APII 38
Akaperepere i te Oraanga Tei Oronga Aroaia Mai
E maata te au mea i te oraanga e reka ana tatou i te rave. Noatu te manamanata, ka rekareka ua tatou i te oraanga. Akapeea tatou me akaari e te akaperepere ra tatou i te oraanga tei oronga aroaia mai? Eaa te tumu puapinga kia pera tatou?
1. Eaa tatou ka akaperepere ei i te oraanga?
Ka akaperepere tatou i te oraanga no te mea e apinga aroa te reira no ko mai i to tatou Metua, ko Iehova. Koia “te tumu o te ora”—nana i anga i te au mea ora. (Salamo 36:9) “Koia uaorai oki tei oronga mai i te ora, e te aʼo, e te au mea katoa, ki te au mea ravarai.” (Angaanga 17:25, 28) Kua oronga mai a Iehova i te au mea ravarai kia ora tatou. E kia rekareka maata tatou i te oraanga.—E tatau ia Angaanga 14:17.
2. Akapeea tatou me akaari e te akaperepere ra tatou i te oraanga?
Mei te taime i tōia ai koe, kua akono a Iehova ia koe. Na roto i tana pure akauruia, karanga te tangata akamori a Davida ki te Atua: “Kua kite oki to mata i toku tu, i toku vai oti kore anga ra.” (Salamo 139:16) Akaperepere maata a Iehova i toou oraanga. (E tatau ia Mataio 10:29-31.) Ka mamae tikai aia me akakoro tetai i te tamate i te oraanga o tetai, e toou katoa. a (Exodo 20:13) Ka mamae katoa a Iehova me o puapinga kore ua tatou ki roto i te tumatetenga e kare i paruru i te oraanga o tetai. Me akono tatou e te akangateitei i te oraanga o tetai, te akaperepere ra tatou i te oraanga tei oronga aroaia mai.
KIMI OONU
Akamanako i tetai au mataara ei akaari e te akaperepere ra koe i te oraanga tei oronga aroaia mai.
3. Akono i toou oraanga pae kopapa
Kua akatapu te au Kerititiano i to ratou oraanga no te tavini ia Iehova. Mei te mea atura kua oronga ratou i to ratou kopapa ei atinga ki te Atua. E tatau ia Roma 12:1, 2, e oti uriuri i teia au uianga:
-
Eaa te ka akakeu ia koe kia akono i toou oraanga pae kopapa?
-
Eaa tetai au mea ka rauka ia koe te rave?
4. Matakite kia kore e tumatetenga e mate atura
Akamaroiroi maira te Pipiria kia kopae tatou i te au angaanga te ka tupu te tumatetenga. Akatangi i te VITIO kia kite koe i te paruru i toou oraanga.
E tatau ia Maseli 22:3, e oti uriuri akapeea koe e tetai pae me paruru i te oraanga . . .
-
i te kainga.
-
i te ngai angaanga.
-
me kanga tipoti.
-
me akaoro e me aru i te apinga akaoro.
5. Akangateitei i te oraanga o te pepe kare i anauia ake
Na roto i te pee, kua tuatua a Davida no to Iehova inangaro i te oraanga e te tupu anga o tetai pepe kare i anauia ake. E tatau ia Salamo 139:13-17, e oti uriuri i teia uianga:
-
I roto i te mata o Iehova, akamata ainei te oraanga i te taime i tōia ai te pepe me i te anau anga?
Kua paruru ta Iehova ture i te au metua vaine e ta ratou pepe kare i anauia ake. E tatau ia Exodo 21:22, 23, e oti uriuri i teia au uianga:
-
Eaa to Iehova manako no tetai kare i akakoro i te tamate i te pepe kare i anauia ake?
-
Eaa tona manako no tetai tei akakoro i te rave i te reira? b
-
Eaa toou manako i to te Atua manako no runga i teia?
Noatu te akaperepere ra tetai vaine i te oraanga, penei ka manako rai aia i te titiri i tana pepe. E tatau ia Isaia 41:10, e oti uriuri i teia au uianga:
-
Me mārōia tetai vaine kia titiri i tana pepe, ka kimi tauturu aia kiea? Eaa te tumu?
KARANGA TE TANGATA: “Tei te vaine rai te tika me ka titiri aia i tana pepe—nona rai tona kopapa.”
-
Eaa koe i papu ei te akaperepere ra a Iehova i te oraanga o te metua vaine e tana pepe kare i anauia ake?
APIIANGA
Apii mai te Pipiria kia akaperepere, akangateitei e kia paruru tatou i ta Iehova apinga aroa, ko te oraanga. Pera te oraanga o tetai e to tatou.
Uriurianga
-
Eaa te oraanga tangata i puapinga ai kia Iehova?
-
Eaa to Iehova manako me tamate tetai i te oraanga o tetai?
-
Eaa taau e akaperepere ra i te oraanga tei oronga aroaia mai?
KIMI KIMI
Akapeea tatou me akameitaki ia Iehova no te oraanga tei oronga aroaia mai?
Eaa te pauanga ki teia uianga, Ka akakore ainei te Atua i te ara a tetai vaine tei titiri i tana pepe?
“Eaa ta te Pipiria e Karanga ra no te Titiri Pepe?” (Web atikara)
Apii kia kite akapeea to te Atua manako no te oraanga me tauturu ia koe kia iki i te tipoti tau.
“‘Au Tipoti Kino’—Ka Tau Ainei Noou?” (E Ara!, Okotopa 8, 2000)
Akapeea me manako tetai i te tamate iaia uaorai? Akara akapeea te Pipiria me tauturu.
a Akaaroa a Iehova i te aronga tei ati ngakau. (Salamo 34:18) Mārama aia i te mamae ngakau o tetai tei inangaro i te mate, e te anoano ra aia i te tauturu iaia. Kia kite i ta te Atua tauturu pumaana, e tatau i te atikara “Inangaro Au i te Mate—Ka Tauturu Ainei te Pipiria Iaku me Manako Au i te Tamate Iaku?” i te tuanga Kimi Kimi o teia apii.
b Kare te aronga tei titiri i te pepe e anoanoia kia manako apa ua—ka akakore a Iehova i ta ratou ara. Kia kite maata atu, akara i te atikara “Eaa ta te Pipiria e Karanga ra no te Titiri Pepe?” tei taikuia i te tuanga Kimi Kimi o teia apii.