Te karanga ra te Puka Tapu e ko Satani “tei pikikaa i to te ao katoatoa nei.” (Apokalupo 12:9) Kare a Satani e tana au temoni e anoano kia irinaki tatou i te Tuatua a te Atua, koia te Puka Tapu. Te tauta ra ratou kia irinaki te au tangata e te ora ra tei mate i tetai ngai i roto i te ngai vaerua. E akara tatou e akapeea ta ratou rave anga i te reira.

E manganui te akonoanga te apii ra e e meta to te au tangata ravarai te ka aere atu ki te ngai vaerua i muri ake i te matenga o te kopapa kiko. Te karanga ra ratou e ka mate te kopapa inara kare te meta e mate. Pera katoa, te tuatua ra ratou e kare te meta e mate, e mate kore te reira.

Inara kare te Tuatua a te Atua e apii ana i te reira. Te akakite maira te Puka Tapu e ko te meta ko te tangata rai ia, kare e ko tetai apinga ke i roto i te tangata ra. Ei akatauanga, i te akatakaanga i te anga mai anga ia Adamu, te na ko ra te Puka Tapu e: “E kua akamata akera te Atua ko Iehova i te maani i te tangata mei te one pueu o te one ra, pupui atura ki roto i tona putangiu i te aʼo ora, riro mai ra te tangata ra ei meta ora.” (Genese 2:7, NW) E no reira kare i orongaia tetai meta no Adamu; e meta oki aia.

 Kua karanga katoaia te au manu e e meta.—Genese 1:20, 21, 24, 30.

I te mea ko te aite anga o te tuatua “meta” i te Puka Tapu ko te tangata uaorai ia, kare tatou e poitirere i te kite anga e ka rauka kia mate te meta e te mate ra oki ia. Te na ko ra te Tuatua Tapu:

• “Ko te meta e rave ra i te ara ra—ko te ka mate ia.”—Ezekiela 18:4, NW.

• “E kua tuatua akera Samasona: ‘Ka tuku atu i toku meta kia mate ma te Philiseti katoa.—Au Akava 16:30, NW.

• “E tau ainei i te ture kia rave i te meitaki i te Sabati me kare kia rave i te kino, kia akaora me kare kia tamate i te meta?”—Mareko 3:4, NW.

Te akakite maira etai atu tuatua tapu e ka rauka i te akapou i te au meta (Genese 17:14, NW), kia taia ki te koke (Iosua 10:37), kia tapokiia kia ngaro te aʼo (Iobu 7:15, NW), kia maremoia (Iona 2:5). E no reira, ka mate te meta.

Me tatau koe i te Puka Tapu mei te akamata anga ki te openga kare rava e kitenaia e koe te takiota tuatua “meta mate kore.” Kare te meta tangata i te vaerua. Ko te apiianga no te meta mate kore kare ia i te apiianga Puka Tapu. E apiianga ia na Satani e tana au temoni. Te makitakita ra a Iehova i te au apiianga pikikaa a te akonoanga atua katoa.—Maseli 6:16-19; 1 Timoteo 4:1, 2.

Ko tetai atu ravenga a Satani no te akavare i te tangata na roto i te au taunga. Ko te taunga e peretana ia te ka rauka mai iaia te au tuatua akakitekite mei ko tika mai i te ao vaerua ra. E manganui te au tangata, kapiti katoa te au taunga uaorai, te irinaki ra e ko teia au tuatua akakitekite no ko mai i te au vaerua o te aronga tei mate ra. Inara mei ta tatou i kite no ko mai i te Puka Tapu ra, kare te reira e rauka.—Koheleta 9:5, 6, 10.

No ko mai iaai ma, i reira, teia au tuatua akakitekite anga? Na te au temoni uaorai! Ka rauka i te au temoni i te akara i tetai tangata iaia e ora ra; kua kite ratou i akapeea te tuatua a taua tangata ra, eaa tona tu kia akaraia, eaa tana i rave, e eaa tana i kite. E no reira e ngoie ua no ratou i te aru i ta te aronga tei mate ra.—1 Samuela 28:3-19.

Ko tetai atu ravenga a Satani no te akatupu i te pikikaa no tei mate ra na roto i te au tua pikikaa. E putuputu te reira au tua i te akaariu ke i te au tangata mei te tuatua mou o te Puka Tapu.—2 Timoteo 4:4.

