APII 07
Mei Teaa to Iehova Tu?
Me akamanako koe i te Atua ko Iehova, eaa taau e manako ana? E tu kakā ainei tona e te mamao mei ia koe, tei aite ki te au etu e te vananga etu te mamao? Me kore te akamanako ra ainei koe iaia ei vaerua ririnui kare ona tu, tei aite ki te mangungu? Mei teaa tikai to Iehova tu? Na roto i tana Tuatua, te Pipiria, te akaari maira a Iehova i tona au tu, e tona inangaro ia koe.
1. Eaa tatou i kore ei e kite mata i te Atua?
“E Vaerua te Atua.” (Ioane 4:24) Kare o Iehova kopapa mei to tatou. E Vaerua aia i te rangi, e kare tatou e kite mata iaia.
2. Eaa tetai au tu o Iehova?
Noatu kare tatou e kite mata ia Iehova, e Peretana aia ma te au tu tei akaperepereia e te aronga tei kite iaia. Karanga te Pipiria: “E mea inangaro oki na Iehova te tuatua-tau, kare oki aia e akaruke i tona aronga tapu ra.” (Salamo 37:28) E tu “aroa e te takinga-meitaki maata,” tona ki te aronga tikai te mamae ra. (Iakobo 5:11) “Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.” (Salamo 34:18) Kua kite ainei koe e ka riro ta tatou e rave ra ei mea mataora me kore ei mea maromaroa kia Iehova? Te tangata tei iki i te rave i te kino ka akamaromaroa te reira iaia. (Salamo 78:40, 41) Inara te tangata tei rave i te meitaki ka mataora aia.—E tatau ia Maseli 27:11.
3. Akapeea a Iehova me akaari e te akaperepere ra aia ia tatou?
Ko te aroa to Iehova tu puapinga rava atu. “Ko te Atua oki te aroa.” (1 Ioane 4:8) Te akaari maira a Iehova i tona aroa, kare na roto anake i te Pipiria, mari ra na roto katoa i tana au mea i anga. (E tatau ia Angaanga 14:17.) Akamanako ana i teia akaraanga, akapeea aia te anga anga ia tatou. Kua oronga mai aia i te ravenga kia kite tatou i te au kara manea, kia rongo i te au akatangi anga imene taurekareka, e te tongi i te au kai reka. Te inangaro ra aia ia tatou kia rauka te oraanga mataora.
KIMI OONU
Akara eaa ta Iehova i taangaanga no te akatupu i te au mea umere. E oti akara akapeea a Iehova te akaari anga mai i tona au tu manea.
4. Vaerua tapu—te mana ririnui o te Atua
Me taangaanga tatou i to tatou rima no te rave angaanga, ka taangaanga a Iehova i tona vaerua tapu no te reira. Te akaari maira te Pipiria, kare te vaerua tapu i te peretana, mari ra e mana ririnui no te Atua no te rave i tana angaanga. E tatau ia Luka 11:13 e Angaanga 2:17, e oti uriuri i teia au uianga:
-
Ka “riringi” te Atua i tona vaerua tapu ki runga i te aronga tei pati i te reira. I toou manako, e peretana ainei te vaerua tapu, me e mana ririnui no te Atua? Eaa taau pauanga i pera ei?
Taangaanga a Iehova i tona vaerua tapu ei akatupu i te au mea umere. E tatau ia Salamo 33:6 e 2 Petero 1:20, 21, e oti uriuri i teia uianga:
-
Eaa tetai au ravenga e taangaanga ana a Iehova i tona vaerua tapu?
5. E au tu manea to Iehova
E tangata tiratiratu a Mose tei akamori i te Atua, kua inangaro aia i te kite meitaki i Tei Anga iaia. Karanga a Mose kiaia: “E akakite mai koe kiaku i toou aerenga, e kia kite au ia koe.” (Exodo 33:13) Pau mai a Iehova, e kua akaari i tetai o Tona au tu kia Mose. E tatau ia Exodo 34:4-6, e oti uriuri i teia au uianga:
-
Eaa te au tu o Iehova tana i akaari kia Mose?
-
Eaa te au tu o Iehova taau e reka ra?
6. Akono a Iehova i tona iti tangata
E tuikaa te iti tangata o te Atua, te au Epera, i Aiphiti. Eaa to Iehova manako i to ratou mamae? Akatangi i te AUTIO e oti aru, me kore tatau ia Exodo 3:1-10. E oti uriuri i teia au uianga.
-
Eaa ta teia irava e akakite maira i to Iehova manako no te mamae o te tangata?—Akara i te irava 7 e te 8.
-
I toou manako te inangaro ra ainei a Iehova i te tauturu i te tangata? Eaa ra, e eaa ka kore ei?
7. Te akaari maira te ao natura i to Iehova au tu
Te akaari maira a Iehova i tona au tu na roto i te au mea tana i anga. Akatangi i te VITIO. E oti tatau ia Roma 1:20, e te uriuri i teia uianga.
-
Eaa te au tu o Iehova taau e kite ra i roto i te au mea tana i anga?
KARANGA TE TANGATA: “Kare te Atua i te peretana, e mana ririnui aia i te au ngai ravarai.”
-
Eaa toou manako?
-
Eaa koe i manako akapera ei?
APIIANGA
E Vaerua kitea koreia a Iehova ma tona au tu manea, koia tikai te aroa.
Uriurianga
-
Eaa tatou ka kore ei e kite mata ia Iehova?
-
Eaa te vaerua tapu?
-
Eaa tetai o to Iehova au tu?
KIMI KIMI
E akamaata atu i toou mārama ia Iehova na te apiianga e ā au tu puapinga.
“Mei Teaa ra te tu o te Atua?” (Te Punanga Tiaki Nu. 1 2019)
Akamanako i te akapapuanga e kare a Iehova i te au ngai ravarai.
Akara eaa te Pipiria i taiku ei i te vaerua tapu e ko te rima o te Atua.
Kua ngata i tetai tangata matapo i te irinaki e ka akono te Atua iaia. Akara eaa aia i taui ei i tona manako.
“Ka Rauka Iaku te Tauturu i Tetai ke i Teianei” (Te Punanga Tiaki, Noema 1, 2015)
Ka Reka Katoa Koe i Teia
AU UIANGA A TE TANGATA
Eaa te Uriurianga Apii Pipiria Tei Orongaia e te Au Kite o Iehova?
Na roto i te uriurianga apii kare e tutaki tei orongaia e te Au Kite o Iehova, ka rauka ia koe i te taangaanga i tetai ua atu urianga o te Pipiria. E pati atu i toou ngutuare tangata me kore tetai au oa kia kapiti mai kia koe.
