KARE koe tangi ana i teia tangata maki? Ko Iobu tona ingoa, e ko tana vaine tera. Kua kite koe e eaa tana e tuatua ra kia Iobu? ‘Akakinoia atu te Atua, ka mate atu ei koe.’ Ka akara tatou e eaa ra aia i manako ei i te tuatua akapera, e eaa ra a Iobu i mamae maata roa ai.

E tangata tiratiratu a Iobu tei akarongo ia Iehova. I noo aia ki roto i te enua ko Uza, kare i mamao mei Kanaana. E akaperepere ana a Iehova ia Iobu, tera ra e mea ora tetai e riri ana iaia. Kua kite koe e koai?

Ko Satani te Tiaporo. E akamaara e, ko Satani te angera kino tei riri ia Iehova. Kua rauka iaia te maani ia Adamu raua ko Eva kia akarongo kore ia Iehova, e te manako ra aia e ka rauka iaia te maani i te au tangata pouroa kia akarongo kore katoa ia Iehova. I rauka ana ra iaia te reira? Kare. Akamanako ua ana i te au tangata e te au vaine tiratiratu ta tatou i apii mai ana. Eia ka maara ia koe to ratou ingoa?

I muri ake i te mate anga a Iakoba raua ko Iosepha i Aiphiti, ko Iobu te tangata tiratiratu roa atu kia Iehova i runga i te enua katoa. Kua inangaro a Iehova ia Satani kia kite e kare e rauka iaia te maani i te au tangata pouroa kia kino, no reira kua karanga aia e: ‘Te kite ra koe ia Iobu. Akara ana i tona tu tiratiratu kiaku.’

‘E tangata tiratiratu aia,’ i maro ei a Satani, ‘no te mea te akameitaki ra koe iaia e e maata tana apinga meitaki. Me apai ke ra koe i tana au apinga, ka akakino aia ia koe.’

Akakite i reira a Iehova e: ‘Ka rave i toou anoano. E apai i te reira. Rave koe i taau au mea kino pouroa kia Iobu. Ka akara taua e me ka akakino mai rai aia iaku. Tera ra, eiaa koe e tamate iaia.’

Mea mua, kua maani a Satani i tetai au tangata kia keia i te au puakatoro e te au kamera a Iobu, e kia tamate i tana au mamoe. I reira kua tamate aia i tana tamariki e 10, te au tamaroa e te au tamaine, i roto i te uriia. Aru mai, kua akatupu aia i teia maki kino tikai kia Iobu. Kua mamae maata tikai a Iobu. No reira te vaine a Iobu i karanga ai kiaia e: ‘Akakinoia atu te Atua, ka mate atu ei koe.’ Kare rai a Iobu i akapera. Tera tetai, kua aere mai e toru oa pikikaa, e kua akakite kiaia te noo ra aia i tetai oraanga kino. Inara kua vai tiratiratu ua atu rai a Iobu.

Kua rekareka tikai a Iehova, e i muri mai kua akameitaki aia ia Iobu, mei taau e kite ra i roto i teia tutu. Kua akaora aia i tona maki. E 10 akaou a Iobu tamariki manea tikai, e rua taime te maata atu i tana puakatoro, mamoe e te kamera i to mua atu ana.

Ka vai tiratiratu ua atu ainei koe kia Iehova mei ia Iobu rai? Me pera koe, ka akameitaki katoa te Atua ia koe. Ka rauka ia koe te oraanga mutu kore me akariroia te enua katoa ei ngai manea mei te kainga rai i Edene.