Kua tataia i roto i te Pipiria te nuti meitaki e ka noo te au tangata ki te enua nei e tuatau ua atu. (Salamo 37:29) E 66 au puka rikiriki i roto i te Pipiria. Kua taangaanga te Atua e 40 tangata kia tata i te reira. Na Mose i tata i te nga puka mua e rima mei tetai 3,500 mataiti i topa. Na te apotetoro ko Ioane i tata i te puka openga tere atu i te 1,900 mataiti i topa. Noai te au manako ta te au tangata tata Pipiria i tata? Kua komunikeiti te Atua ki te au tangata tata Pipiria na roto i tona vaerua tapu. (2 Samuela 23:2) Kua tata ratou i to te Atua au manako, kare i to ratou uaorai. No reira ko Iehova te Tumu Tata o te Pipiria.​—E tatau ia 2 Timoteo 3:16; 2 Petero 1:20, 21.

 Akara i te vitio Naai i Tata i te Pipiria?

 Kua kite tatou e no ko mai te Pipiria i te Atua no te mea te totou tika tikai maira te reira i te tuatau ki mua. Kare e rauka i tetai ua atu tangata i te rave i te reira. (Iosua 23:14) Ko te Atua Mana Katoatoa ua te kite tikai maira i te oraanga o te tangata no te tuatau ki mua.​—E tatau ia Isaia 42:9; 46:10.

 Ka irinaki atu tatou e kare e puka e rauka kia akaaiteia atu ki te puka no ko mai i te Atua. E pirioni ua atu kopi o te Pipiria tei tua aereia i roto i te au anere reo. Noatu e puka taito te Pipiria, te rotai ra te reira ki te apiianga taineti. Te aiteite katoa ra te manako o te aronga tata e 40 ki tetai e tetai. a Te tuatua katoa ra te Pipiria i to te Atua aroa, e ka rauka i te reira i te taui i te oraanga o te au tangata kia meitaki atu. Te akapapu ra teia ki te au mirioni tangata e ko te Pipiria te Tuatua a te Atua.​—E tatau ia 1 Tesalonia 2:13.

 Akara i te vitio Akapeea Tatou e Papu ei e te Tika ra te Pipiria?

 Te akakite maira te Pipiria i te nuti meitaki e e akakoroanga aroa to te Atua no te au tangata. Te akamarama maira te au Tuatua Tapu i te tumu i ngere ei te au tangata i te akameitakianga kia noo ki roto i tetai enua parataito i te akamataanga, e akapeea te parataito me akaoki akaouia mai.​—E tatau ia Apokalupo 21:4, 5.

 Tei roto katoa i te Tuatua a te Atua te au ture, au kaveinga, e te au akoanga. Te akakite maira te Pipiria i ta te Atua i rave ki te au tangata tei rave i te au mea meitaki e te au mea kino. E ka kite mai tatou mei teia au akaraanga i te tu o te Atua. Inara, ka tauturu te Pipiria ia koe kia marama no runga i te Atua. Te akamarama maira te reira akapeea koe me riro mai ei oa nona.​—E tatau ia Salamo 19:7, 11; Iakobo 2:23; 4:8.

 Ka tauturu teia poroutia ia koe kia marama i te Pipiria na te taangaanga anga i ta Iesu i taangaanga ana. Kua taiku aia i te au irava Pipiria e kua akamarama i “te tuatua i tataia ra.”​—E tatau ia Luka 24:27, 45.

 E meitaki atu te nuti meitaki no ko mai i te Atua i tetai atu au nuti ke. Inara, kare tetai aronga e reka ana i te reira, e e riri ana tetai pae i te reira. Auraka e maromaroa. Tei runga toou manakonakoanga no te ora mutu kore i toou marama anga no runga i te Atua.​—E tatau ia Ioane 17:3.