APII 47
Kua Papa Ainei Koe no te Papetito?
E maata taau i apii mai no runga ia Iehova na roto i te apii Pipiria. Papu kua rave koe i te au taui anga tei anoanoia. Inara, penei te tapupu ra koe i te akatapu ia koe uaorai kia Iehova e kia papetitoia. Ka uriuri teia apii i te au manamanata no te papetito anga e akapeea koe me autu i te reira.
1. Mei teaa te maata taau ka apii i mua ake ka papetito ei?
Kia papetitoia, ka anoanoia koe kia “kite i te tuatua-mou.” (1 Timoteo 2:4) Kare te aiteanga e ka anoanoia koe kia pau i te au uianga ravarai o te Pipiria i mua ake ka papetito ei. Ka anoanoia te au Kerititiano tei papetitoia no tetai tuatau roa kia apii ua atu rai. (Kolosa 1:9, 10) Ka anoanoia koe kia mārama i te au apiianga Pipiria. Ka tauturu te aronga pakari o te putuputuanga ia koe kia kite me kua rava toou mārama i te tuatua mou.
2. Eaa tetai au takainga ka anoanoia i mua ake ka papetito ei?
I mua ake ka papetito ei, ka anoanoia koe kia “tataraara . . . e e ariu mai.” (E tatau ia Angaanga 3:19.) Tera te aiteanga kia tataraapa koe i taau au ara i rave e kia pati ia Iehova kia akakore mai i te reira. Ka kopae katoa koe i te au peu kino e ka aruaru i te akamareka i te Atua. Pera katoa, ka akamata koe i te piri ki roto i te au angaanga a te putuputuanga na te aere anga ki te au uipaanga e te tutu aere ei papuritia kare i papetitoia.
3. Eaa te tumu kare koe e tuku i te mataku kia tapupu ia koe?
Mataku tetai pae kare e rauka ia ratou i te akono i ta ratou i taputou kia Iehova. E tika, ka tarevake rai koe i tetai au taime, mei te au tane e te au vaine tiratiratu i roto i te Pipiria. Inara kare a Iehova e tapapa maira i te tu apa kore mei te aronga tei akamori iaia. (E tatau ia Salamo 103:13, 14.) Mareka rava aia me tauta koe i taau ka rauka! Ka tauturu aia ia koe. Te tika, te akapapu maira a Iehova kare e apinga “e tika kia akataka ke ia tatou i te aroa o te Atua.”—E tatau ia Roma 8:38, 39.
KIMI OONU
Akara akapeea koe me autu i tetai ua atu manamanata no te papetito na te apii anga no runga ia Iehova e te āriki i tana tauturu.
4. Apii kia kite meitaki koe no runga ia Iehova
Mei teaa te maata i taau apiianga no runga ia Iehova i mua ake ka papetito ei? Ka anoanoia koe kia kite meitaki, kia akaperepere e kia akamareka iaia. Akatangi i te VITIO kia kite akapeea te aronga apii Pipiria te rave anga i te reira. E oti uriuri i te uianga ka aru mai.
-
I roto i teia vitio, eaa tei tauturu i tetai au taeake kia akapapa no te papetito?
E tatau ia Roma 12:2, e oti uriuri i teia au uianga:
-
Te ekoko ra ainei koe i ta te Pipiria e apii ra e me te apii ra te Au Kite o Iehova i te tuatua mou?
-
Me koia ia, eaa taau ka rave?
5. Kia autu i te au manamanata no te papetitoanga
Me akatapu tatou ia tatou uaorai kia Iehova e kia papetitoia, ka tupu rai te manamanata. Ei akaraanga, akatangi i te VITIO, e oti uriuri i te au uianga ka aru mai.
-
I roto i te vitio, eaa te au manamanata tei anoanoia a Narangerel kia autu i te tavini anga ia Iehova?
-
Akapeea tona aroa no Iehova te tauturu anga iaia kia autu i te manamanata?
E tatau ia Maseli 29:25 e 2 Timoteo 1:7, e oti uriuri i teia uianga:
-
Akapeea e rauka ai te ngakau toa kia autu i te au manamanata?
6. Irinaki i ta Iehova tauturu
Ka tauturu a Iehova ia koe kia akamareka iaia. Akatangi i te VITIO, e oti uriuri i te au uianga ka aru mai.
-
I roto i te vitio, eaa tei tapu i te tangata apii Pipiria kia kore aia e papetitoia?
-
Eaa tana i apii mai no te akamaroiroi i tona irinaki ia Iehova?
E tatau ia Isaia 41:10, 13, e oti uriuri i teia uianga:
-
Eaa koe i papu ei e ka rauka ia koe te akono i taau taputou no te akatapu ia koe uaorai?
7. Akaperepere maata i to Iehova aroa
Te maata atu taau āriki e te akaperepere ia Iehova, ka maata atu toou tu akameitaki e ka inangaro koe i te tavini iaia e tuatau ua atu. E tatau ia Salamo 40:5, e oti uriuri i teia uianga:
-
Eaa ta Iehova au akameitakianga taau e mareka tikai ra?
Akaperepere tikai te peroveta ko Ieremia ia Iehova e tana tuatua, e kua mareka tikai aia i te apai i te ingoa o Iehova. Karanga aia: “E ko taau tuatua, ko toku ïa rekareka anga, e te pereperekavana anga o toku ngakau: kua tapaia oki au i toou ra ingoa, e te Atua . . . e Iehova e.” (Ieremia 15:16) Pau i teia au uianga:
-
Eaa te tumu, e akameitakianga ngateitei kia riro mai koe ei Au Kite no Iehova?
-
Ka inangaro ainei koe kia papetitoia ei Au Kite no Iehova?
-
Te tapupu ra ainei tetai apinga ia koe?
-
I toou manako eaa te ka anoanoia kia rauka te papetito anga?
KARANGA TE TANGATA: “Mataku au kare e rauka iaku i te akono i taku apainga me papetitoia au.”
-
Ko toou manako ainei teia?
APIIANGA
Ka tauturu a Iehova kia autu koe i tetai ua atu manamanata kia papetitoia.
Uriurianga
-
Mei teaa te maata o te kite Pipiria taau ka anoanoia kia papetito?
-
Eaa te au taui anga taau ka rave i mua ake ka papetito ei?
-
Eaa te tumu kare koe e tuku i te mataku kia tapupu ia koe?
KIMI KIMI
Akamanako eaa koe ka inangaro ei kia papetito.
“Kua Papa Ainei Koe no te Papetito?” (Te Punanga Tiaki, Mati 2020)
Apii kia kite koe akapeea me autu i te au manamanata te ka tapupu ia koe.
“Eaa Au Nei e Kore ei e Bapetizoia?” (Te Punanga Tiaki, Mati 2019)
Akara akapeea tetai tangata te autu anga i te au manamanata maata kia papetitoia aia.
I te akamata anga, kua tapupu tetai tangata ko Ataa kia papetitoia aia. Akara eaa tei akakeu iaia kia rave i teia takainga puapinga.
Ka Reka Katoa Koe i Teia
AU UIANGA A TE TANGATA
Eaa te Uriurianga Apii Pipiria Tei Orongaia e te Au Kite o Iehova?
Na roto i te uriurianga apii kare e tutaki tei orongaia e te Au Kite o Iehova, ka rauka ia koe i te taangaanga i tetai ua atu urianga o te Pipiria. E pati atu i toou ngutuare tangata me kore tetai au oa kia kapiti mai kia koe.
