APII 06
Akapeea te Ora te Akamata Anga?
Ko te Atua “oki te tumu o te ora.” (Salamo 36:9) Kua irinaki ainei koe i teia? Kua manako tetai aronga e mea tupu ua te ora. Mei tera te tu, kua ora tatou na roto i te au mea tupu ua. No te mea kua anga te Atua ko Iehova i te oraanga, e akakoroanga to te reira, me kare ainei? a Akara i ta te Pipiria e akakite ra no te akamata anga o te ora e te tumu kia irinaki i te reira.
1. Akapeea te ao rangi e pini ua ake i te akamata anga?
Akakite te Pipiria: “I muatangana ra, kua anga iora te Atua i te rangi e te enua.” (Genese 1:1) Āriki te maata anga o te aronga taieni e e akamata anga to te ao rangi e pini ua ake. Akapeea te Atua me anga i te reira? Kua taangaanga aia i tona “mana ririnui”—te vaerua tapu—kia anga i te au mea ravarai o te ao rangi e pini ua ake, te vananga etu, te au etu, e te au paraneta.—Genese 1:2.
2. Eaa te Atua i anga ai te enua?
“Kare [a Iehova] i anga [i te enua] ei mea puapinga kore ua; kua anga ra aia kia tangataia.” (Isaia 45:18) Kua anga aia i te paraneta kia vai tinamou e kia tau no te tangata. (E tatau ia Isaia 40:28; 42:5.) Akakite maira te kite taieni e mea umere tikai te enua. Kua angaia teia paraneta kia meitaki te oraanga o te tangata.
3. Eaa te tuke i te tangata ki te manu?
Muri mai te angaia anga te enua, kua anga a Iehova i te ora. Mea mua, kua anga aia i te ngangaere e te manu. E oti, “kua anga iora oki te Atua i te tangata i tona uaorai tu.” (E tatau ia Genese 1:27.) Eaa ra te tuke ki te tangata? No te mea kua angaia tatou i to te Atua tu, ka rauka ia tatou te akaari i tona tu, mei te aroa e te tu tika. Kua anga katoa aia kia apii tatou i te reo, kia mareka i te au mea manea, e te akarongo i te imene. E tuke rai ki te manu, ka rauka ia tatou te akamori i Tei Anga ia tatou.
KIMI OONU
Akara i te akapapuanga e kua angaia te ora e ka tau kia irinakiia te au mea tei angaia i roto i te Pipiria. Akara i te au tu o te tangata te apii maira no runga i te Atua.
4. Angaia te ora
Kua akameitakiia te tangata no te au mea ta ratou i maani, te aru anga i te au mea natura. Koai i reira te ka akameitakiia no tei anga i te au mea natura? Akatangi i te VITIO, e oti uriuri i teia uianga ka aru mai.
-
Eaa ta te aronga karape i kopi mai mei te au mea natura?
Kua paraniia e kua akatuia te are e tetai tangata. Inara naai i parani e te anga i te au mea ravarai? E tatau ia Ebera 3:4, e oti uriuri i teia au uianga:
-
Eaa tetai o te au mea natura taau e reka ana?
-
E mea tau ainei kia irinaki e kua angaia te ao rangi e pini ua ake? Eaa ra?
Kua kite ainei koe?
Ka kitea te au atikara e te vitio i runga i te jw.org no te au atikara tukeke “E Mea Maaniia Ainei?” e te “Au Manako no te Akamataanga o te Oraanga.”
“E akatu oki to te au are ravarai nei; ko tei akatu ra i te au mea katoa, ko te Atua ïa”
5. Ka irinakiia te au mea tei angaia i roto i te Pipiria
Ia Genese pene 1, kua akakite mai te Pipiria i te akamataanga o te enua e te ora. Ka irinaki ainei koe i teia, me e tua maani ua? Akatangi i te VITIO, e oti uriuri i te uianga ka aru mai.
-
Te apii ra ainei te Pipiria e kua angaia te enua e te oraanga, i te ono rā e 24 ora te roa?
-
I toou manako ka irinakiia ainei te au mea tei angaia i roto i te Pipiria? Eaa ra, e eaa ka kore ei?
E tatau ia Genese 1:1, e oti uriuri i teia uianga:
-
Karanga te aronga taieni e akamataanga to te ao rangi e pini ua ake. Akapeea ta ratou i tuatua me akaaiteia ki taau i tatau i roto i te Pipiria?
Manako tetai pae e me kua taangaanga te Atua i te au mea tupu ua no te anga i te ora. E tatau ia Genese 1:21, 25, 27, e oti uriuri i teia uianga:
-
Te apii ra ainei te Pipiria e kua anga te Atua i te ora e oti kua tupu ua mai ei ika, ei puaka e ei tangata? Me kua anga aia i te au mea ora i to ratou “tu”? b
6. Anga te Atua i te tangata ma te manea
Tuke rai tatou ki te manu ta Iehova i anga. E tatau ia Genese 1:26, e oti uriuri i teia uianga:
-
No te mea kua angaia tatou i to te Atua tu, eaa ta te tu akaperepere e te tangi aroa e akaari maira no te Atua?
KARANGA TE TANGATA: “E tua maani ua te au mea i angaia i roto i te Pipiria.”
-
Eaa toou manako? Eaa ra?
APIIANGA
Anga a Iehova i te ao rangi e pini ua ake e te au mea ora.
Uriurianga
-
Eaa ta te Pipiria e apii maira no te akamata anga o te ao rangi e pini ua ake?
-
Kua tuku ainei te Atua i te au mea ora e tona tu kia tupu ua, me kua anga aia i te reira?
-
Eaa te mea manea i te tangata?
KIMI KIMI
Akara i te au mea umere mei te au mea natura.
“Eaa ta te au Mea Natura ka Apii Mai?” (E Ara!, Tepetema 2006)
Akara me akamārama tetai metua tane ki tana tamaiti i te au mea angaia i roto i te Pipiria.
Akara me te rotai ra te apiianga o te au mea tupu ua ki te Pipiria.
“Anga Ainei te Atua i te au mea Ora na Roto i te au mea Tupu ua Mai?” (Web atikara)
Akara me kua riro te au mea taito me kore te kimikimi anga taieni ei akaari me kua angaia te ora me e mea tupu ua te reira.
Ka Reka Katoa Koe i Teia
AU UIANGA A TE TANGATA
Eaa te Uriurianga Apii Pipiria Tei Orongaia e te Au Kite o Iehova?
Na roto i te uriurianga apii kare e tutaki tei orongaia e te Au Kite o Iehova, ka rauka ia koe i te taangaanga i tetai ua atu urianga o te Pipiria. E pati atu i toou ngutuare tangata me kore tetai au oa kia kapiti mai kia koe.
