APII 16
Eaa ta Iesu i Rave Iaia i te Enua Nei?
E maata te tangata te manako ra ia Iesu ei pepe varevare, ei peroveta meitaki, me kore ei tangata mate. Inara e maata atu ainei ta tatou ka apii mai na te akara matatio anga i tona oraanga i te enua nei? I teia apii, ka akamanako tatou i tetai au mea puapinga ta Iesu i rave e akapeea te reira me tauturu ia koe?
1. Eaa ta Iesu angaanga puapinga?
Ta Iesu angaanga puapinga, ko te “tutu aere . . . i te evangelia o te basileia o te Atua.” (E tatau ia Luka 4:43.) Kua tutu aere aia i te nuti meitaki e ka akatumu te Atua i tetai patireia, me kore kavamani, te ka rapakau i te manamanata o te tangata. a Kua akakite maroiroi a Iesu i te karere meitaki no tetai toru e te apa mataiti.—Mataio 9:35.
2. Eaa te akakoroanga o te au temeio a Iesu?
Akakite te Pipiria i “te au angaanga mana, e te mea umere, e te au akairo, ta te Atua i rave [na roto ia Iesu].” (Angaanga 2:22) Na roto i te mana o te Atua, kua rauka ia Iesu te akatere i te reva, te angai i te tauatini ua atu tangata, te akaora i te maki, e te akatu mai i tei mate ra. (Mataio 8:23-27; 14:15-21; Mareko 6:56; Luka 7:11-17) Kua akataka meitaki mai te au temeio a Iesu e na te Atua aia i tono mai. Kua akaari katoa mai te reira e e mana to Iehova i te rapakau i to tatou au manamanata.
3. Eaa ta tatou ka apii mai mei te oraanga o Iesu?
Kua akarongo ua a Iesu kia Iehova. (E tatau ia Ioane 8:29.) Noatu te patoi anga, kua rave tiratiratu a Iesu i ta tona Metua i pati kiaia e tae ua atu ki tona mate anga. Kua akapapu aia e ka rauka i te tangata i te tavini i te Atua, noatu te au turanga ngata. Kua akaruke mai a Iesu i “te akaraanga [no tatou], kia aru [tatou] i tona takainga vaevae.”—1 Petero 2:21.
KIMI OONU
Akamanako akapeea a Iesu te tutu aere anga i te nuti meitaki e te rave i te au temeio.
4. Tutu aere a Iesu i te nuti meitaki
Kua aaere a Iesu e anere ua atu maire na runga i te mataara pueu, te tutu aere anga i te nuti meitaki ki te tangata. E tatau ia Luka 8:1, e oti uriuri i teia au uianga:
-
Kua tutu aere ainei a Iesu ki te tangata tei akarongo mai kiaia?
-
Eaa ta Iesu i rave maroiroi no te kimi i te tangata?
Kua totou te Atua e ka tutu aere te Mesia i te nuti meitaki. E tatau ia Isaia 61:1, 2, e oti uriuri i teia au uianga:
-
Akapeea a Iesu te akatupu anga i teia totou?
-
I toou manako ka anoanoia ainei te tangata kia akarongo i teia nuti meitaki?
5. Apii a Iesu i te au tuatua mou puapinga
I te pae i te tutu aere anga i te nuti meitaki no te Patireia o te Atua, kua apii a Iesu i te apiianga meitaki. Akamanako i tetai au akaraanga mei tana Ako i te Maunga. E tatau ia Mataio 6:14, 34 e te 7:12, e oti uriuri i teia au uianga:
-
Eaa te au ako anga tau ta Iesu i oronga mai mei teia au irava?
-
I toou manako e puapinga ainei teia au ako anga?
6. Rave a Iesu i te au temeio
Kua oronga a Iehova i te mana kia Iesu kia rave i te au temeio. Kia kite i tetai akaraanga, e tatau ia Mareko 5:25-34 me kore akatangi i te VITIO. E oti uriuri i teia au uianga ka aru mai.
-
I teia vitio, eaa ta teia vaine maki i irinaki?
-
Eaa taau i umere ana no teia temeio?
E tatau ia Ioane 5:36, e oti uriuri i teia uianga:
-
Eaa ta Iesu au temeio tei “akatika mai,” e tei akapapu mai no runga iaia?
Kua kite ainei koe?
Te maata anga i ta tatou i kite no Iesu, no roto mai i te au puka Pipiria e a o te Evangelia—Mataio, Mareko, Luka, e Ioane. Tukeke ta te au tata Evangelia i akakite no Iesu. Kua riro teia ei akatupu i tetai akatutuanga manea i tona oraanga.
-
MATAIO
kua tata aia i tana Evangelia mua. Kua akataka meitaki te reira i ta Iesu au apiianga, no runga tikai i te Patireia o te Atua.
-
MAREKO
kua tata aia i te Evangelia poto ua. Kua akakite te reira i te au tupuanga umere tikai.
-
LUKA
kua akakite aia i te puapinga o te pure e akapeea a Iesu te akono anga i te vaine.
-
IOANE
kua akataka aia i to Iesu tu na te akakite anga i ta Iesu au pukapuka anga ki tona au oa piri mou e tetai ke.
KARANGA TE TANGATA: “E tangata meitaki ua a Iesu, e kare atu.”
-
Eaa toou manako?
APIIANGA
Kua tutu aere a Iesu i te Patireia o te Atua, kua rave aia i te au temeio, e kua akarongo ua kia Iehova.
Uriurianga
-
Eaa ta Iesu angaanga puapinga i rave i te enua nei?
-
Eaa ta te au temeio a Iesu i akapapu mai?
-
Eaa te au apiianga meitaki ta Iesu i apii?
KIMI KIMI
Eaa te tumu manako maata ta Iesu i akakite?
“Te Patireia o te Atua—Te Tumu i Puapinga ai Kia Iesu” (Te Punanga Tiaki, Noema 1, 2014)
Akamanako eaa tatou ka irinaki ei e kua tupu ta Iesu au temeio.
“Te Au Temeio a Iesu—Eaa Taau ka Kite?” (Te Punanga Tiaki, Tiurai 15, 2004)
Tatau akapeea te akaraanga akaatinga ua o Iesu te akakeu anga i tetai tangata.
“Akamanako ua au Iaku Uaorai” (Te Punanga Tiaki, Noema 1, 2014)
Akara i te au angaanga tutu aere ma te puapinga ta Iesu i rave tei akapapa meitakiia.
“Main Events of Jesus’ Earthly Life” (New World Translation of the Holy Scriptures, Appendix A7)
a Apii 31-33, ka uriuri maata atu teia i te Patireia o te Atua.