E rauka ai ia matou i te akakitekite meitaki aere i te “evangelia” ki te “pa enua katoa, e te au kopu, e te au reo, e te au iti-tangata,” kua nenei matou i te au puka i roto i te 750 tuma reo. (Apokalupo 14:6) Akapeea matou te akatupu anga i teia angaanga ngata? Kua rauka ia matou i te rave i teia ma te tauturu a tetai pupu aronga angaanga tata e te uri reo i te pa enua—e Au Kite pouroa ratou no Iehova.

Kua akapapaia te tataanga mua i roto i te reo Papaa. Na te Pupu Akaaere e akaaere ana i te angaanga a te Tipatimani Tataanga i ko i to matou opati maata o teianei ao. Na teia tipatimani e akaaere ana i te au angaanga a te aronga tata te tavini ra i ko i te opati maata e tetai atu au opati manga. No te tukeke o te au pupu tangata tata i rauka ai ia matou i te tata i te au tumu manako te akakeu ra i te au tu tangata, kia reka mai te au tangata o te au pa enua ravarai i ta matou au puka.

Ka tukuia atu te au tataanga ki te aronga uri reo. Muri ake te akatanotanoia anga e te akatikaia anga te au tuatua tei tataia, ka tukuia atu te reira na roto i te komupiuta ki te pupu uri reo takapini i te ao, kia uri, kia akara e kia akatanotano meitaki mai ratou i te au tataanga. Ka iki ratou i te au tuatua tika kia akamarama mai i te aiteanga tikai o te reo Papaa ki roto i to ratou uaorai reo.—Koheleta 12:10.

Na te au komupiuta e akaviviki ana i te au angaanga. Kare e rauka i tetai komupiuta i te mono i te aronga tata e te aronga uri reo. Inara, ka rauka ta ratou au angaanga i te akavivikiia na te taangaanga anga i te au tikitinari, te au porokaramu e te au mea kimikimianga i runga i te au komupiuta. Kua maani te Au Kite o Iehova i tetai Multilanguage Electronic Publishing System (MEPS). Kia rauka ia ratou i te taipu i te au tuatua i roto i te au anere reo, te tuku anga i te au tataanga ki te pae i te au tutu, e te akapapa anga i te au tataanga tei oti no te neneianga.

Eaa ra matou i tauta ai i te rave i teia, noatu e e au tauatini ua rai tangata te tuatua ra i te reo? No te mea ko to Iehova ia anoano ‘kia ora te tangata katoatoa, e kia rauka te kite i te tuatua-mou.’—1 Timoteo 2:3, 4.

• Eaa te o maira ki roto i te tataanga i ta matou au puka?

• Eaa ra matou i uri ei i ta matou au puka ki roto i te au reo e manganui?