MANGANUI te au mataiti i topa ki muri. Maata tikai te au tamariki a te au tamariki a Noa. Kua mamaata ta ratou tamariki e kua anau kia maata atu te tamariki. Kare i roa kua maata te tangata i runga i te enua.

Ko tetai o teia au tangata ko Nimeroda, e mokopuna na Noa. E tangata kino aia e te kimi i te manu e te tangata kia ta. Kua akariro katoa a Nimeroda iaia ei ariki i te tutara ki runga i te tangata. Kare te Atua e inangaro ana ia Nimeroda.

I te reira tuatau, okotai rai reo e tuatuaia ana e te tangata. Inangaro a Nimeroda kia noo ratou i te ngai okotai kia tutara aia ia ratou. No reira kua kite koe e eaa tana i rave? Kua akakite aia ki te tangata kia akatu i tetai oire e tetai punanga maatamaata. Akara ana ra ia ratou e maani piriki ra i roto i te tutu.

Kare te Atua ko Iehova i mareka ana i teia angaanga. Inangaro te Atua i te tangata kia aere kia noo ki runga i te enua katoa. Tera ra karanga te tangata e: ‘Aere mai! Ka patu tatou i tetai oire e tetai punanga teitei kia taea te rangi. Ka rongonui i reira tatou!’ Inangaro te tangata kia akangateitei ia ratou, kare i te Atua.

No reira kua maani te Atua i te tangata kia akamutu i te akatu i te punanga. Kite koe e akapeea aia i te rave anga i te reira? Na te maani poitirere anga i te tangata kia tuatua i te au reo ke, kare e okotai ua reo. Kare ratou e marama akaou ana i tetai e tetai. No reira to ratou oire i kapikiia ai e ko Babela, me kore ko Babulonia, te aiteanga, “Akatarevake.”

Teianei, kua akamata te tangata i te aere ke mei Babela mai. Te au pupu tangata tei tuatua i te reo aiteite kua aere ki tetai tuanga ke o te enua noo ei.