Kua akakite a Iesu Karaiti ki tana au pipi e: “To kotou mārama, kia kakā ïa ki mua i te aroaro o te tangata nei, kia akara ratou i ta kotou angaanga meitaki, e kia akameitaki ratou i to kotou Metua i te ao [rangi] ra.” (Mataio 5:16) Te taangaanga meitaki nei matou i te au apinga tekinoroti ou, e te Initaneti. Tei runga to matou ngai tei akamanaia i te website jw.org, te reira te au akakitekite anga no runga i ta matou au irinakianga e te au angaanga a te Au Kite o Iehova. Eaa ta te reira e akaari maira?

Au pauanga Pipiria no runga i te au uianga e ui putuputuia ana. Ka kite mai koe i te au pauanga o tetai au uianga puapinga tikai e ui ana te au tangata. Ei akaraanga, te nga aenga pepa Ka Ope Ainei te au tu Mamae?, Ka Ora Tikai Ainei Tei Mate? ka rauka i roto i te 600 tuma reo. Ka kite katoa koe i te New World Translation i roto i te 130 tuma reo tukeke e tetai au puka tauturu i te apii i te Pipiria, kapiti mai i te puka Eaa Tikai ta te Pipiria e Apii Maira? e te au itiu ou o Te Punanga Tiaki e te makatini E Ara! Ka rauka i te tatau i teia au puka e te makatini me kore i te akarongo ki te reira i runga i te initaneti me kore kia kopi i te reira ki runga i te vitio, MP3, PDF, me kore EPUB. Ka rauka ia koe i te kopi mai i tetai au kapi e kia tua atu ki te aronga ka inangaro mai i roto i to ratou reo! Ka rauka te au puka vitio i roto i te au reo akairo e manganui. Ka rauka ia koe i te kopi mai i te au tatau anga nuku Pipiria, te au nuku Pipiria, e te au imene manea ei akarongorongo anga naau me akangaroi koe.

Au akakitekiteanga tika no runga i te Au Kite o Iehova. Tei roto katoa i reira te au nuti ou e te au vitio no runga i ta matou au angaanga i te ao katoa nei, te au mea e tupu ra ki te Au Kite o Iehova, e ta matou tauturu anga i te au tangata. Ka kite koe i te au akakitekiteanga no runga i te au uruoaanga ka tupu mai e te au ngai no te ringi atu anga i to matou au opati manga.

Na roto i teia au mataara, te kaka nei te marama o te tuatua mou ki roto i te au tuanga mamao tikai o te enua. Te puapingaia ra te au tangata i te au enua ravarai, pera katoa i Antarctica. Te pure nei matou e kia akatotoa vivikiia ‘te tuatua a te Atua’ na roto i te au enua ravarai, ei akakaka anga i te Atua.—2 Tesalonia 3:1.

• Akapeea te jw.org i te tauturu atu anga i te au tangata kia apii i te tuatua mou Pipiria?

• Eaa taau ka inangaro i te akara i runga i ta matou website?