APII 34
Akapeea Tatou me Akaari e te Akaperepere ra Tatou ia Iehova?
Mei te taime i akamata ai koe i te apii i te Pipiria, kua piri vaitata ainei koe ki te Atua? Ka inangaro ainei koe i te akamatutu i toou pirianga kiaia? Me koia ia, e akamaara, ko te maata atu ta Iehova e kite ra i taau akaperepere iaia, te maata atu tana akaperepere e te akono ia koe. Akapeea koe me akaari e te akaperepere ra koe iaia?
1. Akapeea tatou me akaari kia Iehova e te akaperepere ra tatou iaia?
Ka akaari tatou e te akaperepere ra tatou ia Iehova na te akarongo anga kiaia. (E tatau ia 1 Ioane 5:3.) Kare aia e māro i tetai ua atu kia akarongo mai kiaia. Mari ra, ka oronga mai aia i te tuatau kia iki tatou kia akarongo kiaia e me kare. Eaa te tumu? Inangaro a Iehova ia tatou kia “akarongo ma te ngakau katoa.” (Roma 6:17) Te inangaro maira aia ia koe kia akarongo kiaia, kare no te mea kua māroia koe kia pera, mari ra no toou akaperepere iaia. Kua akapapaia te Tuanga 3 e te 4 o teia puka ei tauturu ia koe kia akaperepere ia Iehova kia mareka aia ia koe e kia kore aia e mamae.
2. Eaa ra i ngata ai kia akaari i to tatou aroa no Iehova?
“Manganui to te tangata tuatua-tika ra mate.” (Salamo 34:19) Te putoto ra tatou ma te au tu apa ua. Te akakoromaki ra tatou i te au manamanata o te moni, te tu tika kore, e te vai atura. Me tupu te manamanata, penei e ngata ia tatou i te akarongo kia Iehova. No te mea e māmā ake i te aru i te mataara tarevake. Inara me akarongo koe ki tana i pati mai, te akaperepere ra koe iaia. Te akapapu ra koe i toou tu tiratiratu. E ka tiratiratu mai aia kia koe. Kare rava aia e akaruke ia koe.—E tatau ia Salamo 4:3.
KIMI OONU
Apii kia kite eaa i puapinga ai toou akarongo kia Iehova, e eaa te ka tauturu ia koe kia vai tiratiratu kiaia.
3. Te māro anga te o maira koe
Kia tau ki te puka Pipiria o Iobu, kua akaapa a Satani ia Iobu e tetai ua atu tei inangaro i te tavini ia Iehova. E tatau ia Iobu 1:1, 6–2:10, e oti uriuri i teia au uianga:
-
I to Satani manako, eaa a Iobu i tavini ei ia Iehova?—Akara ia Iobu 1:9-11.
-
Eaa ta Satani i tuatua no runga i te tangata, e koe atu?—Akara ia Iobu 2:4.
E tatau ia Iobu 27:5e, e oti uriuri i teia uianga:
-
Akapeea a Iobu te akapapu anga e te akaperepere tikai ra aia ia Iehova?
Akaperepere a Iobu ia Iehova na te vai tiratiratu anga kiaia
Akaperepere tatou ia Iehova na te vai tiratiratu anga kiaia
4. E akarekareka i to Iehova ngakau
E tatau ia Maseli 27:11, e oti uriuri i teia au uianga:
-
Eaa to Iehova manako kia pakari koe e kia akarongo kiaia? Eaa ra?
5. Kia vai tiratiratu koe kia Iehova
Me akaperepere tatou ia Iehova, ka akakeuia tatou kia tutu aere no runga iaia. Ka akakeu te tu tiratiratu ia tatou kia tutu aere noatu te tu ngata. Akatangi i te VITIO, e oti uriuri i te au uianga ka aru mai.
-
E ngata ainei ia koe te tutu aere ki tetai ke no runga ia Iehova?
-
I roto i te vitio, eaa tei tauturu ia Grayson kia kore e mataku?
E māmā ake kia vai tiratiratu kia Iehova me akaperepere tatou i tana e akaperepere ra e me rikarika i tana e rikarika ra. E tatau ia Salamo 97:10, e oti uriuri i teia au uianga:
-
Mei taau i apii mai, eaa etai au mea te akaperepere ra a Iehova? Eaa etai au mea te rikarika ra aia?
-
Akapeea koe me apii kia kite i te akaperepere i te au mea meitaki e kia rikarika i te au mea kino?
6. Ka puapingaia tatou me akarongo kia Iehova
E meitaki kia akarongo kia Iehova. E tatau ia Isaia 48:17, 18, e oti uriuri i teia au uianga:
-
I toou manako ka irinaki ainei tatou ia Iehova tei kite i tei meitaki tikai no tatou? Eaa ra?
-
Kua puapingaia ainei koe mei taau apii i te Pipiria e te Atua mou ko Iehova?
KARANGA TE TANGATA: “Kare te Atua e manata mai i taku e rave nei.”
-
Eaa te irava taau ka akaari e ka mataora a Iehova me kore ka maromaroa aia i taau e rave ra?
APIIANGA
Ka akaari koe e te akaperepere ra koe ia Iehova me akarongo e me vai tiratiratu kiaia noatu te manamanata.
Uriurianga
-
Eaa taau i apii mai mei te akaraanga o Iobu?
-
Akapeea koe me akapapu i toou aroa no Iehova?
-
Eaa te ka tauturu ia koe kia vai tiratiratu kia Iehova?
KIMI KIMI
Akara kia kite koe akapeea me vai tiratiratu kia Iehova e te putuputuanga.
E apii kia kite i ta Satani au akaapa anga i te tangata.
“Vai Tiratiratu a Iobu” (Te Pipiria—Eaa Tana Karere? tuanga 6)
Akara akapeea te tamariki me akaari e te akaperepere ra ratou ia Iehova.
Akapeea tetai tamaiti tei taomiia e tetai au mapu, te vai tiratiratu anga ki te Atua?
Ka Reka Katoa Koe i Teia
AU UIANGA A TE TANGATA
Eaa te Uriurianga Apii Pipiria Tei Orongaia e te Au Kite o Iehova?
Na roto i te uriurianga apii kare e tutaki tei orongaia e te Au Kite o Iehova, ka rauka ia koe i te taangaanga i tetai ua atu urianga o te Pipiria. E pati atu i toou ngutuare tangata me kore tetai au oa kia kapiti mai kia koe.
