APII 6
Eaa te Manakonakoanga no Tei Mate?
1. Eaa te nuti meitaki no tei mate?
Tae anga a Iesu ki Betania vaitata atu kia Ierusalema, kua mate takere tona oa ko Lazaro e a ra. Kua aere atu a Iesu e Mareta raua ko Maria, te nga tuaine o te tangata tei mate, ki te ngai tanuanga. Kare i roa ana kua akaputuputu mai tetai urupu tangata. Te kite ra ainei koe i to Mareta e to Maria mataora te akatuakaou mai anga a Iesu ia Lazaro mei te mate?—E tatau ia Ioane 11:21-24, 38-44.
Kua kite ke ana a Mareta i te nuti meitaki no te aronga i mate. Kua kite aia e ka akatuakaou mai a Iehova i tei mate kia noo akaou ki runga i te enua nei.—E tatau ia Iobu 14:14, 15.
2. Eaa ra te turanga o tei mate?
Kua akakite te Atua kia Adamu e: “E one-pueu oki koe, e ka riro akaou rai koe ei one-pueu.”—GENESE 3:19.
Kua angaia mai te au tangata mei te one pueu. (Genese 2:7; 3:19) Kare e vaerua i roto ia tatou e kare e apinga i roto ia tatou e ora mai me mate tatou. Me mate tatou, kua mate rai to tatou roro, e kare to tatou manako e angaanga akaou. Kare a Lazaro i tuatua mai ana i tetai apinga i tona mate anga no te mea kare ana apinga i kite ana.—E tatau ia Salamo 146:4; Koheleta 9:5, 6, 10.
E tamamae ana ainei te Atua i te tangata ki te ai me mate ratou? I te mea e kua akakite mai te Pipiria e kare tei mate e kite mai i tetai apinga, e apiianga pikikaa te ai tamamae anga te akakino ra i te Atua. E mea rikarika kiaia te manako anga i te tamamae i te tangata ki te ai.—E tatau ia Ieremia 7:31.
Akara i te vitio Eaa ra te Turanga o Tei Mate?
3. Ka rauka ainei i tei mate kia tuatua mai kia tatou?
Kare tei mate e tuatua mai e e akarongo mai. (Salamo 115:17) Inara, e au angera kino tetai, penei ka tuatua mai ratou ki te tangata e ka akatutu mai ia ratou ei au tangata mate. (2 Petero 2:4) Te patoi pakari ra a Iehova i te tuatua ki te aronga tei mate.—E tatau ia Deuteronomi 18:10, 11.
4. Koai ma te ka akaora akaouia mai?
Mirioni ua atu tangata tei mate ka akaora akaouia mai ki te enua nei. Ka akatuakaouia mai tetai aronga kare i kite ana i te Atua e tei rave ana i te au angaanga kino.—E tatau ia Luka 23:43; Angaanga 24:15.
Ka apii te aronga tei akatuakaouia mai i te tuatua mou no runga i te Atua e ka irinaki ratou ia Iesu e ka akarongo kiaia. (Apokalupo 20:11-13) Ka mataora te aronga te ka akaora akaouia mai e tei rave i te au mea meitaki i tetai oraanga mutu kore i te enua nei.—E tatau ia Ioane 5:28, 29.
5. Eaa ta te tuakaouanga e akakite maira no runga ia Iehova?
Kua oronga mai te Atua i tetai manakonakoanga no tei mate na te tono mai anga i tana Tamaiti kia mate no tatou. No reira te akakite maira te tuakaouanga i to Iehova aroa e tona aroa takinga meitaki. Me akaora akaouia mai tei mate, koai ma tikai taau e inangaro ra kia kite?—E tatau ia Ioane 3:16; Roma 6:23.
