Ko Iesu te Upoko o te putuputuanga Kerititiano. (Ephesia 5:23) I teia rā, mei tona taoonga i te rangi, te arataki nei a Iesu i tana au pipi i te enua nei na roto i tetai “tavini akono meitaki e te pakari.” (E tatau ia Mataio 24:45.) No te mea na Iesu i iki ia ratou, e mana arataki to te “tavini,” inara ka tavini ratou ia Karaiti pera te au taeake o Karaiti? Koai ra teia tavini? Akapeea teia tavini te akono anga ia tatou?

1. Koai “te tavini akono meitaki e te pakari”?

E taangaanga ana a Iehova i tetai tangata me kore tetai pupu meangiti ei arataki i tona iti tangata. (Malaki 2:7; Ebera 1:1) Te mate anga a Iesu, na te au apotetoro e te aronga pakari i Ierusalema i rave i te arataki anga. (Angaanga 15:2) I teia tuatau te aru nei tetai manga pupu aronga pakari i teia akaraanga​—ko te Pupu Akaaere o te Au Kite o Iehova—​te oronga maira i te au kai pae vaerua e te arataki i te angaanga tutu aere. Teia pupu ko “te tavini akono meitaki e te pakari, [ta Iesu] i akaaere.” (Mataio 24:45a) E au Kerititiano akatainuia e te vaerua teia au mema o te Pupu Akaaere, me akamutu to ratou oraanga i te enua nei ka tapapa atu ratou i te tutara ma Karaiti i tona Patireia i te rangi.

2. Eaa te kai pae vaerua ta te tavini akono meitaki ka oronga mai?

Karanga a Iesu e na te tavini akono meitaki e “tua i te kai na [te au taeake Kerititiano] i te ora mou ra.” (Mataio 24:45e) Mei te kai tei akamatutu i te kopapa, ka riro te kai pae vaerua​—te apiianga mei te Tuatua a te Atua​—ei akamaroiroi ia tatou kia vai tiratiratu kia Iehova e te rave i te angaanga ta Iesu i oronga mai. (1 Timoteo 4:6) Ka rauka te kai pae vaerua mei te au uipaanga, te akaputuputuanga, e te uruoaanga, pera te au puka-Pipiria e te au vitio kia mārama tatou i to te Atua anoano e kia akamatutu i to tatou pirianga oa kiaia.

 KIMI OONU

3. Ka akaaere meitakiia to Iehova iti tangata

I raro ake i ta Iesu arataki anga, ka akaaere te Pupu Akaaere i te angaanga a te Au Kite o Iehova. Aiteite teia ki te akanoonoo anga i rotopu i te au Kerititiano mua. Akatangi i te VITIO.

E tatau ia 1 Korinetia 14:​33, 40, e oti uriuri i teia uianga:

• Akapeea teia au irava te akaari anga e te inangaro ra a Iehova i tona Au Kite kia akaaereia?

4. Te akaaere nei te tavini akono meitaki i ta tatou angaanga tutu aere

Ko te tutu aere te angaanga puapinga rava atu tei raveia e te au Kerititiano mua. E tatau ia Angaanga 8:​14, 25, e oti uriuri i teia au uianga:

• I rotopu i te au Kerititiano mua, naai i arataki i te angaanga tutu aere?

• Akapeea a Petero e Ioane te ariu anga ki te arataki anga a te au taeake apotetoro?

Ko te tutu aere te angaanga puapinga rava atu tei akaaereia e te Pupu Akaaere. Akatangi i te VITIO.

 Akakite a Iesu i te puapinga o te angaanga tutu aere. E tatau ia Mareko 13:10, e oti uriuri i teia au uianga:

• Eaa i puapinga ai te angaanga tutu aere ki te Pupu Akaaere?

• Eaa tatou i anoano ei i “te tavini akono meitaki e te pakari” kia akaaere i teia angaanga i te ao katoa?

5. Oronga mai te tavini akono meitaki i te arataki anga

Oronga mai te Pupu Akaaere i te arataki anga ki te au Kerititiano i te ao katoa. Akapeea te reira te kite anga eaa te arataki anga ka oronga? Akamanako akapeea te pupu akaaere o te au Kerititiano mua te rave anga i te reira. E tatau ia Angaanga 15:1, 2, e oti uriuri i teia au uianga:

• Eaa te manamanata tei tupu i rotopu i te au Kerititiano mua?

• Aere a Paulo, Banaba, e tetai pae kiea no te akatikatika i te manamanata?

E tatau ia Angaanga 15:​12-18, 23-29, e oti uriuri i teia uianga:

• I mua ake ka akakite ei i to ratou manako, eaa ta te pupu akaaere mua i uriuri kia rauka ta te Atua arataki anga?​—Akara i te irava 12, 15, e te 28.

E tatau ia Angaanga 15:​30, 31 e te 16:4, 5, e oti uriuri i teia au uianga:

• Akapeea te au Kerititiano mua te ariu anga ki te aratakianga a te pupu akaaere?

• Akapeea a Iehova te akameitakianga i to ratou akarongo?

E tatau ia 2 Timoteo 3:16 e Iakobo 1:5, e oti uriuri i teia uianga:

• Me rave i te au ikianga i teia tuatau ka aere te Pupu Akaaere kiea no te aratakianga?

 APIIANGA

Ko te Pupu Akaaere “te tavini akono meitaki e te pakari” tei ikiia e Karaiti. Te oronga maira te reira i te arataki anga e te kai pae vaerua na te au Kerititiano i te ao katoa.

Uriurianga

• Naai i iki i “te tavini akono meitaki e te pakari”?

• Akapeea te Pupu Akaaere te akono anga ia tatou?

• Te irinaki ra ainei koe e ko te Pupu Akaaere “te tavini akono meitaki e te pakari”?