E apinga puapinga te toto. Me kare e toto, kare tatou e ora. E tika anga to te Atua, Tei Anga, kia akakite mai akapeea te toto me taangaangaia. Eaa tana i akakite mai no te toto? Ka kai ainei me ka pamu i te reira? E akapeea koe me tuku i te au ikianga meitaki?

1. Eaa to Iehova manako no te toto?

I te tuatau Pipiria, akakite a Iehova ki te aronga tei akamori iaia: “Tei te toto oki te ora o te au mea katoa nei.” (Levitiku 17:14) Kia Iehova, e oraanga te toto. E apinga aroa e te tapu te oraanga mei te Atua, e tapu katoa te toto.

2. Eaa te au ravenga no te toto ta te Atua e patoi ra?

I mua ake i te tuatau Kerititiano kua akaue a Iehova i te aronga tei akamori iaia, auraka e kai i te toto. (E tatau ia Genese 9:4 e Levitiku 17:10.) Kua akapapu aia i teia akaue anga, te ako anga te pupu akaaere i te au Kerititiano ‘auraka e kai i te toto.’​—E tatau ia Angaanga 15:​28, 29.

Eaa te aiteanga auraka e kai i te toto? Me karanga atu te taote auraka e inu i te kava, kare rai koe e inu. Inara ka kai ainei koe i te au tu kai e kava to roto, me kore ka pamu koe i te reira ki roto i toou ara toto? Kare rava. Pera ta te Atua akaue anga, auraka e kai i te toto, tera te aiteanga auraka e inu i te toto e kare e kai i te kiko manu kare i akataeia te toto. E kare katoa e kai i tetai ua atu kai e toto to roto.

Akapeea te toto i te pae o te rapakauanga maki? Te aati ra tetai au ravenga rapakau i te ture a te Atua. Ka kapiti mai te pamu toto e tona au tuanga puapinga​—te red cells, white cells, platelets, e te plasma. Te vaira tetai au rapakauanga kare i aati i te ture a te Atua. Ei akaraanga, ka o mai te au tuanga rikiriki o tetai tuanga puapinga o te toto. Tetai atu rapakauanga, ka taangaangaia te toto o te reira tangata. Me akara meitakiia teia au ravenga tukeke, ka anoanoia tatou kia tuku i te iki anga tau. a​—Galatia 6:5.

 KIMI OONU

3. Rave i te au ikianga tau no te rapakauanga te ka akamareka ia Iehova

Akapeea koe me rave i te au ikianga tau no te rapakauanga tei rotai ki to te Atua manako? Akatangi i te VITIO, e oti uriuri i te au takainga puapinga ka aru mai.

• Pure no te pakari.​—Iakobo 1:5.

• Kimi i te au kaveinga Pipiria, e taangaanga i te reira.​—Maseli 13:16.

• Akara eaa te au ravenga rapakau i toou ngai.

• Akara eaa te au ravenga rapakau kare koe e āriki.

• Akapapu i taau ikianga tau kia rauka te akava ngakau meitaki.​—Angaanga 24:16. b

• Kare na tetai​—kare te tokorua, te tangata pakari, e toou puapii Pipiria—​e akakite atu i taau ikianga i te pae o te akava ngakau.​—Roma 14:12.

• E tata i taau ikianga.

4. Ka akara te Au Kite o Iehova i te rapakauanga tau

Me aruia ta te Atua ture no te toto, ka rauka te rapakauanga meitaki kare e toto. Akatangi i te VITIO.

E tatau ia Tito 3:2, e oti uriuri i teia uianga:

• Eaa tatou ka akaari ei i te vaerua taokotai e te maru me aravei i te aronga karape o te pae rapakau?

 5. Me o mai te tuanga rikiriki o te toto

E ā tuanga puapinga o te toto​—red cells, white cells, platelets, e te plasma. I roto i teia au tuanga maata te vaira tei kapikiia, ko te au tuanga rikiriki. c E taangaangaia ana tetai au tuanga rikiriki ei vairakau rapakau maki e kia akamutu i te toto taʼe.

No runga i te au tuanga rikiriki o te toto, ka anoanoia tetai Kerititiano kia rave i tana ikianga tei akatumuia ki runga i tona akava ngakau tei tereniia-e-te-Pipiria. Penei ka iki tetai pae kia patoi i te rapakauanga me kore te au ravenga rapakau te ka o mai te tuanga rikiriki o te toto. Penei ka manako tetai pae e ka āriki ua to ratou akava ngakau i te au tuanga rikiriki.

Me tuku i taau ikianga, akamanako i teia uianga:

• Akapeea au me akamārama ki te taote kua patoi au me kore kua āriki au i tetai au tuanga rikiriki o te toto?

 APIIANGA

Ka inangaro a Iehova ia tatou kia kopae i te taangaanga puapinga kore i te toto.

Uriurianga

• Eaa a Iehova i karanga ai e apinga tapu te toto?

• Akapeea tatou e kite ei kua aite ta te Atua akaue anga auraka e kai i te toto, ki te pamu toto?

• Akapeea koe me tuku i te au ikianga meitaki no te rapakauanga ka o mai te toto?