I VAO ake i te araka, te rave ua ra rai te tangata i ta ratou angaanga o te oraanga mei tei mua ana. Kare rai ratou e irinaki ana e ka tupu tetai Vaipuke. Kua maata rava atu ta ratou kata aviri. Inara kare i roa, kua akamutu ua ta ratou kata.

Poitirere ua ake, kua topa te ua. Kua maringi ua mai mei te rangi, mei ia koe rai e riringi ra i tetai pakete vai. Kua tika rai ta Noa! Tera ra kua tureiti i teianei no tetai ua atu tangata i te tomo ki roto i te araka. Kua piri meitaki te ngutupa i te topiri anga a Iehova.

Kare i roa ana, kua ngaro te au ngai akaaka pouroa i te vai. Kua riro mai te vai mei te au kauvai mamaata rai. Kua opara te reira i te au pu rakau ki raro, e kua uri aere i te au toka mamaata, e e maata tikai te aruru. Mataku tikai te tangata. Kua kake ratou ki runga i te ngai teitei. Naringa ua ake ratou i akarongo kia Noa i tomo ki roto i te araka i te taime e tuera ua ra te ngutupa no ratou! Teianei ra kua tureiti.

Te teitei aere ua atura te vai. E 40 ra e 40 po te maringi ua anga mai te vai mei te rangi. Kua teitei te vai i te au pae maunga, e kare i roa ana kua ngaro katoa te au maunga teitei roa atu. No reira mei ta te Atua tikai i tuatua, kua mate pouroa te tangata e te au manu i vao ake i te araka. Te aronga ra i roto i te araka kua ora ratou.

E angaanga meitaki tikai ta Noa e tana tamariki i rave i te maani anga i te araka. Kua akamaranga te vai i te reira e kua panu aere ki runga i te vai. I tetai ra, muri ake ka akamutu ei te ua, kua iti mai te ra. E mea umere tikai! E moana ua tei te au ngai ravarai. Te apinga ua rai ka kitea atu, ko te araka e panu aere ra.

Kare e tuputupua i teianei. Kare ratou e takinokino akaou i te tangata. Kua mate pouroa ratou e to ratou au mama, pera te toenga o te aronga kino. Inara eaa tei tupu ki to ratou au papa?

Kare te au papa o te au tuputupua i te tangata tikai mei ia tatou rai. E au angera ratou tei aere mai ki raro nei kia noo ei au tangata i runga i te enua. I te tupu anga te Vaipuke, kare ratou i mate mei te toenga o te tangata. Kua akamutu ra ratou i te taangaanga i to ratou kopapa tangata ta ratou i maani, e kua oki ki te rangi ei au angera. Inara kare ratou i akatika akaouia kia riro mai ei tuanga no te pamiri o te au angera a te Atua. No reira kua riro ratou ei au angera na Satani. I roto i te Pipiria kua kapikiia ratou e au temoni.

Kua akatupu te Atua i tetai matangi kia pupui mai, e kua akamata te vai i te akamaro. E rima marama i muri mai, kua iri te araka ki runga i te take o tetai maunga. Maata te au ra i topa, kua akara te aronga i roto i te araka ki vao, e kua kite atu i te au take maunga. Kua akamaro te vai.

Kua tuku a Noa i tetai manu kerekere tei kapikiia e e orebi, ki vao i te araka. Kua rere te manu no tetai taime e oti kua oki mai, no te mea kare i kitea tetai ngai meitaki ei toanga. Kua rave ua rai te reira i teia e i te au taime tataki tai ka oki mai, kua akangaroi ki runga i te araka.

Kua inangaro a Noa kia kite me kua pou te vai i runga i te enua, no reira kua tuku aia i tetai kukupa ki vao ake i te araka. Inara kua oki mai rai te kukupa, no te mea kare i kitea tetai ngai nooanga. Kua tuku a Noa i te reira no te rua o te taime, e kua apai mai te manu i tetai rau orive i roto i tona vaa. Kite i reira a Noa e kua akamaro te vai. I te tuku anga a Noa i te kukupa no te toru o te taime, kua kitea tetai ngai nooanga maro.

Teianei kua tuatua atu te Atua kia Noa. Akakite aia e: ‘Aere ki vao i te araka. Apai i toou pamiri e te au manu.’ I noo ana ratou ki roto i te araka tere atu i te mataiti. No reira ka rauka ua ia tatou te akamanako e mei teaa tikai to ratou mataora i te oki akaou mai anga ki vao e no tei ora!