APII 17
Mei Teaa to Iesu Tu?
Ia tatou e apii ra i te au akakiteanga a Iesu e tana i rave i te enua nei, kua kite mai tatou i tona au tu e kua akavaitata tatou kiaia e tona Metua, ko Iehova. Eaa tetai o teia au tu manea nona? E akapeea tatou me aru i to Iesu akaraanga?
1. Eaa to Iesu au tu tei aite ki tona Metua?
I te rangi, kua akara ana a Iesu i tona Metua aroa e kua apii mei tana i rave no tetai pirioni ua atu mataiti. Tei tupu, kua manako, kua akara, e kua rave aia mei Iaia rai. (E tatau ia Ioane 5:19.) Te tika, kua akaari meitaki a Iesu i te tu o tona Metua na te karanga anga: “Ko te akara mai iaku nei, kua akara ïa i te Metua.” (Ioane 14:9) Ia koe e apii ra i te tu o Iesu, ka kite meitaki atu koe i te tu o Iehova. Ei akaraanga, kua riro to Iesu tu tangi aroa ei akaari i to Iehova akaperepere ia koe.
2. Akapeea a Iesu te akaari anga e te akaperepere ra aia ia Iehova?
Karanga a Iesu: “Kia kite ra to te ao e, te anoano nei au i te Metua; e te akono nei au i ta te Metua i akaue mai iaku ra.” (Ioane 14:31) Iaia i te enua nei, kua akaperepere maata a Iesu i tona Metua na te akarongo anga kiaia noatu e ngata te reira. Mareka tikai a Iesu i te tuatua ua no runga i tona Metua e kua tauturu i tetai ke kia rauka tetai pirianga oa Kiaia.—Ioane 14:23.
3. Akapeea a Iesu te akaari anga e te akaperepere ra aia i te tangata?
Karanga te Pipiria “tei te au tamariki a te tangata ra [to Iesu] mataora anga.” (Maseli 8:31) Kua akaari aia i tona aroa na te akamaroiroi anga e te tauturu ua i te tangata. Kua rave aia i te au temeio e kua akaari i tona ririnui e tona tu tangi aroa. (Mareko 1:40-42) Kua akono meitaki aia i te tangata ma te tu papakitai kore. Kua akapumaana tana au tuatua ma te manakonakoanga i te aronga ngakau meitaki tei akarongo mai. Kua akaatinga a Iesu iaia uaorai kia mamae e kia mate no tona aroa i te tangata katoatoa. Te akaperepere tikai ra aia i te aronga tei aru i tana apiianga.—E tatau ia Ioane 15:13, 14.
KIMI OONU
E apii maata atu kia kite i to Iesu tu. E akamanako akapeea me akaari i te aroa e te tu oronga ua mei iaia rai.
4. Akaperepere a Iesu i tona Metua
Te apii maira to Iesu akaraanga akapeea tatou me akaari i to tatou aroa no te Atua. E tatau ia Luka 6:12 e Ioane 15:10; 17:26. Muri ake i te tatau anga i teia irava, uriuri i teia uianga:
-
Me aru tatou i te tu o Iesu, akapeea tatou me akaari e te akaperepere ra tatou ia Iehova?
Akaperepere a Iesu i tona Metua i te rangi e kua tuatua putuputu kiaia na roto i te pure
5. Te manako ra a Iesu i te anoano o te tangata
Kua tuku a Iesu i te anoano o te tangata i mua ake i tona. Noatu e kua roiroi aia, kua taangaanga aia i tona taime e te maroiroi i te tauturu i te tangata. E tatau ia Mareko 6:30-44, e oti uriuri i teia au uianga:
-
I roto i teia irava, akapeea a Iesu te akaari anga e te manako atura aia i tetai ke?—Akara i te irava 31, 34, 41, e te 42.
-
Eaa tei akakeu ia Iesu kia tauturu i te tangata?—Akara i te irava 34.
-
No te mea te akaari ra a Iesu i to Iehova tu, eaa ta teia e apii maira no runga ia Iehova?
-
Eaa tetai au ravenga ka rauka ia tatou i te aru i to Iesu tu, na te manako anga i tetai ke?
6. Tu oronga ua to Iesu
E tu oronga ua to Iesu noatu kare e maata ana tana au apinga, e kua akamaroiroi aia ia tatou kia pera. E tatau ia Angaanga 20:35, e oti uriuri i teia uianga:
-
Kia tau kia Iesu, akapeea tatou e mataora ai?
Akatangi i te VITIO, e oti uriuri i te uianga ka aru mai.
-
Eaa tetai au ravenga ka rauka ia tatou i te oronga atu, noatu kare e maata ana ta tatou apinga?
Kua kite ainei koe?
Te apii maira te Pipiria ia tatou kia pure kia Iehova na roto i te ingoa o Iesu. (E tatau ia Ioane 16:23, 24.) Me pure tatou, te āriki ra tatou i ta Iesu i rave ei tauturu ia tatou kia riro ei oa no Iehova.
KARANGA TE TANGATA: “Kare te Atua e manako mai ana i to tatou mamae.”
-
Mei te mea kua aru a Iesu i te tu o tona Metua, akapeea tana i rave te akapapu anga mai e te manako maira a Iehova ia tatou?
APIIANGA
Akaperepere a Iesu ia Iehova, e te akaperepere ra aia i te tangata. Mei te mea kua aite a Iesu ki tona Metua, ko te maata i ta tatou ka kite no Iesu, te maata atu ïa i taau ka kite no Iehova.
Uriurianga
-
Akapeea tatou me akaari e te akaperepere ra tatou ia Iehova, mei ia Iesu rai?
-
Akapeea tatou me akaari i te aroa no te tangata, mei ia Iesu rai?
-
Eaa taau mea reka rava atu i to Iesu tu?
KIMI KIMI
Akamanako i tetai au tu o Iesu ka rauka ia tatou i te aru.
“Ei Aru ia Iesu, Kia . . .” (Iesu—Te Mataara, te Tuatua Mou, te Ora, kapi 317)
Apii kia kite i te puapinga kia pure na roto i te ingoa o Iesu.
“Eaa ka Pure ei ma to Iesu Ingoa?” (Te Punanga Tiaki, Aperira 1, 2008)
Te akakite ra ainei te Pipiria mei teaa te tu akaraanga o Iesu?
Eaa ta tatou ka apii mai mei te tu i akono ei a Iesu i te au vaine?
“Akangateitei no te Vaine i Roto i te Akanoonooanga a te Atua” (Te Punanga Tiaki, Tepetema 1, 2012)
Ka Reka Katoa Koe i Teia
AU UIANGA A TE TANGATA
Eaa te Uriurianga Apii Pipiria Tei Orongaia e te Au Kite o Iehova?
Na roto i te uriurianga apii kare e tutaki tei orongaia e te Au Kite o Iehova, ka rauka ia koe i te taangaanga i tetai ua atu urianga o te Pipiria. E pati atu i toou ngutuare tangata me kore tetai au oa kia kapiti mai kia koe.
