Inara eaa a Satani e tana au temoni ka rave maroiroi ei i te akavare i te au tangata? No te mea te anoano ra ratou kia piri atu tatou i ta ratou meameaau. Te anoano ra ratou kia akamori tatou ia ratou. Te anoano ra ratou kia irinaki tatou i ta ratou au pikikaa e kia rave i te au mea kare ra a Iehova e inangaro. E manganui teia au ravenga te piri atura ki te au peu no tei mate ra.

Ko te matenga o tetai tei akaperepereia ra e akatupu anga mamae ngakau ia, e e mea matauia e te tika ra kia akakite i te tu mii. I muri ake i te matenga tona oa ko Lazaro, kua “aue iorā Iesu.”—Ioane 11:35.

E manganui te au peu te piri atura ki te matenga, e e tuke tuke maata to ratou takapini teianei ao. E manganui kare e patoi ana i te au kaveinga Puka Tapu. Inara ko etai ravenga, te akatumuia ra ki runga i te manako e te ora ra tei mate e te rauka ra ia ratou i te akara mai i tei ora ra. Te aueanga, te miianga tapu koreia, e te au ravenga tanumanga mamaata pouroa kua akaia ki roto i te mataku i te akaririanga i te au vaerua o tei mate ra. Inara i te mea e “kare a ratou apinga i kite,” ko te aronga te rave ra i te reira au ravenga te akatupu ra i ta Satani pikikaa.—Koheleta 9:5, NW.

 Ko etai au peu me kare ravenga te tu maira no te irinaki anga e te umuumuia ra te tauturu mei ko mai i tei ora ra e ka akakinoia tei ora ra me kare ratou e akamaruia atu. I etai au enua te raveia ra te kaikaianga e te au atinga penei i te 40 ra me kare okotai mataiti i muri ake i te matenga tetai tangata. Te manakoia ra teia ei tauturu i tei mate ra ‘kia tapae atu’ ki te ngai vaerua ra. Ko tetai atu ravenga matauia ko te oronga anga manga e te vai inu na tei mate ra.

Ko teia au ravenga e tareva ke no te mea te turu ra i te pikikaa a Satani no tei mate ra. Ka mareka ainei a Iehova kia o atu tatou i te raveanga i tetai au apinga tei piri atu i te au peu tei akatumuia ki runga i te au apiianga temoni? Kare rava ia!—2 Korinetia 6:14-18.

Kare a te au tavini o te Atua mou tuanga i te au ravenga te turu ra i ta Satani au pikikaa. Kareka ra, te tuku maroiroi ra ratou ma te aroa i te tauturuanga e te akapumaanaanga i tei ora ra. Kua kite ratou me taka ke tetai tangata, ko Iehova anake te ka tau kia tauturu atu iaia.—Iobu 14:14, 15.

Te aravei tika atura tetai papaki tangata i te au temoni me kare na roto atu i tetai taunga tangata nei. Te tapaia nei teia e purepure. Ko te vutu, te angaanga taunga purepure, te manamana, te akakiteanga manuia, e te uianga i tei mate ra e au tu katoatoa ratou no te purepure.

Te akaapa ra te Puka Tapu i teia au mea, i te na ko anga: “Auraka rava tetai e kitea i rotopu ia kotou . . . ei tauraatua, e te akara tumurangi, e te purepure, e te akarakara, E te kebere, e tei kimi i te vaerua kino, e te peu purepure, e tei ui ki tei mate ra. Ko te aronga katoa oki i rave i te reira au peu e aronga viivii ïa na Iehova.”—Deuteronomi 18:10-12.

Eaa ra a Iehova i akamatakite maroiroi mai ei ia tatou no teia au ravenga?

No to tatou uaorai meitaki, te akamatakite maira a Iehova ia tatou i te au tu purepure ravarai. Te aroa ra aia e te akono ra i te au  tangata, e kua kite aia e ko te aronga te ka piri atu ki te au temoni ka mamae ratou.

Ko Nilda tetai vaine mei te reira, e taunga purepure aia i Paratiri. Kua akariro te au temoni i tona oraanga kia maromaroa. Kua akakite maira aia: “I raro ake au . . . i te au vaerua, na ratou i ikuiku mai ana iaku nei. I tauiia ana au i rotopu i te tu manako kite e te tu ngaro te manako, e kua raveia atu au ki roto i te ngai no te au manamanata te manako. No te maata te takinga kino anga a te au temoni iaku kua kino rava toku tu kopapa. Kua kai au i te au ua tamaru e kua akamata i te inu kava e te kai tamou katoa i te avaava. Kua raveia te reira no etai mataiti.”

I muri iora, ma te tauturu a Iehova e tona au Kite i te enua nei, kua matara a Nilda i te mana o te au temoni e i teianei te ora nei ma te oraanga puapinga e te akono meitaki. Kua karanga aia: “Te akamaroiroi atu nei au i te katoatoa rava, e auraka noatu no tetai tuatau poto ua, e akariro kia kapitiia atu ma te au vaerua [kikino] ra.”