APII 44
Mareka Ainei te Atua i Tetai Ua Atu Tamataora Anga?
Inangaro a Iehova kia rekareka tatou e kia tamataora i tetai au taime. Inara te mareka ra ainei aia i te au tamataora anga katoatoa e te au orote? Akapeea tatou me akaari i to tatou inangaro ia Iehova i roto i teia turanga?
1. Eaa a Iehova i mareka kore ei i tetai au tamataora anga?
Penei ka poitirere koe i te kite e maata te au tamataora anga kua akatumuia ki runga i te au apiianga peu etene e kare i roto i te Pipiria. Penei te piri atura teia au tamataora anga ki te akonoanga pikikaa. Penei kua akatumuia ki runga i te peu purepure me kore te apiianga e kopapa mate kore to te tangata. Tetai au tamataora anga kua piri ki te au irinakianga manamana e te manuia. (Isaia 65:11) Akamatakite a Iehova i tona aronga akamori: “Kia taka ke kotou, e auraka e rave ua atu i te mea viivii ra.”—2 Korinetia 6:17. a
2. Eaa to Iehova manako no te au tamataora anga akaepaepa i te tangata?
Akamatakite maira a Iehova ia tatou auraka e “irinaki ki te tangata.” (E tatau ia Ieremia 17:5.) Akapaapaa tetai au orote i te au tutara me kore te au vaeau. Akaepaepa tetai i te reva o te enua me kore te tutara anga. (1 Ioane 5:21) E tetai te turuturu ra i te au peu poritiki me kore tetai akatereanga. Eaa to Iehova manako me akapaapaa tatou i tetai tangata, tetai akatereanga tei patoi i Tona akakoroanga?
3. Eaa te au tu tei akatupu i te tamataora anga tau kore?
Te akaapa ra te Pipiria i “te inu nui i te wina ra, te kapiti anga kanga ra, te akakonā kava ra.” (1 Petero 4:3) E tupu ana te au peu tau kore ki teia au tamataora anga. Kia vai ei oa no Iehova, ka anoanoia tatou kia patoi i teia au tu viivii e te tau kore.
KIMI OONU
Apii akapeea koe me akamareka ia Iehova na te rave anga i te ikianga tau no te au orote e te au tamataora anga.
4. Kopae i te tamataora anga kare a Iehova e mareka ana
E tatau ia Ephesia 5:10, e oti uriuri i teia au uianga:
-
Eaa ta tatou ka akapapu me ka akono tatou i te au orote?
-
Eaa te au orote e matauia ana i toou ngai?
-
I toou manako te mareka ra ainei a Iehova i teia au orote?
Ei akaraanga, i manako ana koe eaa to te Atua manako no te rā anau anga? Kare te Pipiria i taiku ana i tetai tei akamori ia Iehova tei akamaara i tona rā anau anga, mari ra te akakite ra te reira no nga tangata kare i tavini ia Iehova, tei akamaara i to raua rā anau anga. E tatau ia Genese 40:20-22 e Mataio 14:6-10. E oti uriuri i teia au uianga:
-
Eaa tei tupu ki te nga rā anau anga tei akamaaraia?
-
Mei teia nga irava Pipiria, i toou manako eaa to Iehova manako no te rā anau anga?
Penei ka manako koe, ‘Te manata maira ainei a Iehova me akono au i te rā anau anga e tetai ua atu tamataora anga kare i roto i te Pipiria?’ E tatau ia Exodo 32:1-8. E oti, akatangi i te VITIO e te uriuri i teia au uianga ka aru mai.
-
Eaa tatou ka akapapu ei i tei marekaia e Iehova?
-
Akapeea tatou me rave i teia?
Akapeea me kite e kare te Atua e mareka ana i tetai orote
-
Kua akatumuia ainei ki runga i te au apiianga kare i roto i te Pipiria? Kia akapapu, e kimi noea mai te reira.
-
Te akaepaepa ra te reira i te tangata, te au akatereanga, e te reva enua? Ka akangateitei ua tatou ia Iehova e te irinaki ka rapakau aia i te au manamanata o teianei ao.
