Ka inangaro ainei koe i te rave i tetai kimikimianga kia maata mai toou kite i te Pipiria? Te inangaro ra ainei koe i te kite i tetai irava me kore i tetai tangata, ngai, e tetai apinga tei taikuia i roto i te Pipiria? Me kore te manako ra ainei koe me ka rauka rai i te Tuatua a te Atua i te tauturu ia koe no runga i tetai mea e manamanata ra koe? Ina, atoro atu i te runanga puka i te Are Uipaanga Patireia.

Oronga maira te reira i te au apinga tauturu no te kimikimianga. Papu e kare koe i tu ake i te au puka a te Au Kite o Iehova e vai ra no runga i te Pipiria i roto i toou reo. Inara, tei roto i te runanga puka o te Are Uipaanga Patireia teia au puka ou. Tei roto katoa i te reira te au urianga tukeke o te Pipiria, tetai tikitinari meitaki, e tetai atu au tataanga puapinga ka riro ei tauturu ia koe. Ka rauka ia koe i te taangaanga i te runanga puka i mua ake e i muri ake i te uipaanga. Me kua tamouia tetai komupiuta, penei e Watchtower Library tetai i runga i reira. E porokaramu komupiuta teia, tei roto i reira ta matou au puka e tetai au ngai mama ua i te taangaanga ei kimikimi anga, te ka rauka ia koe i te akara i te au tumu manako, tetai tuatua e tetai irava.

Mea meitaki te reira no te aronga i roto i te uipaanga Oraanga Kerititiano e te Angaanga Orometua. Me o atu koe ki roto i teia apii, penei ka rauka ia koe i te taangaanga meitaki i te runanga puka o te Are Uipaanga Patireia me akapapa koe i taau tuanga apii. Na te akaaere o te Oraanga Kerititiano e te Angaanga Orometua e akono ana i te runanga puka. Kia akapapu aia e tei roto i reira te au puka ou e kua mako te akanooia anga te reira. Ka rauka iaia e toou puapii Pipiria i te akaari atu kia koe e akapeea me kimikimi i te au manako taau e anoano ra. Inara, eiaa e apai i te au puka mei roto mai i te Are Uipaanga Patireia. E ka inangaro tatou kia akono meitakiia te au puka kia kore te reira e reporepo.

Te akamarama maira te Pipiria e e rauka ai “te kite i te Atua,” kia inangaro tikai tatou i te kimi marie i te reira “mei te apinga uunaia ra.” (Maseli 2:1-5) Ka riro te runanga puka o te Are Uipaanga Patireia ei tauturu ia koe kia akamata i taau kimikimi anga.

• Eaa te au apinga tauturu no te kimikimianga e vai ra i roto i te runanga puka o te Are Uipaanga Patireia?

• Koai ma ka rauka i te tauturu ia koe kia taangaanga meitaki i te runanga puka?