“I tupu ake au i tetai oire rikiriki i te pae apatokerau,” ta Dauda i akakite mei Tiera Reone mai. “Iaku e tamaiti ua ra, e taumaro anga tetai i rotopu i toku ngutuare tangata e tetai ngutuare tangata ke ra. Kua karanga raua tetai e tetai e nona te enua okotai ra. Ei akaoti anga i taua pekapeka ra, kua kapikiia tetai tangata maani vairakau. Kua oronga mai aia i te io ki tetai tangata ke atu ra, e kua tapoki iaia i te kakau teatea. Kare i roa kua ruketekete e kua pata te ou o taua tangata i raro i te kakau ra. Iaia e akara atura ki roto i te io, kua karanga aia: ‘Te akara nei au i tetai tangata ruaine te aere mai nei! E au kakau teatea tona. E roangarere aia e kua ruaine, ma te rauru inaina, te aaere ra ma te manga tupou te kopapa.’

“Te akataka maira aia ia Papa Kereni! Kua manga tu ke aia i reira e kua kapiki: ‘Me kare kotou e irinaki i taku e tuatua nei, e aere mai e akara kotou uaorai!’ Inara, kare e mea maroiroi ia matou, kia rave i te reira! Kua akamaru atura te tangata maani vairakau iaia na te pipianga i tetai kairo anga mana, e rau rakau e te vai ki runga iaia, ko tana i mou ana i roto i tetai kapu rakau karapata.

“I te tuatuaanga na roto mai i te tangata tei iaia ra te io, kua akakite maira ‘Papa Kereni’ e no to matou ngutuare tangata taua enua ra. Kua tuatua maira aia ki toku mama kereni kia tatanu i taua enua ra e auraka e taitaia. Kua ariki katoa tetai atu ngutuare tangata ra i te reira akava anga. E kua oti taua pekapeka anga ra.”

 E au tupu anga matauia te reira i te Opunga ra o Aperika. I konei, mei etai atu tuanga o te ao nei, e au mirioni ua atu kare e rauka kia tatauia te irinaki ra e kua aere atu te aronga tei mate ki te ao vaerua, te ngai te ka rauka ia ratou te akara mai e kia mana katoa oki ki runga i te oraanga o te au tangata i te enua nei. E tika ainei teia irinaki anga? Te ora tika nei ainei tei mate ra? Me kare ia, koai ma i reira te aronga te karanga ra e ko te au vaerua ratou o tei mate ra? Te kiteanga i te au pauanga tika no teia au uianga e mea puapinga maata rava. E tumu ia no te ora e te mate.