APII 37
Ta te Pipiria e Karanga ra no te Ngai Angaanga e te Moni
Kua taitaia ainei koe i te au manamanata o te ngai angaanga e te moni? Ka ngata rai te akono i te au anoano o te oraanga e te akamori katoa ia Iehova. Te vaira te akoanga tau a te Pipiria no te tauturu ia tatou.
1. Eaa ta te Pipiria e akakite ra no te ngai angaanga?
Inangaro a Iehova ia tatou kia mareka i te angaanga. Karanga te Pipiria, “kare ainei e meitaki no te tangata nei . . . kia kite tona ngakau i te meitaki i tana ra angaanga.” (Koheleta 2:24) E angaanga pakari ana a Iehova. Me aru tatou i tona tu, mareka rava aia e tatou katoa.
E apinga puapinga te angaanga. Auraka ra tatou e akariro i te reira ei mea puapinga rava atu i ta tatou akamorianga kia Iehova. (Ioane 6:27) Kua taputou mai aia e me tuku tatou iaia na mua i roto i to tatou oraanga, ka akono aia ia tatou i te pae kopapa.
2. Eaa te manako tau no te moni?
Āriki te Pipiria e “e akapuanga tei te moni,” inara te akamatakite maira te reira e kare tatou e mataora ua i te moni. (Koheleta 7:12) No reira, kua akamaroiroiia tatou auraka e noinoi i te moni mari ra “kia mareka i ta kotou i rauka ra.” (E tatau ia Ebera 13:5.) Me mareka ua tatou i tei rauka ra, kare tatou e noinoi maata atu i te au apinga. Kare tatou e ō ki roto i te kaiou. (Maseli 22:7) E kare tatou e ō ki roto i te kino o te pere moni e kia rauka viviki te moni.
3. Akapeea tatou me oronga ua i ta tatou moni?
E Atua oronga ua a Iehova, e te aru ra tatou i tona tu ‘oronga aere, e kia maata atu ïa.’ (1 Timoteo 6:18) Ka oronga ua tatou i te moni na te turu anga i te putuputuanga e te tauturu i tetai ke, te au taeake akamori tikai. Mareka ua a Iehova i te tumu i oronga ai tatou, kare no te maata o te reira. Me oronga ua tatou ma te ngakau tae, ka mataora tatou e ka rekareka a Iehova.—E tatau ia Angaanga 20:35.
KIMI OONU
Akara i te au puapinga kia tuku i te ngai angaanga ki tona ngai e kia mareka ua.
4. Akangateitei ia Iehova me rave i taau angaanga
Ka riro to tatou pirianga oa kia Iehova ei akakeu ia tatou kia angaanga meitaki. Akatangi i te VITIO, e oti uriuri i te au uianga ka aru mai.
-
I teia vitio, eaa taau i reka i ta Jason i rave i te ngai angaanga?
-
Eaa tana i rave kia tuku i te angaanga ki tona ngai?
E tatau ia Kolosa 3:23, 24, e oti uriuri i teia uianga:
-
Eaa i puapinga ai to tatou tu i te ngai angaanga?
E puapinga te angaanga. Auraka e akariro i te reira ei mea puapinga rava atu i ta tatou akamorianga ia Iehova
5. Puapingaia tatou me mareka ua
E aruaru ana te tangata i te akaputu nui i te moni. Inara te oronga maira te Pipiria i te ako anga. E tatau ia 1 Timoteo 6:6-8, e oti uriuri i teia uianga:
-
Eaa ta te Pipiria e akamaroiroi maira ia tatou kia rave?
Noatu e meangiti ua ta tatou apinga, ka mataora ua tatou. Akatangi i te VITIO, e oti uriuri i te uianga ka aru mai.
-
Noatu e meangiti ua ta ratou moni, eaa teia au pamiri i mataora ai?
Akapeea me maata ta tatou apinga e te anoano ua atura tatou kia nui te reira? Kua akatutu a Iesu i teia tu kino. E tatau ia Luka 12:15-21, e oti uriuri i teia uianga:
-
Eaa taau i apii mai mei ta Iesu akatutuanga?—Akara i te irava 15.
E tatau e te akaaite kia Maseli 10:22 e 1 Timoteo 6:10. E oti uriuri i teia au uianga:
-
Eaa toou manako te apinga puapinga rava atu? Kia riro ei oa no Iehova me kia maata te moni? Eaa ra?
-
Eaa te manamanata me arumaki ua i te moni?
6. Ka akono a Iehova i to tatou au anoano
Ka riro te ngai angaanga e te moni ei timata i to tatou akarongo kia Iehova. Akatangi i te VITIO kia kite akapeea tatou me autu i teia au timata anga o te akarongo, e oti uriuri i te au uianga ka aru mai.
-
I roto i te vitio, eaa te au manamanata o te taeake?
-
Eaa tana i rave kia autu i te au manamanata?
E tatau ia Mataio 6:25-34, e oti uriuri i teia uianga:
-
Eaa ta Iehova i taputou kia rave no te aronga tei irinaki iaia?
KARANGA TE TANGATA: “Ka angaanga pakari au no te akono i toku pamiri. E ngata i te aere ki te au uipaanga putuputuanga i te au epetoma ravarai.”
-
Eaa te irava tei akapapu e e puapinga kia tuku na mua te akamorianga ia Iehova?
APIIANGA
Ka anoanoia te ngai angaanga e te moni, auraka ra te reira e tāpu ia koe kia kore e tavini ia Iehova.
Uriurianga
-
Eaa te ka tauturu ia koe kia rauka te manako tau no te ngai angaanga?
-
Akapeea koe e puapinga ai kia mareka ua?
-
Akapeea koe te irinaki anga e ka akono a Iehova i tona iti tangata?
KIMI KIMI
Akara matatio me kua akakite te Pipiria e e apinga kino te moni.
“Ko te Moni Ainei te Tumu o te au Kino Katoa?” (Web atikara)
Apii kia kite eaa te tu oronga te ka akamareka i te Atua.
“Eaa ta te Pipiria e Karanga ra no te Oronga?” (Web atikara)
E peu kangakanga ua ainei te pere moni?
Akara eaa tei akakeu i tetai tangata pere moni e te keia, kia taui i tona oraanga.
“E Mea Inangaro Naku te au Oroenua Taemoemo” (Te Punanga Tiaki, Noema 1, 2011)