APII 51
Akapeea Koe me Akamareka ia Iehova na Roto i Taau Tuatua?
I te angaia anga tatou e Iehova, kua oronga mai aia i tetai apinga aroa manea—te tuatua. Te manako ra ainei aia akapeea tatou me taangaanga i teia apinga aroa? Ae, papu roa! (E tatau ia Iakobo 1:26.) Akapeea i reira tatou me akamareka ia Iehova na roto i ta tatou tuatua?
1. Akapeea tatou me taangaanga meitaki i teia apinga aroa?
Te akakite maira te Pipiria “e akapumaana kotou tetai ki tetai, e akatupu i te meitaki tetai ki tetai.” (1 Tesalonia 5:11) Kua kite ainei koe i tetai tei anoano i te akapumaana anga? Eaa taau ka tuatua ei akamaroiroi ia ratou? E akapapu kia ratou e te akaperepere ra koe ia ratou. Penei ka akakite koe i taau i reka no ratou. Kua kite ainei koe i tetai irava te ka akamaroiroi i tetai ke? E maata taau ka rauka i te iki. E akamaara i taau ka tuatua e akapeea koe me tuatua, ka akakeu te reira i tetai. No reira e aruaru i te tuatua meitaki e te maru.—Maseli 15:1.
2. Eaa te au tuatua ka kopae tatou?
Karanga te Pipiria: “Auraka ei tuatua viivii e mama mai no roto i to kotou vaa.” (E tatau ia Ephesia 4:29.) Tera te aiteanga kare tatou e tao me kore e tuatua akakino kia akatupu i te mamae ki tetai. Ka kopae tatou i te tuatua urutoe e te pikikaa.—E tatau ia Maseli 16:28.
3. Eaa te ka tauturu ia tatou kia tuatua akamaroiroi?
Maata anga o te taime i ta tatou ka tuatua te akaari maira i to tatou ngakau e ta tatou e manako ra. (Luka 6:45) No reira ka anoanoia tatou kia tereni ia tatou uaorai kia akamanako ua i te au mea papu—te au mea tika, viivii kore, rekarekaia, e te au mea rongo meitakiia. (Philipi 4:8) Kia rave ua rai i teia, ka iki meitaki tatou i ta tatou tamataora anga e te au oa. (Maseli 13:20) Kia akamanako marie katoa tatou i mua ake ka tuatua ai. Akamanako e akapeea taau tuatua me akakeu i tetai ke. Karanga te Pipiria: “Te tangata vaa karea ua ra, e tau ïa ki te koputaputa koke ra: ko te arero ra o te aronga pakari ra, mei te vairakau ïa.”—Maseli 12:18.
KIMI OONU
Apii akapeea me tuatua kia akamareka ia Iehova e te akamaroiroi i tetai ke.
4. Matakite i taau ka tuatua
Tetai taime, ka tuatua tatou i te au mea ka tataraara a muri ake. (Iakobo 3:2) E tatau ia Galatia 5:22, 23, e oti uriuri i teia au uianga:
-
Ko teea au tu ka pure koe ei tauturu ia koe kia akamako i taau tuatua? Akapeea teia au tu me tauturu ia koe?
E tatau ia 1 Korinetia 15:33, e oti uriuri i teia uianga:
-
Akapeea toou au oa e te au tamataora anga te akakeuanga i taau ka tuatua?
E tatau ia Koheleta 3:1, 7, e oti uriuri i teia uianga:
-
Eaa te taime meitaki kia muteki me kore kia tiaki i te taime tau no te tuatua?
5. E tuatua akameitaki i tetai ke
Akapeea tatou me kopae i te tuatua akakino e te tau kore? Akatangi i te VITIO, e oti uriuri i te au uianga ka aru mai.
-
I roto i te vitio, eaa te tumu i inangaro ei teia taeake i te taui i tana i tuatua no tetai ke?
-
Eaa tana i rave kia taui?
E tatau ia Koheleta 7:16, e oti uriuri i teia uianga:
-
Eaa ta tatou ka akamaara me timataia tatou i te tuatua akakino i tetai ke?
E tatau ia Koheleta 7:21, 22, e oti uriuri i teia uianga:
-
Akapeea teia nga irava me tauturu ia koe kia kore e riri i te tuatua akakino a tetai?
6. Akaari i te aroa me tuatua ki toou ngutuare tangata
Inangaro a Iehova ia tatou kia tuatua ma te aroa e te takinga meitaki ki to tatou ngutuare tangata. Akatangi i te VITIO, e oti uriuri i te uianga ka aru mai.
-
Eaa te ka tauturu ia koe kia tuatua aroa ua ki toou ngutuare tangata?
E tatau ia Ephesia 4:31, 32, e oti uriuri i teia uianga:
-
Eaa te au tuatua ka akamaroiroi i te ngutuare tangata?
Akakite mai a Iehova i tona manako i tana Tamaiti, ko Iesu. E tatau ia Mataio 17:5, e oti uriuri i teia uianga:
-
Akapeea koe me aru i to Iehova akaraanga me tuatua ki toou ngutuare tangata?
KARANGA TE TANGATA: “Ka tuatua ua au i toku manako. Kare au e kea atu i tetai ke.”
-
Te āriki ra ainei koe? Eaa ra, e eaa ka kore ei?
APIIANGA
Ka riro ta tatou tuatua ei tauturu me kore ei tamamae i tetai. Ka akamanako meitaki i ta tatou tuatua, aea me tuatua, e akapeea me tuatua i te reira.
Uriurianga
-
Eaa tetai au tuatua ka tauturu i tetai ke?
-
Eaa te au tuatua ka inangaro koe i te kopae?
-
Eaa te ka tauturu ia tatou kia tuatua ma te aroa ua e te akamaroiroi?
KIMI KIMI
Eaa te ka tauturu ia tatou kia tuatua meitaki?
Apii i te ka tauturu ia koe kia kopae i te tuatua tao.
Akapeea koe me kopae i te ereere o te urutoe akakino.
Akapeea a Iehova i te tauturu anga i tetai tangata kia akaruke i te tuatua tao.
“Akamanako Meitaki Au i Toku Oraanga” (Punanga Tiaki atikara)