I VAO ake i te kainga i Edene, maata tikai te manamanata o Adamu e Eva. Kua angaanga pakari tikai raua no ta raua kai. Kare e au pu ua rakau manea, e maata ra te au rakau taratara e te tataramoa e tupu ra takapini ia raua. Teia tei tupu no tei akarongo kore a Adamu raua ko Eva i te Atua, e kua akaruke raua Iaia ei oa no raua.

Te mea kino atu ra, kua akamata te kopapa o Adamu raua ko Eva i te mate. Akamaara ra e, kua akamatakite te Atua ia raua e ka mate raua me kai i te ua o tetai pu rakau. Te ra tikai i kai ei raua i te reira, kua akamata to raua kopapa i te mate. E neneva tikai no te akarongo kore i te Atua!

Kua anau pouroa te tamariki a Adamu raua ko Eva i muri ake i te tuku anga te Atua i to ratou nga metua ki vao i te kainga i Edene. Te aiteanga, ka ruaine e ka mate katoa te tamariki.

Naringa ua ake a Adamu raua ko Eva i akarongo ia Iehova, ka mataora to raua oraanga e ta raua tamariki. Ka ora ratou pouroa e mutu kore ua atu ma te mataora i runga nei i te enua. Kare e tangata e ruaine, e maki, e e mate.

Inangaro te Atua i te tangata kia ora e mutu kore ua atu ma te mataora, e te taputou maira Aia e ka pera rai ratou a tetai ra. Kare e ko te enua katoa ua te ka manea, ka maroiroi ra te au tangata pouroa i te pae kopapa. E ka riro te au tangata ravarai i te enua nei ei au oa meitaki no etai ke e no te Atua.

Inara kare a Eva i te oa akaou no te Atua. No reira i te anau anga aia i tana tamariki, e ngata tikai te reira kiaia. Mamae tikai aia. Na te akarongo kore kia Iehova i akatupu i te tu mii kiaia, me kare ainei?

Maata te au tamaroa e te au tamaine a Adamu raua ko Eva. Te anau anga ta raua tamaiti mua, kua kapiki raua i tona ingoa ko Kaina. Kua kapiki raua i te rua o te tamaiti ko Abela. Eaa ra tei tupu kia raua? Kua kite koe?