Kua apii a Iesu e ka anoanoia te papetitoanga no te au Kerititiano. (E tatau ia Mataio 28:​19, 20.) Eaa te papetitoanga? E eaa taau ka rave no te papetitoanga?

1. Eaa te papetitoanga?

Te tuatua “papetito,” no roto mai te reira i te tuatua Ereni, te aiteanga “kia taruku” ki roto i te vai. Te papetitoia anga a Iesu, kua tarukuia aia ki roto i te Vai Ioridana, e kua tu mai aia “mei raro i te vai.” (Mareko 1:9, 10) Ka pera katoa te au Kerititiano mou me papetitoia, ka tarukuia, me kore ka tukuia ki roto i te vai.

2. Eaa te ka tupu me papetito?

I te papetitoanga, te akaari maira tetai tangata e kua akatapu aia iaia uaorai ki te Atua ko Iehova. Akapeea tetai tangata me rave i teia akatapu anga? Na roto i tana pure i mua ake i te papetitoanga, ka akakite aia kia Iehova e ka inangaro aia i te tavini Iaia e tuatau ua atu. Ka taputou aia i te akamori anake ia Iehova e kia rave i tona anoano, ei mea puapinga rava i tona oraanga. Ka “akaruke aia iaia uaorai e . . . ka aru” i ta Iesu au apiianga e tona akaraanga. (Mataio 16:24) No tona akatapu anga e te papetitoanga, i rauka ai ia Iesu tetai pirianga oa vaitata kia Iehova e te aronga tei akamori iaia.

3. Akapeea tetai tangata e tere ei ki mua kia papetitoia?

Ka akapapa koe no te papetitoanga na te apiianga no runga ia Iehova e kia akarongo kiaia. (E tatau ia Ebera 11:6.) I toou mārama e te akarongo e tupu maira, ka maata atu taau akaperepere ia Iehova. Kare e ekoko anga ka inangaro koe i te tutu aere no runga iaia e te aru i tana au apiianga. (2 Timoteo 4:2; 1 Ioane 5:3) Me aru tetai tangata “kia tau [tona] aerenga i te Atu i te au mea katoa e mareka mai ei ra,” ka iki aia kia akatapu i tona oraanga ki te Atua e kia papetitoia.​—Kolosa 1:9, 10. a

 KIMI OONU

4. Ka apii tatou mei te papetitoanga o Iesu

E tatau ia Mataio 3:​13-17 kia kite maata atu i to Iesu papetitoanga. E oti uriuri i teia au uianga:

• E pēpē ainei a Iesu i tona papetitoanga?

• Akapeea aia te papetitoia anga? Kua pīpīia ainei aia ki te vai?

I tona papetito anga, kua akamata a Iesu i tana angaanga puapinga na te Atua i te enua nei. E tatau ia Luka 3:​21-23 e Ioane 6:38, e oti uriuri i teia uianga:

• I muri ake i to Iesu papetito anga, eaa tana angaanga puapinga i rave?

5. Ka rauka ia koe kia papetito

I te akamata anga penei ka ngata te akatapu anga e te papetitoanga. Inara, me tere koe ki mua i te pae vaerua, ka rauka ia koe i te rave i teia iki anga puapinga. Kia akara i te aronga tei papetitoia, akatangi i te VITIO.

E tatau ia Ioane 17:3 e Iakobo 1:5, e oti uriuri i teia uianga:

• Eaa te ka tauturu i tetai kia akapapa no te papetito anga?

1. A. Ka akatapu tatou ia tatou uaorai na te akakite anga kia Iehova e te inangaro ra tatou i te tavini iaia e tuatau ua atu

2. E. I te papetitoanga, ka akaari tatou e kua akatapu tatou ia tatou uaorai kia Iehova

 6. Ka riro tatou ei pamiri no Iehova, me papetitoia

Me papetitoia tatou, ka riro tatou ei pamiri taokotaiia i te ao katoa. Noatu eaa te turanga e noea mai tatou, aiteite ta tatou irinakianga e te apiianga. E tatau ia Salamo 25:14 e 1 Petero 2:17, e oti uriuri i teia uianga:

• Akapeea te papetitoanga te akakeu anga i tetai tangata kia piri vaitata kia Iehova e te aronga tei akamori Iaia?

 APIIANGA

Kua apii a Iesu e ka anoanoia te au Kerititiano mou kia papetito. E rauka ai teia, ka anoanoia tetai tangata kia akamatutu i tona akarongo ki roto ia Iehova, e kia aru i Tona au turanga, e kia akatapu iaia uaorai Kiaia.

Uriurianga

• Eaa te papetitoanga, e eaa i puapinga ai te reira?

• Eaa te pirianga o te akatapu anga e te papetitoanga?

• Eaa te au takainga te ka arataki ki te akatapu anga e te papetitoanga?