Inangaro te Atua kia mataora te au tangata i te oraanga i te enua nei. Kua anga aia i te enua e te au mea ravarai no tona inangaro i te au tangata. Kare e roa atu ka oronga mai aia i tetai oraanga meitaki atu a te tuatau ki mua no te au tangata i te au pa enua ravarai. Ka akaora mai aia i te au tangata mei te mamae.​—E tatau ia Ieremia 29:11.

 Kare i rauka ana i te au kavamani i te akakore atu i te takino anga, te maki, me kore te mate. Inara, e nuti meitaki tetai. Kare e roa atu ka mono te Atua i te au kavamani a te tangata ki tona uaorai kavamani. Ka mataora tona iti tangata i te kite i te au e te oraanga kopapa meitaki.​—E tatau ia Isaia 25:8; 33:24; Daniela 2:44.

 Ka ope te mamae me takore te Atua i te aronga kino mei te enua nei. (Zephania 2:3) Aea te reira e tupu ei? Kua totou te Tuatua a te Atua i te au turanga te takino ra i te au tangata i teia tuatau. Te akaari maira te au mea e tupu ra i te enua nei e kua vaitata te tuatau ka takore te Atua i te kino.​—E tatau ia 2 Timoteo 3:1-5.

 E apii tatou no runga i te Atua na roto i tana Tuatua, te Pipiria. Mei tetai reta rai te reira no ko mai i tetai metua aroa. Te akakite maira te reira e akapeea tatou e mataora ai i tetai oraanga meitaki atu i teianei e tetai oraanga mutu kore a te tuatau ki mua i te enua nei. Penei kare tetai pae e inangaro ia koe kia tauturuia kia marama i te Pipiria. Kare rava tatou e inangaro kia ngere tatou i teia oraanga meitaki atu a te tuatau ki mua.​—E tatau ia Maseli 29:25; Apokalupo 14:6, 7.