AKARA ana ra i te enua i konei! Manea tikai te au apinga ravarai! Akara ana i te matie e te au pu rakau, te au tiare e te manu ravarai. Te kite ra koe e ko teea te erepani e te au riona?

Akapeea ra teia kainga manea i te tupu anga mai? Ka akara tatou e i akapeea te Atua i te akapapa anga i te enua no tatou.

Mea mua, kua maani te Atua i te matie ei tapoki i te enua. E kua maani aia i te au rakau rikiriki tukeke, te au ngangaere e te au pu rakau. Tauturu teia au apinga tupu i te akamanea i te enua. Tera ra maata atu ta ratou e rave ana. Te maata anga ia ratou, e oronga mai ana i te au kai reka tikai te tongi anga.

Muri mai, kua maani te Atua i te ika kia kau i roto i te vai e te au manu kia rere i roto i te mareva. Kua maani aia i te au puakaoa, te au kiore ngiao e te au oroenua; te au manu mamaata e te au manu rikiriki. Eaa te manu e noo ana i te pae i toou kainga? Kare ainei tatou e rekareka ana no tei maani te Atua i teia au apinga ravarai no tatou?

I te openga, kua maani te Atua i tetai tuanga o te enua ei ngai manea tikai. Kapiki aia i teia ngai e ko te kainga i Edene. Meitaki tikai te reira. Manea te au apinga pouroa i reira. E kua inangaro te Atua i te enua katoa kia riro mai mei teia kainga manea rai tana i maani.

Akara akaou ana ra i te tutu o teia kainga. Kua kite koe e eaa ta te Atua i kite e kare i reira? Ka akara tatou.