matakite? (e) Eaa ta tatou ka rave kia vai ua rai to tatou inangaro no Iehova?

¹² Mei tera nga pipi rai i to raua mārama anga i te  Tuatua Tapu, kua akakeuia to raua ngakau. Penei mei tera rai koe i toou mārama anga i te Pipiria. Tauturu teia ia koe kia kite ia Iehova e kia inangaro iaia. Eiaa roa toou inangaro Iaia kia ngaro.​—Mataio 24:12.

¹³ Me riro koe ei oa no Iehova, tauta kia ngaueue kore toou pirianga oa kiaia. Apii atu rai no runga Iaia e Iesu, akamanako marie no runga i te reira e oti aru i taau i apii. (Ioane 17:3) Me tatau e me apii koe i te Pipiria, ui kia koe uaorai: ‘Eaa ta teia e apii maira iaku no runga ia Iehova? No teea i anoanoia ai kia inangaro au Iaia ma toku ngakau e te vaerua katoa?’​—1 Timoteo 4:15.

14. Akapeea te pure te tauturu anga kia vai matutu ua to tatou inangaro no Iehova?

¹⁴ Me e oa piri tikai toou, ka tuatua ua rai koe kiaia e ka akamatutu teia i to korua pirianga oa. Me tuatua  putuputu tatou kia Iehova na roto i te pure, ka vai matutu ua to tatou inangaro Nona. (E tatau ia 1 Tesalonia 5:17.) E apinga aroa te pure na to tatou Metua i te rangi. Kia tuatua ua rai tatou kiaia ma te ngakau tae. (Salamo 62:8) Eiaa e tamou ngakau, eiaa taokioki i taua pure rai, kia tae tikai ra toou ngakau i taau e tuatua ra. Me apii ua rai tatou i te Pipiria, me pure ma te ngakau tae, ka matutu ua to tatou inangaro no Iehova.

15, 16. Mei teaa ra toou manako no runga i te angaanga orometua?

¹⁵ Me ka inangaro tatou kia noo vaitata ua kia Iehova, tuatua ki etai ke no runga i to tatou akarongo. E akameitakianga teia kia tuatua no runga ia Iehova. (Luka 1:74) Oronga mai a Iesu i teia apainga na te au Kerititiano mou. No reira kia tutu aere tatou pouroa i te tuatua meitaki o te Patireia o te Atua. Kua rave ake ainei koe i teia?​—Mataio 24:14; 28:19, 20.

¹⁶ Mea puapinga te angaanga orometua kia Paulo, karanga aia e e apinga akaperepereia teia. (2 Korinetia 4:7) Te angaanga puapinga rava atu, kia akakite ki etai ke no runga ia Iehova. E mataara tau teia noou kia tavini ia Iehova, e te akaperepere maira aia i taau e rave ra. (Ebera 6:10) Ka puapingaia koe e te aronga ka akarongo mai, no te mea te tauturu ra koe ia ratou e koe katoa, kia noo vaitata ua rai kia Iehova e kia rauka te ora mutukore. (E tatau ia 1 Korinetia 15:58.) E angaanga ke atu ainei tetai te ka apai mai te merengo maata noou mei teia te tu?

17. No teaa i riro ei te angaanga orometua ei mea rapurapu?

¹⁷ E mea rapurapu te angaanga tutu evangeria. Kia  “akakite ua koe i te tuatua,” e “kia tamou marie rai.” (2 Timoteo 4:2) Ka anoanoia kia rongo te tangata i te nuti o te Patireia o te Atua. Akakite te Pipiria: “Kua vaitata te rā maata o Iehova, kua vaitata, e te rapurapu roa maira” e “kare e tavarevare” te openga. (Zephania 1:14; Habakuka 2:3) Kare e roa atu ka takore a Iehova i to Satani ao. Ka anoanoia kia kite te tangata, kia rauka ia ratou te iki kia tavini ia Iehova.

18. No teaa tatou e te au oa Kerititiano mou ka akamori kapiti ei ia Iehova?

¹⁸ Inangaro a Iehova i te au Kerititiano mou kia akamori kapiti iaia. “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.” (Ebera 10:24, 25) Tauta kia tae ki te au uipaanga pouroa. E taime meitaki teia te akamaroiroi e te akamatutu i tetai e tetai.

19. Eaa te ka tauturu ia tatou kia inangaro i to tatou au taeake e te au tuaine Kerititiano?

¹⁹ Me tae koe ki te uipaanga, ka aravei koe i te au oa te ka tauturu ia koe te akamatutu i toou pirianga kia Iehova. Tukeke te au taeake e te au tuaine taau ka aravei, e tavini maroiroi ra ia Iehova mei ia koe rai. E aronga apa ua ratou, e e tarevake ana mei ia koe rai. Me tupu teia, akakoromaki ma te akakore i to ratou apa. (E tatau ia Kolosa 3:13.) Akara i to ratou au tu memeitaki, ka tauturu te reira ia koe kia inangaro ia ratou e kia akapiri vaitata roa atu kia Iehova.

20, 21. Eaa “te ora mutu kore”?

²⁰ Inangaro a Iehova i te oraanga meitaki roa atu no tona au oa. Apii mai te Pipiria ia tatou e, ka tuke takiri to tatou oraanga a te tuatau ki mua.

²¹ Ka ora tatou e mutu kore ua atu, kare e 70 ua me kore e 80 mataiti. Ka rauka ia tatou te “ora mutu kore,” te turanga au e te mataora i roto i te parataito. Ko teia oraanga ta te Pipiria e karanga ra e ko “te ora mutu kore.” Kua taputou mai a Iehova i teia, inara ka anoanoia tatou kia mou piri tikai i te reira.​—1 Timoteo 6:12, 19.

22. (a) Akapeea e rauka ai ia tatou kia mou piri tikai i te “ora mutu kore”? (e) No teaa kare e rauka ia tatou te oko i te ora mutu kore?

²² Akapeea tatou me mou piri tikai i te “ora mutu kore”? Kia “takinga-meitaki” e ‘kia apingaia i te angaanga meitaki.’ (1 Timoteo 6:18) E taangaanga i ta tatou e apii ra i roto i te Pipiria. Kare e rauka te “ora mutu kore” i to tatou uaorai maroiroi. Kare e rauka ia tatou te oko i te ora mutu kore. E apinga aroa teia na Iehova ki tona au tavini, e akaraanga teia no tona “aroa ua.” (Roma 5:15) Inangaro to tatou Metua i te rangi i te oronga i teia apinga aroa no tona au tavini tiratiratu.

23. Eaa te tumu ka anoanoia ai kia rave koe i te au ikianga tau i teianei?

²³ E ui kia koe uaorai, ‘Te akamori ra ainei au ia Iehova na te mataara tana i inangaro?’ Me ka anoanoia kia rave i tetai au tauianga, akamata i teianei. Me irinaki tatou ki runga ia Iehova e me akarongo iaia, ka riro aia ei akapuanga no tatou. Ka paruru aia i tona iti tangata tiratiratu i teia au rā openga o to Satani ao kino. Ka akapapu a Iehova kia noo tatou i roto i te  Parataito e mutu kore ua atu mei tana i taputou mai. Ka rauka ia koe te ora mutu kore me rave koe i te ikianga tau ma te pakari i teianei!