KUA kite koe i te vaine i roto i teia tutu? Ko Rebeka tona ingoa. E ko te tangata e aere ra aia i te aravei ko Isaaka. Ka riro mai aia ei vaine nana. Akapeea teia i te tupu anga?

Kua inangaro te papa o Isaaka ko Aberahama kia rauka tetai vaine meitaki na tana tamaiti. Kare aia i inangaro ana ia Isaaka kia akaipoipo i tetai vaine i Kanaana, no te mea e akamori ana teia iti tangata i te au atua pikikaa. No reira kua kapiki a Aberahama i tona tavini e kua tuatua e: ‘Ka inangaro au ia koe kia oki ki Harana, te ngai e noo ra toku kopu tangata e kia apai mai i tetai vaine na taku tamaiti ko Isaaka.’

I tera taime rai, kua rave te tavini o Aberahama e tai ngauru kamera e kua aere atu ki teia tere mamao. Vaitata atu aia ki te ngai e noo ra te kopu tangata o Aberahama, kua tapu aia i ko i tetai ruavai. E avatea aiai te reira, te taime e aere ana te au vaine o te oire i te tiki vai i ko i te ruavai. I reira kua pure te tavini o Aberahama kia Iehova e: ‘Te vaine ka tiki i tetai vai noku e te au kamera, kia riro koia taau e iki ei vaine na Isaaka.’

Kare i roa kua aere mai a Rebeka i te tiki vai. Te pati anga te tavini kiaia no tetai vai inu, kua oronga aia i te reira. E oti, kua aere aia i te tiki kia rava te vai no te au kamera kaki vai pouroa. E angaanga maata tikai te reira no te mea e maata te vai e inu ana te au kamera.

Te oti anga ia Rebeka te rave i teia, kua ui atu te tavini o Aberahama kiaia i te ingoa o tona papa. Kua pati katoa aia kia noo i tera po i ko i to ratou kainga. Kua akakite aia e: ‘Ko Betuela toku papa, e e ngai tetai noou kia noo i ko ia matou.’ Kua kite te tavini o Aberahama e e tamaiti a Betuela na Nahora, te tuakana o Aberahama. No reira kua tuturi aia ki raro e kua akameitaki ia Iehova no tei taki atu iaia ki ko i te kopu tangata o Aberahama.

I taua po ra, kua akakite te tavini o Aberahama kia Betuela e te tungane o Rebeka ko Labana i te tumu i aere mai ei aia. Kua akatika raua kia aru a Rebeka iaia, e kia akaipoipo ia Isaaka. Eaa ta Rebeka i tuatua i te patiia anga kiaia? Karanga aia e, ‘Ae,’ kua inangaro aia i te aere. I tera mai ra kua na runga ratou i te au kamera e kua akamata i tetai tere mamao no te oki atu ki Kanaana.

Tae atu ratou, kua aiai. Kua kite atu a Rebeka i tetai tangata e aaere ra i roto i te kainga. Ko Isaaka. Rekareka aia i te kite atu anga ia Rebeka. Kua mate tona mama ko Sara e toru mataiti i mua ua atu, e te mii ra rai aia iaia. I teianei ra, e inangaro maata tikai to Isaaka ia Rebeka, e kua mataora akaou aia.