APII 25
Eaa to te Atua Akakoroanga no Tatou?
Akakite te Pipiria, ‘e iti ua o te tangata puke rā, e te ki i te pekapeka.’ (Iobu 14:1) Ko teia ainei ta te Atua i anoano no tatou? Me kare ra, eaa tona akakoroanga no tatou? Ka tupu ainei te reira? Akamanako i te au pauanga pumaana a te Pipiria.
1. Eaa te tu oraanga ta Iehova e anoano maira no tatou?
Inangaro a Iehova i te oraanga meitaki rava atu no tatou. Te angaia anga te nga tangata mua, ko Adamu e Eva, kua tuku aia ia raua ki roto i tetai parataito manea, te kainga i Edene. E “kua akameitaki atura te Atua ia raua, e kua tuatua maira te Atua kia raua, Kia anau korua, e kia maata roa, e e akaki i te enua nei.” (Genese 1:28) Inangaro a Iehova kia anau raua i te tamariki, kia akariro i te enua ei parataito e kia akono i te manu. Tona akakoroanga kia mataora te tangata i te oraanga meitaki e tuatau ua atu.
Noatu kare teia i tupu ana, a kare te Atua i taui ana i tona akakoroanga. (Isaia 46:10, 11) Te inangaro nei rai aia kia rauka i te aronga akarongo te oraanga mataora e tuatau ua atu.—E tatau ia Apokalupo 21:3, 4.
2. Akapeea tatou e mataora ai i te oraanga i teianei?
Kua anga a Iehova ia tatou ma te “anoano i te pae vaerua,” kia kite e te akamori iaia. (E tatau ia Mataio 5:3-6, NW.) Inangaro aia kia piri vaitata tatou kiaia ei oa, ‘kia aere na tona au arataa katoa, e kia inangaro iaia,’ e kia tavini iaia ‘ma to tatou ngakau katoa.’ (Deuteronomi 10:12; Salamo 25:14) Me pera tatou, ka mataora tatou noatu te manamanata. Me akamori tatou ia Iehova ka rauka te oraanga mataora ma te akakoroanga meitaki.
KIMI OONU
Apii kia kite i to Iehova aroa maata te akapapa anga aia i te enua no tatou e eaa ta te Pipiria e apii maira no te akakoroanga o te oraanga.
3. E akakoroanga manea to Iehova no te tangata
Akatangi i te VITIO, e oti uriuri i te uianga ka aru mai.
-
Eaa te tumu i anga ai te Atua i to tatou paraneta manea?
E tatau ia Koheleta 3:11, e oti uriuri i teia uianga:
-
Eaa ta teia e apii maira no Iehova?
4. Kare a Iehova i taui ana i tona manako
E tatau ia Salamo 37:11, 29 e Isaia 55:11, e oti uriuri i teia uianga:
-
Akapeea tatou e kite ei e kare to Iehova akakoroanga no tatou, i taui ana?
Ka akaouia te are kinokino. Pera rai te enua tei takinoia e te tangata, ka akaou te Atua i te reira no te aronga tei akaperepere iaia
5. Rauka te oraanga mataora me akamori tatou ia Iehova
Ka mataora tatou me kite tatou i te akakoroanga o te oraanga. Akatangi i te VITIO, e oti uriuri i te uianga ka aru mai.
-
Akapeea a Terumi i puapinga ai mei te apii anga i te akakoroanga o te oraanga?
E tatau ia Koheleta 12:13, e oti uriuri i teia uianga:
-
No te mea e maata ta Iehova i rave no tatou, eaa ta tatou ka rave nona?
ME UI MAI TE TANGATA: “Eaa te akakoroanga o te oraanga?”
-
Akapeea koe me pau?
APIIANGA
Inangaro a Iehova kia rauka ia tatou te oraanga mataora e tuatau ua atu i te enua nei. Me akamori tatou iaia ma te ngakau katoa, ka mataora te oraanga—e i teianei.
Uriurianga
-
Eaa to Iehova akakoroanga mua no Adamu e Eva?
-
Akapeea tatou e kite ei e kare to te Atua akakoroanga no te tangata i taui?
-
Akapeea e rauka ai ia koe te oraanga mataora?
KIMI KIMI
Akamanako ana i te tuatua mou e i vai ana te kainga i Edene.
“Te Kainga i Edene—Tua Maani Ua me e Tika Tikai?” (Te Punanga Tiaki, Aperira 1, 2011)
Apii kia kite e ka vai ua rai te enua e tuatau ua atu.
Akara matatio i ta te Pipiria i karanga e ka rauka te oraanga mataora.
Akara akapeea tetai tangata tei manako e kua rauka iaia te au mea pouroa inara kua ngere i tetai apinga i tona oraanga.
a I te apii ka aru mai, ka kite koe eaa te tarevake tei tupu.
Ka Reka Katoa Koe i Teia
AU UIANGA A TE TANGATA
Eaa te Uriurianga Apii Pipiria Tei Orongaia e te Au Kite o Iehova?
Na roto i te uriurianga apii kare e tutaki tei orongaia e te Au Kite o Iehova, ka rauka ia koe i te taangaanga i tetai ua atu urianga o te Pipiria. E pati atu i toou ngutuare tangata me kore tetai au oa kia kapiti mai kia koe.