-
Te patoi ra ainei teia au peu e te au akaepaepa anga i te au turanga o te Pipiria? Kia vai mā ua to tatou oraanga i te pae o te tu akono.
5. Tauturu i tetai kia akangateitei i taau e irinaki ra
Ka ngata rai i te patoi i tetai tei māro ia koe kia piri ki te au tamataora anga kare a Iehova e mareka ana. E akamārama meitaki ma te maru i taau ikianga. Akara i tetai akaraanga akapeea me rave i teia, akatangi i te VITIO.
E tatau ia Mataio 7:12, e oti uriuri i teia au uianga:
-
Mei te irava, ka akakite ainei koe ki toou ngutuare kare i te Kite, eiaa e akono i te orote?
-
Eaa taau ka rave no te akapapu ki toou ngutuare te akaperepere ra koe ia ratou noatu kare koe e piri akaou ana ki te reira?
6. Inangaro a Iehova kia mataora tatou
Inangaro a Iehova kia mataora tatou ki to tatou ngutuare e te au oa. E tatau ia Koheleta 8:15, e oti uriuri i teia uianga:
-
Akapeea teia irava te akaari anga mai e kua inangaro a Iehova kia mataora tatou?
Inangaro a Iehova i tona iti tangata kia mataora e kia rekareka. Akatangi i te VITIO kia kitea teia rekareka i ko i ta tatou uruoaanga pa enua.
E tatau ia Galatia 6:10, e oti uriuri i teia au uianga:
-
Ka anoanoia ainei tatou kia akono i te au orote no te “takinga-meitaki” i tetai ke?
-
Eaa te tu oronga ua ka mataora atu koe—me māroia koe kia oronga i te rā orote me kia inangaro koe i te oronga ua?
-
E akapapa ana te Au Kite i tetai tuatau mataora no ta ratou tamariki e ka oronga ua i te au apinga aroa na ratou. Me e tamariki taau, eaa tetai au mea mataora taau ka rave?
KARANGA TE TANGATA: “Kare e kino ana e noea mai te au orote. Te mea maata kia tamataora te ngutuare e te au oa.”
-
Eaa taau pauanga?
APIIANGA
Inangaro a Iehova kia mataora tatou ki to tatou ngutuare e te au oa. Inangaro katoa aia kia patoi tatou i te au tamataora anga kare aia e mareka ana.
Uriurianga
-
Eaa te au uianga no te akapapu kare a Iehova e mareka i tetai ua atu tamataora anga?
-
Akapeea tatou me tauturu i te ngutuare e te au oa kia mārama i ta tatou ikianga no te au orote?
-
Akapeea koe i kite ei e kua inangaro a Iehova ia tatou kia mataora e kia rekareka?
KIMI KIMI
Akamanako ana i te au orote kare te au Kerititiano e akono ana.
“Eaa te Tumu Kare te Au Kite o Iehova e Piri ki Tetai au Orote?” (Web atikara)
Akara i te au tumu e a, i irinaki ei matou kare te Atua e mareka ana i te au orote.
“No Teaa ra te Au Kite o Iehova Kare e Akamaara i te rā Anau Anga?” (Web atikara)
Akara akapeea te au tamariki tei inangaro ia Iehova me akamareka iaia i te au tuatau orote.
E mirioni ua atu Kerititiano kare e akono ana i te Keritimiti. Eaa toou manako i ta ratou ikianga?
“Kitea e Ratou Tetai Mea Meitaki Atu” (Te Punanga Tiaki, Titema 1, 2012)
a Akara i te Au Manako Poto 5 eaa taau ka rave no teia au orote.
Ka Reka Katoa Koe i Teia
AU UIANGA A TE TANGATA
Eaa te Uriurianga Apii Pipiria Tei Orongaia e te Au Kite o Iehova?
Na roto i te uriurianga apii kare e tutaki tei orongaia e te Au Kite o Iehova, ka rauka ia koe i te taangaanga i tetai ua atu urianga o te Pipiria. E pati atu i toou ngutuare tangata me kore tetai au oa kia kapiti mai kia koe.
