TE KITE ra koe e eaa ta Aberahama e rave ra i konei? E matipi tana, e te akara anga ka aere aia ka ta i tana tamaiti. Eaa ra aia i manako ei i te rave i te reira? Mea mua, ka akara ana e i akapeea i rauka mai ei te tamaiti a Aberahama raua ko Sara.

Akamaara ana, kua taputou te Atua kia raua e ka anau mai tetai tamaiti na raua. Inara kare e rauka te reira, no te mea kua ruaine a Aberahama raua ko Sara. Tera ra, kua irinaki a Aberahama e ka rauka i te Atua te rave i tetai apinga noatu te akaraanga e kare rava e rauka te reira. Eaa ra tei tupu?

Muri ake i te maani anga te Atua i tana taputou, kua pou rai te mataiti. I reira, te tae anga te mataiti o Aberahama ki te 100, e to Sara ki te 90, kua anau mai ta raua pepe tamaroa ko Isaaka. Kua akatupu te Atua i tana taputou!

I te maata anga mai a Isaaka, kua timata a Iehova i te akarongo o Aberahama. Kua kapiki aia e: ‘E Aberahama!’ E kua pau mai a Aberahama e: ‘Teia au!’ Karanga atu te Atua e: ‘Ka rave i taau tamaiti, taau tamaiti okotai, ko Isaaka, e e aere ki tetai maunga taku ka akaari atu kia koe. I reira e ta i taau tamaiti e e oronga koe iaia ei atinga.’

Taitaia tikai a Aberahama i taua au tuatua ra, no te mea e maata tikai tona inangaro i tana tamaiti. E e akamaara, kua taputou te Atua e ka noo te tamariki a Aberahama ki roto i te enua o Kanaana. Inara akapeea te reira e tupu ei me kua mate a Isaaka? Kare a Aberahama i marama ana, tera ra kua akarongo rai aia i te Atua.

Tona tae atu anga ki runga i te maunga, kua tapeka a Aberahama ia Isaaka e kua tuku iaia ki runga i te atarau tana i maani. I reira, kua rave mai aia i te matipi kia ta i tana tamaiti. I tera taime tikai kua kapiki mai te angera e: ‘E Aberahama, e Aberahama!’ E kua pau atu a Aberahama e: ‘Teia au!’

‘Auraka koe e ta i te tamaiti me kore e rave i tetai ua atu apinga kiaia,’ i akakite ei te Atua. ‘Teianei kua kite au e e akarongo toou iaku no te mea kare koe i karapii i taau tamaiti, taau tamaiti okotai mei iaku.’

E akarongo maata tikai to Aberahama i te Atua! Irinaki aia e ka rauka ia Iehova te rave i tetai ua atu apinga e ka rauka ia Iehova i te akaora mai ia Isaaka mei te mate. Tera ra oki, kare tikai i te anoano o te Atua kia ta a Aberahama ia Isaaka. No reira te Atua i maani ei kia mou i tetai mamoe ki roto i tetai tumu tita i te pae ua mai, e kua akakite aia kia Aberahama kia oronga i te reira ei atinga, kare i tana tamaiti.