E takinga kino e te rave akakino ua ana rai a Satani e tana au temoni. I te tuatau i mua ana kua ta a Satani i te au manu e te au tavini a Iobu tiratiratu ra. I reira kua ta aia i nga tamariki e tai ngauru a Iobu na te akatupuanga i “te matangi viviki” kia akapou atu i te are tei roto ra ratou. I muri mai i te reira kua takino atura a Satani ia Iobu ki “te ee mamae, mei tona tapuae e tae ua atu ki tona take upoko.”—Iobu 1:7-19; 2:7.

I to Iesu tuatau ra, kua akariro te au temoni i etai au tangata kia mutekiia e kia matapo oki. (Mataio 9:32, 33; 12:22) Kua tamamae ratou i tetai tangata e kua taangaanga i taua tangata ra kia kotikoti iaia uaorai ki te toka. (Mareko 5:5) Kua akariro katoa ratou i tetai tamaiti kia kapiki maata, kua titiri takiri atura iaia ki te one, e “kua akauti kino katoa iaia.”—Luka 9:42, NW.

 I teia tuatau, kua kino roa atu a Satani e te au temoni i te rave anga i te ta ua. Ko te tika e, kua tere roa atu ta ratou rave anga i te reira mei to ratou titiri angaia mai ki vao i te rangi ra. Te akakite maira te au tataanga takapini i teianei ao i to ratou tu takinga kino. Te akatupu ra ratou i te mate kia makiia tetai papaki tangata. Ko etai atu te tamanataia ra e ratou i te po, kia kore e moe me kare kia moemoea kikino. Ko etai te kukumiia ra no te ainga. Ko tetai papaki te akariroia ra kia nenevaia, kia ta ia etai ke, e kia ta ia ratou uaorai.

Kua akakite maira a Lintina, te noo ra ki Turiname, e na tetai temoni, me kare e vaerua kino, i tamate e 16 au mema o tona ngutuare tangata, e kua tamamae i tona kopapa e pera katoa tona manako no etai 18 mataiti. Mei tana i kite tikai kua karanga aia e e “mea rekareka na te au temoni i te tamamaeanga i te aronga kare e inangaro atu kia taia ratou e tae roa kia mate.”

Inara te rauka ra ia Iehova i te paruru i tona au tavini i ta Satani au takino anga.—Maseli 18:10.