I Aperika e manganui te au tua no te au tangata tei kitenaia e te ora ra i muri ake i to ratou mate anga. Ei akatutuanga, kua kitea mai i te ngai mamao roa mei te ngai i nooia e taua tangata ra. E ui kia koe uaorai: ‘E akara anga tau ainei e me e mana to tetai tangata kia oki mai mei te mate maira, e ka oki mai aia ki tetai ngai mamao ke rava atu i tona ngutuare tangata e tona au oa ra?’

Pera katoa, kare aina e ko te tangata i kitenaia ra e akatutu ua ia no te tangata tei mate ra? Ei akatauanga, e rua nga orometua Kerititiano te tutu aere ra i tetai ngai i vao mai i te oire e kua kite atu raua i tetai tangata ruaine tei aru aere maira ia raua no etai nga ora. I to raua uiui anga kiaia, kua kite raua e te manako ra taua tangata ra e ko tetai o raua orometua ra ko tona ia taeake tei mate i etai mataiti i mua akera. E tikai, kua tarevake aia, inara kare aia i akatika e kua tarevake aia. E tamanako ana i te tua ta te reira tangata ruaine ka akakitekite ki tona au oa e tona au tangata tupu!

Kare e ekoko anga e kua kite koe i etai apinga tu ke ta te au tangata i akara, i akarongo, e i moemoea katoa oki. Ko te reira au tupu anga tu ke roa e putuputu te tamataku i te aronga tei tupu akera ia kia ratou. Ko Marein, i noo aia i te pae Opunga Ra o Aperika, i putuputu aia i te akarongo anga i te reo o tona tupuna vaine tei mate ra, i te kapikianga iaia i te po. No te mataku, kua kapiki maata a Marein, e kua ara tona ngutuare tangata katoatoa. I te openga, kua ngaro tona manako tika.

E no reira, naringa te ora tika ra tei mate, e mea tau ainei e kia tamataku ratou i ta ratou i akaperepere ra? Kare rava ia. Ko te tumu o te reira au akakitekite anga ko te au temoni.

Inara ka akapeea te au akakitekite anga tei akara anga tauturu mai e te akapumaanaanga? Ei akatauanga, e maki a Gbassay, no Tiera Reone aia. I moemoea aia e kua mama mai kiaia tona metua tei mate ra. Kua ikuiku mai tona metua kia aere atu aia ki tetai pu rakau, kia rave mai i tetai rau, ka kairo ei i te vai, e ka inu ei i te reira. Auraka aia e tuatua atu ki tetai ua atu tangata i mua ake i tana raveanga i te reira. Kua rave aia i te reira e kua meitaki mai.

Kua akakite mai tetai vaine e i mama mai tana tane kiaia i tetai po, i muri mai i tona matenga. Kua karanga aia e e manea tona akara anga e e manea katoa tona kakau i aoao ei.

 E akara anga meitaki e te tauturu katoa oki te reira au akakitekite anga e te au orama. No ko mai ainei ratou i te Atua ra? Kare, kare ratou no reira. Ko “te Atua tuatua-mou” a Iehova. (Salamo 31:5) Kare rava aia e akatika i te pikikaa me kare ra i te akavare ia tatou. Ko te au temoni anake ua ka rave i te reira.

Inara e au temoni meitaki aina etai? Kare. Noatu e ka akara anga tauturu mai i etai tuatau, e kino anake ratou katoatoa. I to te Tiaporo tuatua anga ma Eva, i akara anga oaoa mai aia. (Genese 3:1) Inara eaa tei tupu kiaia i muri ake i tona akarongo anga kiaia ra e te rave anga i tana i tuatua maira? Kua mate aia.

Kua kite oki koe e kare i te mea matau koreia no tetai peretana kino kia oaoa mai ki tana aronga e anoano ra kia akavareia e kia pikikaaia. “E nio teatea, e ngakau kerekere,” ta te maseli Aperika ia tuatua. E te na ko ra te Tuatua a te Atua e: “Ko Satani oki tei akatutu angela katoa iaia uaorai no te mārama.”—2 Korinetia 11:14.

Kare te Atua e tapiri atu iaia ki te au tangata i te enua nei i teianei na roto i te au moemoea, te au orama, e te au reo no te ao vaerua maira. Te arataki ra aia e te apii ra ia ratou na roto i te Puka Tapu, te ka akariro i te tangata kia “tau tikai i te au angaanga memeitaki katoa ra.”—2 Timoteo 3:17.

E no reira, me akamatakite mai a Iehova ia tatou i te au ravenga kikite a te Tiaporo ra, te rave ra aia i te reira no tona aroa ia tatou nei. Kua kite aia e e au enemi kikino te au temoni ra.