APII 22
Akapeea Koe me Tutu Aere i te Nuti Meitaki?
Ia koe e apii ra i te au tuatua mou Pipiria, penei ka manako koe, ‘Ka anoanoia te katoatoa kia kite i teia!’ Ae, e tika rai! Inara, penei ka mataku koe i te akakitekite i taau e apii ra. Ka uriuri tatou akapeea koe e kore ei e rū e kia mataora i te tutu aere i te nuti meitaki o te Pipiria.
1. Akapeea koe me tutu aere i taau i apii ki te tangata kua matau koe?
Karanga te au pipi a Iesu: “Kare oki matou e tika kia kore e tuatua i ta matou i akara akenei, e ta matou i akarongo akenei.” (Angaanga 4:20) Akaperepere ratou i te tuatua mou e kua akakitekite i te reira ki te katoatoa. E manako ana ainei koe i teia? Me koia ia, e kimi i tetai atianga kia pukapuka ki toou pamiri e te au oa i taau e apii ra.—E tatau ia Kolosa 4:6.
Tetai au ravenga no te akamata
-
Me pukapuka ki te pamiri, akamata koe i tetai manako Pipiria na te karanga anga: “Apii mai au i tetai manako puapinga i teia epetoma.”
-
Oronga i tetai irava akamaroiroi ki te oa tei makiia me kore tei apiapi.
-
Me ui mai toou au oa angaanga peea toou epetoma, e akakite i taau i kite mei te apii Pipiria me kore i te uipaanga.
-
Akaari ki toou au oa i ta tatou jw.org website.
-
Pati i tetai ke kia piri mai ki taau apii Pipiria, me kore e akaari akapeea me pati i tetai apii Pipiria i runga i te jw.org.
2. Eaa i puapinga ai kia kapiti ki te putuputuanga no te tutu aere?
E maata atu ta te au pipi a Iesu i rave no te tutu aere i te nuti meitaki ki te tangata ta ratou i kite. Kua “tataki toko rua atura [a Iesu] i te tono anga ia ratou na mua iaia i te au oire” kia tutu aere. (Luka 10:1) Kua akaaere meitakiia te angaanga tutu aere, e e maata te tangata tei akarongo mai. Mataora tikai te au pipi i te tutu aere. (Luka 10:17) Ka rauka ainei ia koe kia kapiti ki te putuputuanga no te tutu aere?
KIMI OONU
Akamanako akapeea koe e kore ei e rū e kia mataora i te tutu aere i te nuti meitaki.
3. Tei te pae a Iehova ia koe
Penei ka rū tetai pae i te tuatua e ka mataku i te tangata.
-
E rū ana ainei koe i te akakitekite i taau e apii ra? Eaa ra, me kore eaa ka kore ei?
Akatangi i te VITIO, e oti uriuri i teia au uianga ka aru mai.
-
Akapeea teia au mapu Au Kite i kore ei i mataku?
E tatau ia Isaia 41:10, e oti uriuri i teia uianga:
-
Me mataku koe i te tutu aere, akapeea te pure me tauturu ia koe?
Kua kite ainei koe?
E maata te Au Kite o Iehova i manako ana e kare rava ratou e tutu aere i te nuti meitaki ki tetai ke. Tetai akaraanga ko Sergey, kua manako e e puapinga kore ua aia, e te ngata i te tuatua ki tetai ke. Inara kua apii meitaki aia i te Pipiria. Karanga aia: “Noatu toku mataku, kua akamata au i te akakitekite i taku e apii ra. E kua akamaroiroiia au kia akakitekite i te au tuatua mou o te Pipiria. Kua akamatutu te reira i toku au irinakianga ou.”
4. Akaari i te tu akangateitei
Me tutu aere i te nuti meitaki, e akamanako eaa taau ka tuatua e akapeea me tuatua i te reira. E tatau ia 2 Timoteo 2:24 e 1 Petero 3:15, e oti uriuri i teia au uianga:
-
Akapeea koe me taangaanga i teia au irava me tuatua koe ki tetai ke no runga i te Pipiria?
-
Penei kare tetai au ngutuare tangata e te au oa e āriki mai. Eaa taau ka rave? Eaa taau kare e rave?
-
Eaa i puapinga ai kia taangaanga i te au uianga meitaki, eiaa e māro atu i taau irinakianga?
5. Tupu te mataora me tutu aere i te nuti meitaki
Kua oronga a Iehova i te angaanga tutu aere i te nuti meitaki kia Iesu? Eaa te manako o Iesu no te reira? E tatau ia Ioane 4:34, e oti uriuri i teia au uianga:
-
Ka mataora tatou me kai i te au kai memeitaki. Eaa a Iesu i akaaite ei i te rave i to te Atua anoano—ki te tutu aere i te nuti meitaki—e te kai i te au kai memeitaki?
-
Eaa te au akameitakianga mataora me tutu aere i te nuti meitaki?
Tetai au tauturu
-
I te tuatau o te uipaanga epetoma, e kimi i te au ravenga no te akamata i tetai pukapuka anga.
-
Ei tangata apii, akamanako no te akatutu i tetai apii Pipiria i te uipaanga epetoma. Ka tauturu teia ia koe kia akapapa no te akakitekite atu i taau e apii ra.
-
Taangaanga i te tuanga, “Karanga te Tangata” me kore “Me Ui Mai te Tangata” o teia apii e akapeea koe me pau i te au uianga e te au patoi anga.
ME UI MAI TE TANGATA: “Eaa te nuti?”
-
Eaa taau ka akakite ki tetai tangata no runga i taau i apii mai mei te Pipiria?
APIIANGA
Ka mataora koe me tutu aere i te nuti meitaki, e ka māmā ua me akamata koe i te reira.
Uriurianga
-
Eaa ka tutu aereia ai te nuti meitaki ki te tangata?
-
Akapeea koe me rave i te reira na roto i te tu akangateitei?
-
Akapeea koe e kore ei e rū me tutu aere?
KIMI KIMI
Akamanako e ā au ravenga no te tutu aere i te nuti meitaki na te taangaanga anga i te kāti jw.org.
Apii kia kite e ā au tu ei tauturu ia koe kia akakite i te nuti meitaki.
“Papa Ainei Koe Kia Riro ei Ravakai Tangata?” (Te Punanga Tiaki, Tepetema 2020)
Akara akapeea tetai akaraanga Pipiria me akamaroiroi ia tatou kia tutu aere i te nuti meitaki, noatu e mapu tatou.
Kimi akapeea koe me tuatua no runga i te Pipiria ki toou ngutuare tangata kare i kite ia Iehova.
“Akakeu i te Ngakau o te Kopu Tangata Irinaki Kore” (Te Punanga Tiaki, Mati 15, 2014)
Ka Reka Katoa Koe i Teia
AU UIANGA A TE TANGATA
Eaa te Uriurianga Apii Pipiria Tei Orongaia e te Au Kite o Iehova?
Na roto i te uriurianga apii kare e tutaki tei orongaia e te Au Kite o Iehova, ka rauka ia koe i te taangaanga i tetai ua atu urianga o te Pipiria. E pati atu i toou ngutuare tangata me kore tetai au oa kia kapiti mai kia koe.
