APII 13
Akapeea te Akonoanga Pikikaa te Akakinoanga i te Atua
Me e aroa to te Atua, eaa i maata ai te angaanga kino a te au akonoanga? Taka meitaki, kare te au akonoanga e akakite ana i te tika; e te akakino ra ratou i te Atua. Akapeea ratou te akakino anga iaia? Eaa tona manako no te reira? E eaa tana ka rave no te reira?
1. Akapeea te akonoanga pikikaa te akakino anga i te Atua na roto i ta ratou au apiianga?
Na te au akonoanga pikikaa i “ruri ke i te tuatua-mou no te Atua ra ei pikikaa.” (Roma 1:25) Ei akaraanga, kare te maata anga o te au akonoanga i apii ana i te ingoa o te Atua ki te tangata. Te karanga maira te Pipiria kia taangaangaia to te Atua ingoa. (Roma 10:13, 14) Karanga tetai au arataki akonoanga me tupu te kino, ko te anoano te reira o te Atua. Inara e pikikaa te reira. Kare rava te Atua e akatupu ana i te kino. (E tatau ia Iakobo 1:13.) Ma te mii, kua riro te au pikikaa a te au akonoanga ei akatakake i te tangata mei te Atua.
2. Akapeea te au akonoanga pikikaa te akakino anga i te Atua na roto i tana e rave ra?
Kare te akonoanga pikikaa e akono meitaki ana i te tangata mei ta Iehova rai e rave ana. Karanga te Pipiria “kua taea oki te rangi i tana au ara.” (Apokalupo 18:5) E anere ua atu mataiti i teianei, te o anga te au akonoanga ki roto i te angaanga poritiki, te tamaki, e kua akatupu me kore kua akatika kia tamateia eia ua atu tangata. Te reka ra tetai au arataki akonoanga i te oraanga apinganui e te maro anga i te tangata no ta ratou moni ei turu i te reira. Te akaari maira teia e kare ratou i kite i te Atua, e kare o ratou tika anga kia kauono iaia.—E tatau ia 1 Ioane 4:8.
3. Eaa to te Atua manako i te akonoanga pikikaa?
Me te riri ra koe i te angaanga a te au akonoanga pikikaa, eaa i reira to Iehova manako no te reira? Te akaperepere ra aia i te tangata, inara te riri ra aia i te au arataki akonoanga tei akakino iaia e te takinokino i te tangata. Kua taputou aia i te takore i te akonoanga pikikaa “e e kore rava e kitea akaouia atu.” (Apokalupo 18:21) Kare e roa, ka takore te Atua i te au akonoanga pikikaa katoatoa.—Apokalupo 18:8.
KIMI OONU
Apii kia kite koe i to te Atua manako no te akonoanga pikikaa. Eaa ta te reira i rave, e auraka e akariro i teia kia tāpu ia koe kia kite ia Iehova.
4. Kare te Atua e mareka ana i te au akonoanga katoatoa
E manganui te tangata tei irinaki e tukeke te mataara ki te Atua. E tika ainei te reira? E tatau ia Mataio 7:13, 14, e oti uriuri i teia uianga:
-
Akapeea te Pipiria te akakite anga mai i te mataara ki te ora mutu kore?
Akatangi i te VITIO, e oti uriuri i te uianga ka aru mai.
-
Te karanga ra ainei te Pipiria e e manganui te akonoanga te mareka ra te Atua?
5. Kare te akonoanga pikikaa e akaari ana i to te Atua aroa
Kua akakino te au akonoanga i te Atua. Tetai mea kino, na te piri anga ki roto i te tamaki. Ei akaraanga, akatangi i te VITIO. E oti uriuri i te au uianga ka aru mai.
-
Eaa te turanga o te au akonoanga i te tuatau o te Tamaki II o te Ao?
-
Eaa toou manako i ta ratou i rave?
E tatau ia Ioane 13:34, 35 e 17:16. E oti uriuri i teia au uianga:
-
Eaa to Iehova manako me o te au akonoanga ki roto i te tamaki?
-
Ka akaapaia te au akonoanga pikikaa no te kino tei tupu. Eaa taau e kite ra e kare te au akonoanga e akaari ana i to te Atua aroa?
Kare te au akonoanga pikikaa e akaari ana i te aroa o te Atua
6. Inangaro te Atua i te akarangatira i te tangata mei te akonoanga pikikaa
E tatau ia Apokalupo 18:4, a e oti uriuri i teia uianga:
-
Eaa toou manako me kite koe e te inangaro ra te Atua i te akaora i te tangata tei akavareia e te akonoanga pikikaa?
7. E apii tamou no runga i te Atua mou
Ka riro ainei te akonoanga pikikaa ei taui i toou manako no te Atua? Akamanako ana i te tamaiti tei kopae i te arataki anga meitaki a tona metua. Akaruke atura te tamaiti i te kainga e kua rave atura i te kino. Kare te metua e mareka ana i te tu o tana tamaiti. Eaa te tumu kare te metua e akaapaia no te tu meameau o tana tamaiti?
-
E tau ainei kia akaapa ia Iehova e kia akamutu i te apii no runga iaia no te tu kino o te akonoanga pikikaa?
KARANGA TE TANGATA: “Kare au e mareka ana i te Atua no te mea na te au akonoanga e akatupu ana i te manamanata.”
-
Ko toou manako ainei teia?
-
Eaa te tumu kare te au akonoanga pikikaa e takino i toou manako no runga ia Iehova?
APIIANGA
Kua akakino te akonoanga pikikaa i te Atua na roto i tana au apiianga e te angaanga kikino. Ka takore te Atua i te au akonoanga pikikaa.
Uriurianga
-
Eaa toou manako i ta te akonoanga pikikaa e apii ra e e rave ra?
-
Eaa to Iehova manako i te akonoanga pikikaa?
-
Eaa ta te Atua ka rave ki te akonoanga pikikaa?
KIMI KIMI
Apii kia kite e rua mataara kare te Atua e mareka ana i te maata anga o te au akonoanga.
“Aiteite Ainei te au Akonoanga Katoatoa? Te Arataki ra Ainei te Reira ki te Atua?” (Web atikara)
Eaa a Iehova i inangaro ei ia tatou kia akamori kapiti iaia?
“Ka Anoanoia Ainei Koe Kia Piri ki Tetai Akonoanga?” (Web atikara)
Kua manata tetai orometua i tana akonoanga. Inara kare teia i arai ana iaia kia apii i te tuatua mou no runga i te Atua.
“Te Tumu i Akaruke ei Tetai Orometua i Tana Akonoanga” (E Ara!, Peperuare 2015)
Kua roa i teianei te pikikaa anga te au akonoanga e e mamao te Atua mei ia tatou e te kino. Apii kia kite i te tika no teia pikikaa e toru.
a Kia kite eaa te puka a Apokalupo i akataka ei i te akonoanga pikikaa e ko te vaine ko Babulonia Maata, akara i te Au Manako Poto 1.
Ka Reka Katoa Koe i Teia
AU UIANGA A TE TANGATA
Eaa te Uriurianga Apii Pipiria Tei Orongaia e te Au Kite o Iehova?
Na roto i te uriurianga apii kare e tutaki tei orongaia e te Au Kite o Iehova, ka rauka ia koe i te taangaanga i tetai ua atu urianga o te Pipiria. E pati atu i toou ngutuare tangata me kore tetai au oa kia kapiti mai kia koe.
